Inuit innarluutillit peqatigiiffii

Sumiiffinni innarluutillit peqatigiiffii ukiorpassuarni ingerlasimapput, ilaasortat assigiinngitsorpassuarnik innarluuteqarlutik.
Sumiiffinni innarluutillit peqatigiiffii taakku 1981-imi kattunneqarput, Kalaallit Nunaanni Innarluutillit Piginnaasakitsullu
Kattuffiat (KNIPK) taaguutigilerlugu. Inuilli assigiinnik innarluuteqartut peqatigiiffeqalernissaat pisariaqalerpoq,
ilaatigut innarluut pineqartoq pillugu ilisimasanik katersiniarluni tapersersoqatigiillunilu, ilaatigullu inuit pineqartumik
innarluuteqartut atugaasa pitsanngorsarnissaat siunertaralugu. 

Ukiuni kingullerni 25-ni nuna tamakkerlugu innarluutillit peqatigiiffiinik tallimanik pilersitsisoqarsimavoq, soorlu tusilartunut,
tappiitsunut, ineriartornikkut kinguarsimasunut, tarnikkut ajuuteqartunut autismimillu atugaqartunut.
Naak peqatigiiffiit nuna tamakkerlugu atuukkaluartut inukinnera peqqutigalugu mikisuararsuupput. Tamarmik
kajumissutsimik ingerlanneqarput. Peqatigiiffiit arlaannaalluunniit allattoqarfeqanngilaq, immikkut ilisimasalinnik sulisoqarani,
allaffeqarani ataatsimiiffissaqaranilu.

Taamaalillutik peqatigiiffiit iluamik Naalakkersuisunik illuatungiliisinnaanngillat tusarniaasoqartillugu innarluutillu pillugit isumaqatigiissutip naammassiniarnerani.
Tamanna tunngavigalugu ataatsimut allattoqarfiliornissamik isuma pinngorpoq, peqatigiiffiit ataasiakkaat tapersersinnaaniarlugit immikkullu ilisimasaqalerniarluni kiisalu innarluuteqarnermut politikkimik pitsaasumik suliaqarnissamut nukissaqarsinnaaniarluni.

Nunatsinni Inuit Innarluutillit Kattuffiat (NIIK) Ukiut arlaqartut aallartisarniartoqareersoq aalajangerneqarpoq nunatsinni innarluutillit peqatigiiffiisa kattunnerisigut suliniaqatigiiffimmik ataatsimoortumik pilersitsinissaq 2018-imi novembarimi Sisimiuni Tiliup isumasioqatigiissitsineranut ataatsimeersuartitsineranullu atatillugu.

Peqatigiiffiit sisamat pilersitsisut tassaapput Inooqat, ISI, Kalaallit Tusilartut Kattuffiat (KTK) kiisalu Nuna tamakkerlugu
Autismersut peqatigiiffiat, Kalaallit Nunaanni immikkoortortatut. Kingorna Sugisaq ilannguppoq, maannalu nuna tamakkerlugu innarluutillit peqatigiiffii tallimat NIIK-imi ilaalerput NIIK-p inuit innarluuteqartut inuttut allatuulli
inuuneqarnissaat sulissutigaa.
• Innarluutillit suliniaqatigiiffiinut malunnaatilimmik oqaaseqartartuuvugut.
• Pitsaasumik suleqataavugut.
• Inuit innarluutillit peqataatinneqarnissaat, tunniussaqarnissaat ataatsimoornermilu peqataatinneqarnissaat sulissutigaarput. 

Inuit qaqutigoortumik nappaateqartutut nalilerneqartut tassalu inuit nappaatit/ innarluutit nunatsinni inuniit qulinit ikinnerusunit atugaasartut NIIK-imi aamma isumagisaraavut. Inuit qaqutigoortumik nappaateqartutut nalilerneqarsimasut NIIK-imi inuttut ilaasortaalersinnaapput.

Innarluutillit peqatigiiffiinik nutaanik pilersitsiniarnermi NIIK aamma ikiuussinnaalluarpoq. Tassunga atatillugu
oqaatigineqarsinnaavoq, Savalimmiuni peqatigiiffik MEGD taaneqassaaq peqatigiiffinnit 24-nit ilaasortaaffigineqartoq
Danmarkimilu Innarluutillit Suliniaqatigiiffiat peqatigiiffinnit 32-nit ilaasortaaffigineqartoq.