Inuit innarluutillit ilaqutaqanngikkunik kisimiilluinnassapput

Tiliumut saaffiginnissutinik nalilersuinerup ”Namminerisamik inuuneqarneq” takutippaa, inuit innarluutillit tapersersorneqarnissaat pillugu inatsimmi § 24-imi inuit innarluutillit illersuisoqarnissaat pisariaqarluinnartoq. Aammali inuit innarluutillit qanigisaasa siunnersorneqartarnissaat eqqumaffigineqartariaqarpoq, taamasilutik ilaquttaminnut innarluuteqartunut pitsaanerpaamik ikiuussinnaalerniassammata.

-Inuit innarluutillit ilaat innarluuteqarnertik peqqutigalugu oqalulluarsinnaanngillat, naammangittaalliuutissamik immersugassamik allattuisinnaanatik. Aamma arlaqarput pisortanut saaffiginninnerminni pisinnaatitaaffitik naapertorlugit sullinneqarnissaminnut piumasaqarnissaminnut nukissaqanngitsunik. Tassa oqartussanut sukataarnissaminnut nukissaqanngillat. Qanigisaasut taamaasillutik ikiuussinnaasarnerat nalitoorujussuusarpoq, inuit innarluutillit illersuisuat Christina Johnsen oqarpoq. Tiliup saaffiginnissutit 2017-imiit 2019-imut 353-nik tunngaveqartut nalilersorlugit saqqummiuteqammerpai.

Tiliup nalilersuilluni nalunaarusiaani ”Namminerisamik inuuneqarneq” –mi takutinneqarpoq saaffiginnittut 52% tassaasut inunnut innarluutilinnut qanigisaasut. Qanigisaasunut saaffiginnissuteqartunut assersuut aajuna:

Arnaq qatanngutini angut inersimasoq pillugu allappoq, nappaatai assigiinngitsorpassuarnik suussusilerneqarnikuusut. Qatanngutaa angut illoqarfimmi allami najugaqarpoq. Isumagineqanngilaq. Illoqarfeqatiginngikkaanni qatanngullu nammineq atuarsinnaanngippat allassinnaananilu ikiornissaa ajornakusoorpoq.

–Misigisarparput inunnut innarluutilinnut qanigisaasut aamma siunnersorneqarnissamik pisariaqartitsisartut, soorlu asasap qatanngutip, qitornap, angajoqqaap imaluunniit ikinngutip innarluuteqartup inuiaqatigiinni peqataaniarnermini akimmiffiit qaangerniarlugit pisariaqartitaminik ikiuutinik tunineqanngikkaanngat, Christina Johnsen oqarpoq nangillunilu.

-Inunnut innarluutilinnut qanigisaasut Tiliumut siunnersorneqarnissamut saaffiginnittarput, soorlu oqartussanit itigartinneqarsimatillutik, naak ilaquttaminnik innarluuteqartumik oqartussanit ikiorneqartussamik sinnerlugit qinnuteqarniaraluartillutik. Sullissisunit itigartinneqartarput tassa inuk innarluutilik inersimasuummat namminerlu sullissisumik attaveqartariaqartoq tunngavilersuutigineqartarluni, inuit innarluutillit illersuisuat oqarpoq.

Illersuisut pingaarutilimmik atuuffeqassapput

Inuit innarluutillit tapersersorneqarnissaannut inatsit naapertorlugu inuk innarluutilik kommunimit sullinneqartilluni illersuisumik peqateqarnissaanut neqeroortoqartassaaq. Inatsisip nutaap atuutilerneranit Tiliumut saaffiginnittut 60 arlaannaalluunniit illersuisumik peqateqarnissamik neqeroorfigineqarsimanngillat.

-Tamanna isumakuluummernarpoq, tassami illersuisut pisariaqartinneqarluinnarpoq, inuit innarluutillit illersuisuat oqarpoq.

-Inuiaqatigiit inunnut innarluutilinnut qanigisaasunut akisussaaffimmik annertuumik ilaannilu artukkiillutik tunniussisarput, inuk innarluutilik eqqortumik ikiorneqaranilu tapersersorneqanngikkaangat. Tiliumiit innassutigaarput kommuniniit inunnut innarluutilinnut tapersiisarneq pillugu sulianik suliarinninnermi illersuisoqartarnissaanik tamatigut neqerooruteqartarnissaq qulakkeerneqassasoq, inuit innarluutillit illersuisuat Christina Johnsen oqarpoq ilanngullugulu qanigisaasut ikiorneqarlutillu tapersersorneqartarnissaat inassuteqaataasoq taallugu.

-Assersuutigalugu ilinniartillugit, sulinermi isertitassanik annaasanik taarsiisarnikkut aamma ilaqutaasunut inunnut innarluutilinnut ikiuisunut tapersersuilluni oqaloqateqartarnikkut il.il. inunnut innarluutilinnut ilaqutaasunut ikiuisarnissaq tapersiisarnissarlu qulakkeerneqassasut.