Inuit innarluutillit illersuisuat: Tiliumut aningaasaliissutaasartut inatsisitigut suliakkiissutinut naammanngillat

Inuit innarluutillit illersuisuata Anja Hynne Nielsenip inatsisartuni ilaasortat maanna attavigai, Tiliup aninagasaqarnera iliuuseqarfigeqqullugu. Inatsisitigut suliakkiissutit naammassinissaanut aningaasaliissutaasartut naapertuuttariaqarput.

Inuit innarluutillit illersuisoqarfiata Tiliup inatsisitigut suliassarpassui aningaasaateqarfiit tapiisarnerisigut naammassineqartarput. Isumalluutinik atuinartupilussuuvoq, qularnarluni aamma imminut attassinnaanngilaq. Tiliumut aningaasanut inatsit aqqutigalugu aningaasaliissutaasartut akissarsianut ingerlatsinermullu taamaallaat naammattarput. Inuit innarluutillit illersuisoqarfiata inatsisitigut suliassat naammanginartumik suliarisinnaassappagit taava aningaasaliinerusoqartariaqarpoq.

-Tilioq ukiuni kingullerni millioninik millionilluunniiit affaanik aningaasaateqarfinnut qinnuteqartariaqartarpoq inatsisitigut suliassat naammassisinnaajumallugit. Soorlu inuit innarluutillit illersuisuat pillugu inatsimmi §7 naapertorlugu pisortat, soqutigisaqaqatigiit, kattuffiit aamma peqatigiiffiit ukiumoortumik naapisinneqarnissaannut tunngatillugu aningaasanik tapiissutinik ujaasisariaqartarpoq. Inuit innarluutillit illersuisoqarfiata aamma paasisitsiniaanernut suliniutinullu allanut aningaasaateqarfiit qinnuteqarfigisarpai. Inatsisitigut suliassat suliariumallugit aningaasaateqarfinnut tapiissutinik qinnuteqartuartariaqarneq aaqqiissutaasinnaanngilaq ataavartoq, taamatummi qinnuteqarneq qularnartortaqartuaannarpoq, Inuit innarluutillit illersuisuat Anja Hynne Nielsen oqarpoq.  

Inuit innarluutillit illersuisoqarfiata aamma illersuisup inatsisitigut suliassani pingaarutillit ukkatarisinnaasariaqarpai, tassami inuit innarluutillit kattuffiisa peqatigiiffiisalu nukittorsarnissai pisariaqarpoq, suliniutit aamma nalilersuinerit illersuisullu sulinera tamakkiisumik aallunneqarsinnaasariaqarput, aningaasanik tapiissutinik qinnuteqaasiortariaqarnermut piffissaajarani.

Tilioq nunatsinni tamanut atuuppoq

Tilioq nunatsinni innuttaasunut tamanut atuuppoq, isumaginninnermilu siunnersortimik atorfinitsitserusussimavugut. Tamatumalu kingunerisaanik sineriammut paasisassarsiorluta angalanerit paasissutissanik katersiviusartut annikillivagut. Tassa suliat taamatut piareersartariaqarpagut, arlalitsigullu ulapilluta angummanniartariaqartarpugut.

-Eqqaamaneqartariaqarpoq Tilioq nunatsinni inuit innarluutillit illersuisoqarfigimmagu, immikkuullarissuuvoq pingaaruteqartumillu suliaqarfiuvoq, pisariaqartinneqarnera takussutissaqarluarpoq nunanilu allani taamatut illersuisoqarfiunngitsuni nuannaartorineqarpoq, neriuutgaara politikkikkut amerlanerussuteqartut aningaasanut inatsimmi aningaasaliinerunissaq qulakkeerumaaraat, Anja Hynne Nielsen oqarpoq.

Tilioq kusassaataannaassanngilaq, illersuisoqarfiussaarli inuiaqatigiinni tamakkiisumi isiginnilluni pitsanngorsaatinut tamanut iluaqutaasussanut ikiuutaasussaq, aammali inuit innarluutillit inuiaqatigiinni ikinnerussuteqartut annersaannut iluaqutaalluni, tassami taakkuupput minitaasartut sumiginnangaanerpaasartullu.

Tamanut ersarippoq, innarluuteqarnermut suliassaqarfimmut aningaasaliisoqarnissaa pisariaqarluinnarmat.

Neriorsuut puigorneqartoq

Tilioq nunatsinni tamanut atuuppoq, inatsisitigullu suliassaqarpoq allanit suliarineqanngitsunik. Politikkikkut aamma naalakkersuisut isumaqatigiissutaani allaqqasimagaluarpoq, Tiliup aningaasaqarnera naapertuuttunngortinneqartariaqartoq, tamannali suli piviusunngortinneqanngilaq.

Naleqqap aamma Inuit Ataqatigiit Naalakkersuinikkut isumaqatigiissutigisimasaanni Tiliup aningaasaqarnera naapertuuttunngortikkumallugu siunertaqartoqaraluarpoq inuit innarluutillit atugaat pitsanngorsarumaneqarnikuugaluarput. Maanna naalakkersuisut isumaqatigiissutaanni inuit innarluutillit oqaatsimik ataatsimilluunnii eqqaaneqanngillat. Naak naalakkersuisut maanna nunatta naalagaaffiit peqatigiit isumaqatigiissutaannik naapertuiumallutik nuna tamakkerlugu iliuusissatut pilersaarusiuleraluartut. Taamatullu suliaqarnerat aningaasaqarnermut inatsisissatut siunnersuummi takuneqarsinnaanngilaq, takuneqarsinnaanngilaq iliuuserisassatut pilersaarutinut timitaliiniarnermut qanoq aningaasaliisoqassanersoq, tassa tamanna paatsuuganarluinnarpoq, Inuit innarluutillit illersuisuat Anja Hynne Nielsen oqarpoq.

-Inuit innarluutillit illersuisoqarfiata inatsisitigut suliassani naammanginartumik naammassisinnaaniassappagit, taava aningaasaliissutaasartut massakkut qaffattariaqarput, Inuit innarluutillit Anja Hynne Nielsen oqarpoq.