Innarluuteqarneq pillugu paasisaqarnerulerpunga

Sapaatip akunnera ataaseq Tiliumi praktikkereerlunga innarluutillit pisinnaatitaaffii pillugit paasisaqarpunga.

Allattoq: Alina Jarniewska

-10.klasserpunga Minngortuunnguup Atuarfiani. Praktikkerfissatut Tilioq toqqarpara pissutigalugu pissanganarunartikkakku soqutiginarlunilu. Saniatigut nalunngereersimavara innarluuteqarnerup politikkia sulissutigisaraat, kisiannilu paasilluarusussimallugu sunarpiaanersoq.

Tilioq Namminersorlutik Oqartussat ataani namminersortutut suliffeqarfittut ingerlavoq. Allatseqarfik Sisimiuni inissisimalluni. Inuit Innarluutillit illersuisuata suliassaraa Naalagaaffiit Peqatigiivisa Innarluutillit pillugit Isumaqatigiissutaat malillugu innarluutillit  inuiaqatigiinni soqutigisaat isumannaatsumik siuarsaasumillu aallunnissaat. Suliassat pingaarnerit ilagaat Inuit innarluutillit pisinnaatitaaffiinik aamma maalaarutaanik aqqutissaannik siunnersorlugit aqqutissiuullugillu. Nunatsinni innarluutillit peqatigiiffii suleqatigalugit inuit innarluutillit Kalaallit Nunaanni atugaat siuarsarneqarnissaat qularnaarneqarnissaallu.

 

-Inuit innarluutillit pisinnaatitaaffii pillugit atuarpunga piginnaatitaaffiilu ilikkagaqarfigilluarlugit, soorlu immikkoortoq 9-mi pisariillisaaneq tassaasoq, inuit innarluutillit allatulli kiffaanngissuseqarlutik nammineerlutik inuiaqatigiit iluanni  peqataanissartik pisinnaatitaaffigigaat. Tiliumi ataatsimiittuartarput suliatik pillugit. Arlaleriarlunga ilaavunga inuusuttut naapinnissaannut tunngasumik, Sisimiuni piumaartumik.

 

Youtubekkut Tilioq filmiaraatiliarisimasaannik inuit innarluutillit peqatigalugit suliarineqartunik isiginnaarpunga, imatut ateqartut ”Ersinngitsumik innarluutiga”. Video-pput inunnit innarluutilinnit peqataaffigineqartut, ulluinnarni ilungersuutaat inuiaqatigiinnut peqataarusunnerannut tunngasunik imaqarput, kissaatigaallu allatuulli inuttut assigiimmik pineqassallutik.