Inuit innarluutillit illersuisuata tamatta immitsinnut paarinissatsinnik kaammattuuteqarpoq

Inuit innarluutillit corona virusimik tunillatsisinnaasutut aarlerinartorsiornerusinnaapput. Tiliumiillu Kalaallit Nunaanni innuttaasut tamaasa kaammattorumavagut allat mianeralugit imminnut paarilluarnissaannut.

Christina Johnsen Danmarkimiit Sisimiunut martsip 13-aniani tikippoq tikinnerminiillu angerlarsimaannarallarluni, soorlu tamanna nunatsinni nakorsaaneqarfimmit innersuussutigineqartoq, sapaatit akunnerilu marluk angerlarsimaannassaaq.

-Immitsinnut paarilluartariaqarpugut,aamma inuit napparsimasut imaluunniit qaangersinnaanngisaminnik napparsimasut ataqqisariaqarpagut, taakkuuppummi tunillatsisinnasutut aarlerinartorsiunerusinnaasut. Aamma tunillaassortunik nappaalasoqalerneranut ataatsimiititaliarsuup Kalaallit Nunaanni innuttaasunut innersuussutai malinneqassasut, inuit innarluutillit illersuisuat oqarpoq.

Siornatigut atugarisimanngisagut ulluni makkunani atorpagut, pingaaruteqarporlu nunatsinni nakorsaaneqarfimmit innersuussutit malinneqarlutik toqqissisimasoqarnissaa.

Paasissutissat iluaqutaasinnaasut

Corona virusi pillugu apeqqutissaqaraanni. Soorlu, illit imaluunniit qanigisat innarluuteqarpat nalullugulu aarlerinartorsioratarsinnaasunut ilaanersusi, taava corona pillugu hotlinemut sianersinnaavusi uunga: 80 11 00 imalt, mailimut corona@nanoq.gl-imut allallusi.