Inuit innarluutillit amerlasuut suliffeqanngillat

30.11.2020

Isumakulunnarpoq misissuinerup allap aamma takutimmagu, inuit Innarluutillit amerlasuut suliffeqanngimmata. Suliffeqarsinnaanermut pisinnaatitaaffik inuit Innarluutillit pillugit isumaqatigiissumi pingaaruteqarluinnarpoq, inuiaqatigiillu suliffeqarnermi pisussaaffigaat inuit innarluutillit suliffeqarnissamik kissaateqarpata inissaqartinniarlugit aaqqissuussissallutik, Inuit Innarluutillit illersuisuat Christina Johnsen oqarpoq.

Naalakkersuisut inuit annertuumik Innarluutillit qanoq amerlatiginerannik naatsorsuilluni nalunaarusiaat saqqummeqqammerpoq, tassanilu takutinneqarpoq inuit annertuumik innarluutillit inunnut innarluuteqanngitsunut sanilliullugit suliffeqannginnerusartut, inuillu innarluutillit amerlanerit kisermaajullutik inuusut. Naatsorsueqqissaaraluni naluaarusiami inernerit Tiliup aamma Ilisimatusarfiup nalunaarusiaani                     ”Innarluuteqarnermut Isummat”-nut inerneritinneqartunut naqissusiipput.

Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfiup naatsorsueqqissaarinerani nutaami ersersinneqarpoq, inuit annertuumik innarluutillit 75% ukiuni 2018-imi aamma 2019-imi siusinaartumik pensionisiaqartuusut imaluunniit pisortanit ikiorsiissutinik pisartagaqartartut. Kisianni Tiliup Ilisimatusarfiullu saqqummiussaanni nutaami ”Innarluuteqarnermut Isummat”-ni takutinneqarpoq, inuit innarluutillit sulisinnaassusilittut ukiullit 54%-ii pensionisiaqartuusut.

Misissuinerillu illungiit takutippaat inuit innarluutillit inunnut innarluuteqanngitsunut sanilliullugit ilinniagakinnerusartut.

-Isumakulunnarpoq misissuinerup allap aamma takutimmagu, inuit Innarluutillit amerlasuut suliffeqanngimmata. Suliffeqarsinnaanermut pisinnaatitaaffik inuit Innarluutillit pillugit isumaqatigiissumi pingaaruteqarluinnarpoq, inuiaqatigiillu suliffeqarnermi pisussaaffigaat inuit innarluutillit suliffeqarnissamik kissaateqarpata inissaqartinniarlugit aaqqissuussissallutik, Inuit Innarluutillit illersuisuat Christina Johnsen oqarpoq.

Inuit Innarluutillit kisermaatut inuupput

Naalakkersuisoqarfiup naatsorsuinerani inerniliunneqarpoq inuit annertuumik Innarluutillit 18-ileereersimasut 84 %-ii kisermaajullutik inuusut, inuiaqatigiit ataatsimut isigigaanni taakkunani 51%-t kisermaajupput. Naalakkersuisoqarfiup naatsorsueqqissaarnerani takutinneqarpoq inuit annertuumik Innarluutillit 70%-ii meeraqanngimmata. Tiliup Ilisimatusarfiullu misissuinerata takutippaa aperineqartut pingasuuppata ataaseq inummik innarluutilimmik aappaqarnissamut akuersaartuusoq.

Misissuinerit taakku tunngavigalugit ilimagisinnaavarput, inuit Innarluutillit aappartaarlutik ilaqutartaarnissamut kissaateqarpata, taava tamanna ajornakusoortinneqassasoq.

-Innarluuteqarnerup paquminarunnaartinneqarnissaa pisariaqarpoq, inuiaqatigiit akornanni aamma suliffeqarnermi, kisianni aamma inuttut namminerisamik inuuneqarnermi. Inuit innarluutillit tusagassiuutini takutinneqarnerusariaqarput, qulequttani assigiinngitsuni tamani innarluuteqarnermut tunngasuinnaanngitsuni. Soorlu aningaasaqarnermut politikki, attaveqaqatigiinneq, ilinniartitaaneq imaluunniit inuiaqatigiinni oqallisigineqartut sammineqartillugit ilaatinneqarnerusariaqarput, Inuit Innarluutillit Illersuisuat Christina Johnsen oqarpoq.

Innarluuteqarneq marloqiusamik paasineqarsinnaavoq

Misissuinerit taakku marluk inunnut innarluutilinnut tunngatillugu naliginnaaleriartortunik takutitsipput, kisianni inernerit assigiinnngillat. Tassa innarluuteqarnermut tunngatillugu naatsorsueriaatsit assigiinngitsut atorneqarput. Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfiup naatsorsuinerani innuttaasut 1131-t 2018-imi aamma 2019-imi taamani inuit annertuumik innarluutillit ikiorserneqarnissaannut inatsit atuuttoq naapertorlugu naatsorsuipput. Taamaasilluni taamani inuit annertuumik innarluutillit ikiorserneqarnissaannut peqqussut naapertorlugu ikiorserneqarnissamik qinnuteqarnerminni akuerineqarsimasut tunngavigalugit naatsorsuisoqarluni. Illuatungaanili naliliinermi ”Innarluuteqarnermut Isummat”-ni apersuilluni misissuineq tunngavigineqarpoq, aperisorneqartullu namminneq innarluuteqarnersut apeqqutigineqarput. Akissuteqartullu 18 %-iisa innarluuteqarnerlutik aperineqaramik oqaatigaat. Taamaasilluni ”Innarluuteqarnermut Isummat”-ni innarluuteqarneq siamasinnerusumik paasineqarpoq, tassanilu annikinnerusumik innarluutillit amerlanerit annertuumillu innarluuteqanngikkaluit aamma ilanngunneqarput, taamaasillutillu aamma suliffeqaratarsinnaasut ilanngunneqarlutik.

-Qanorluunniit periuseqarluni misissuigaluaraanni, taava misissuinerit naliliinerillu takutippaat, inuiaqatiginni eqimattat amerlasuunik inuttallit suliffeqarnermi pitsaanerpaamik peqataatinneqannginnerat aammali inuiaqatigiinni peqataatinneqanngitsut, Christina Johnsen oqarpoq.

Isumaginninnermut, Ilaqutariinnut Inatsisinillu
Atuutsitsinermut Naalakkersuisoqarfiup inuit annertuumik innarluutillit pillugit naatsorsueqqissaarnera novemberip 26-ani saqqummerpoq. 

Tiliup aamma Ilisimatusarfiup misissuillutik naliliinerat “Innarluuteqarnermut isummat” novemberip 17-ani saqqummerpoq.