Inunnut innarluutilinnut sullissisussat amigaataapput

-Qaanaami inunnut innarluuteqartunut sullissisut ilinniarsimanngitsut taarseraannerujussuat innuttaasut Innarluutillit qanigisaasullu akornanni kommunimut tatiginnikkunnaanerannik kinguneqarpoq. Inuit Innarluutillit qanigisaasullu ilungersunartorsiuteqartarnerminnik oqariartuuteqarput, tassa inatsit nutaaq naapertorlugu tapersersorneqarnissamik ikiorneqarnissamillu siunertaqarlutik kommunimut saaffiginnissuteqartaraluarput iluatsinngitsumik, Inuit Innarluutillit illersuisuat Christina Johnsen oqarpoq. Tilioq Inuit Innarluutillit pisinnaatitaaffii smmillugit Qaanaarmiunut sammisaqartitsinerani kommunip sullissinerlunneranut uparuartuisoqarpoq.

“Socialip iluamik ningioqannginnera ittoqannginnera. Taakunga iseraanni tamatigut ilinniartuinnarmik peqatarneq, ilinniartumut tunniussaasarnerput taavunga pigussi (Tilioq) oqaatiginiassagissi!”

Tiliup Qaanaamut angalanerminik nalunaarusiamini soorlu Qaanaami kommunip allaffiani inunnut innarluutilinnut ilinniarsimasunik sulisoqalernissamut ajornartorsiuteqartoqarnera allaaseraa. Kommunimi sullissinermi saaffiginnissutinut kiisalu ernumassuteqarluni nalunaarutigineqartartunut iliuuseqartoqartannginneranik takussutissaqarpoq, aamma ataqatigiissaakkamik kommunip susassaqarfiisa akornanni, soorlu isumaginninnermi, atuartitaanermi peqqinnissaqarfimmilu suleqatigiittoqanngilaq.

Innuttaasut arlaqartut oqariartuuteqarput, kommunimut ikiorneqarnissartik siunertaralugu saaffiginnissuteqartarlutik, kisianni sulianut ukiorpassuarni iliuuseqartoqartanngitsoq. Tilioq aamma ilisimatinneqarpoq, ernumassuteqarluni nalunaaruteqarnerit ilungersunartut kommunimit iliuuseqarfigineqartanngitsut. Meeqqanut inuusuttunullu atugarliortunut kiisalu/imaluunniit naamaartartunut ernumassuteqarluni nalunaarutiginninnerit aamma arnanut innarluuteqartunut atornerluinernut tunngasut iliuuseqarfigineqanngillat.

Innuttaasut inatsisitigut innarlitsaaliugaanerat aarlerinartumiippoq

Qaanaami innuttaasut inatsisitigut innarlitsaaliugaanerat aarlerinartumiippoq. Ernumassuteqarluni nalunaarutiginninnernut iliuuseqartoqartannginnera, pisortat assigiinngitsut akornanni ataqatigiissaarinerluttoqarnera aamma maalaarnissamut ilitsersuisoqartannginnera assut ernumanarput. Inuit Innarluutillit ikiorneqarnissaannut pisinnaatitaaffiinullu tunngasunik ilisimasat killeqarpallaarput. Inuillu Innarluutillit tapersersorneqarnissaannut inatsit naapertorlugu ilitsersorneqarnissaq siunnersorneqarnissarlu naammassineqartanngilaq. Aamma illersuisumik neqeroorfigineqartanngillat, taamaalilluni inatsisitigut innarlitsaaliugaaneq eqquutsikkuminaanneqarpoq, Inuit Innarluutillit Illersuisuat Christina Johnsen oqarpoq.

Qaanaamut angalanermik nalunaarut Tilioq Avani arlariinnik inassuteqaatinik imaqarpoq. Avannaata Kommunianut, Naalakkersuisunut, Inatsisartunut, Pitsaaliuinermut Isumaginninnermullu Aqutsisoqarfimmut allanullu sammitinneqarput. Inassuteqaatigineqarpoq inunnut innarluutilinnut sullissisut inatsit nutaaq pillugu itinerusumik pikkorissarneqartariaqartut, allaffissornermi malittarisassanik pikkorissarneqarlutik, soorlu allattuisussaatitaaneq, allaffissornermi ileqqorissaarneq, ernumassuteqarlunilu nalunaarutinut tigusinermik nalunaaruteqartarnissaq, illersuisut pilersillugit il.il.

-Qaanaami pissutsit paasisaqarfigisavut aamma allani tusartarpagut. Inunnut innarluutilinnut sullisisut ilinniarsimanngissusaat Qaanaami kisimi atuutinngilaq, kommunilu kisimi tamatumunnga iliuuseqarsinnaanani. Taamaasillutalu Naalakkersuisunut, Pitsaaliuinermut Isumaginninnermullu Aqutsisoqarfimmut inassuteqaateqarpugut, Inuit innarluutillit illersuisuat oqarpoq.

-Kinaluunniit innarluutilik Majoriamit praktikkertinneqartumut inuit innarluutillit tapersersorneqarnissaanut inatsit naapertorlugu ikioqqulluni oqaloqatiginnissalluni toqqissisimanavianngilaq, nalunngilluinnarpaammi sullissiniartoq inatsit pillugu pikkorissarneqanngisaannartoq. Naalakkersuisut aamma isumaginninnermut aqutsisoqarfik pisussaapput inatsisip atuutilersinneqarnissaannut kommuni suleqatigalugu qulakkeerinnissallutik.

Nuna tamakkerlugu ungasinnerusumut isigaluni iliuusissatut pilersaarusiortoqartariaqarpoq, ilaqutariinnermut innarluuteqarnermullu tunngasuni qanoq aaqqissuussisoqassanersoq, soorlu inunnut innarluutilinnut sullissisut pikkorissarneqarlutik aamma sulisorineqaannarnissaannut iliuuseqartoqarluni.

Inuit innarluutillit illersuisuata Inatsisartuni ilaqutariinnermut peqqissutsimullu ataatsimiititaliami ilaasortat Malene Vahl Rasmussen, Stine Egede, Simigaq Heilmann, Aqqa Samuelsen, Mikivsuk Thomassen aamma Laura Taunajik Uitsatikitseq nalunaarusiaq pillugu pingasunngornermi septemberip 23-ani nal. 10.00-11.00 saqqummiiivigissavai . Uanilu Naalakkersuisunut, Inatsisartunut aamma Pitsaaliuinermut Isumaginninnermullu Aqutsisoqarfimmut inassuteqaatit immikkut sammissallugit.