Kommuneni innarluutillit pillugit suliaqarfinni isumaginninnermut siunnersortit ilinniarsimasut tallimaannaat – Kalaallit Nunaat tamakkerlugu
Tiliup NIISIPip kommuneqarfinni isumaginninnermut siunnersortinik amigaateqartoqarnera pillugu suaaruteqarnera tapersersorpaa. Innarluutillit pillugit suliaqarfik isumaginninnermut siunnersortinik ilinniakkatigullu piginnaanilinnik annertuumik pisariaqartitsivoq. Tiliup aaqqiissutissat periutsillu nutaat atorlugit innuttaasut piffissaq eqqorlugu torersumillu sullinneqartarnissaannut qulakkeerisussaq kaammattuutigaa.
Kommuneqarfinni inunnik isumaginninnermut siunnersortit amigaataanerat ajornartorsiutaavoq innarluutillit illersuisoqarfiata Tiliup arlaleriarluni siumortarsimasaa naqitatigullu saqqummersitamini uparuartortarsimasaa. Tamanna pillugu NIISIPip kommuneqarfinni isumaginninnermut siunnersortinik ilinniarsimasunik pisariaqartitsisoqarnera aammattaaq pikkorissartitsisarnissaq, siunnersueqatigiittarnissarlu pisariaqarnerarlugu oqariartuuteqarnera, aammattaaq isumaginninnermut siunnersortit kommuneqarfinnilu suliassanik isumaginnittut annertuallaartumik suliakkersorneqartarneri aaqqiivigineqartariaqartut Tilioq-mit tapersersorparput.
Tiliumi NIISIPip misissugaat qimerloorsimavagut kisitsisillu namminneq oqaluttuarput: Kommuneqarfinni innarluutillit pillugit suliaqarfinni isumaginninnermut siunnersortit ilinniarsimasut katillugit tallimaannaapput – Kalaallit Nunaat tamakkerlugu.
Kalaallit Nunaanni isumaginninnermut siunnersortit katillugit 231-iupput. Taamaallaat 77-it atorfinitsinneqarsimapput, uterparpullu – tallimaannaat innarluutillit pillugit suliaqarfinni atorfeqarput. Innarluutillit pillugit suliaqarfik isumaginninnermut siunnersortinik ilinniakkatigullu annertuumik pisariaqartitsivoq.
Innuttaasut innarluutillit siusissukkut eqqortumillu ikiorneqartarnissaat Tiliumiit pingaaruteqarluinnartutut isigaarput. Innuttaasut Tilioq-mut ikioqqullutik saaffiginnittartut amerlanerpaat tassaasarput atukkatik pillugit suliassat ingerlanneqartarnerisa pilaarpallaartarneri pissutigalugit saaffiginnittartut. Innuttaasut saaffiginnittartut pillugit misissukkatta takutippaat sulisut piginnaatsimikkut inorsartut pissutigalugit innuttaasut suliakkiussaat kukkusumik aalajangiivigineqartartut, sivisuallaarujussuartumik uninngatinneqartartut – unitsiinnarneqartarlutilluunniit.
Innarluutillit pillugit sullissineq amerlasoorpassuarnik nassataqartarpoq innuttaasullu inuunerannik sumilluunniit kalluaasinnaasarpoq. Tamakku pillugit sulisunik ilinniarsimasunik pisariaqartitsisoqarpoq, taakkulu ima ilinniarsimatigissapput inatsiserpassuit paasisimasaqarfigissallugit, inuillu innarluutillit aqqusaagassaat assigiinngiiaaqisut ilisimasaqarfigissallugit. Sulisut ilinniarsimasut innarluutillit pitsaanerusumik inuuneqalernissaannut aqqutissiuisutut aalajangiisuunerpaajusinnaapput, sulisinnaanerullu ajorsiartuinnarluni annikilliartuinnarnissaraluanut pinngitsoortitsisinnaallutik alisinnerusoq isigalugu suliakkersuutinngortussaagaluit pinngitsoortillugit. Tassa imaappoq aningaasanik pisartagaqaliinnarani sulileqqinnissaanut aqqutissiuisuusinnaapput. Meeqqap ilinniaqqinnissamut periarfissinneqarnera aamma tassaniissinnaavoq, innarluutinik nutaanik nassaarfigineqaqattaaginnarani inuunermi sinnera aningaasanik pisartagaqartunngorluni.
Maanna tusagassiutitigut saqqummiunneqartoq Tiliumi takornartarinngilarput, tamanna pillugu pitsaasutut isigaarput Meeqqanut, Inuusuttunut Ilaqutariinnullu Naalakkersuisoq Paneeraq Olsen, oqarmat upernaap ingerlanerani tigussaasumik Naalakkersuisut qanoq iliuuseqarniarnerlutik nalunaaruteqassamaartut. Tamatuma innarluutillit sullinneqarnerisa annertunerusumik sammineqarnerulernissaanut neriulluarnermik pilersitsivoq, Tilioq-milu tamakku pillugit ilinniarsimasutut isummanik taartigeeqatigiinnissamut ammavugut. Qularineqassanngilaq pisoq Tilioq-p nalaaninngaanniit qanimut malittarineqassammat.
Tilioq-miit aaqqiissutissanik nutaanik, periutsinik nutaanik innuttaasut kommuneqarfinni eqqortumik sullinneqarnissaannut qulakkeerisussaq tapersersorparput. Inunnik isumaginninnermut siunnersortinik amerlanerusunik kajumissaaralunilu ilinniartitsisoqassasoq, aammattaaq sulinerminni atukkamikkut pitsaanerusumik atugaqalissasut atorfimminniiginnarnissaminnullu qiimmassaatissaannik pilersorneqassasut. Tamakku saniatigut aamma pingaaruteqarpoq suliassanik ingerlatsisut – isumaginninnermut siunnersortitut ilinniarsimasuugaluarunik ilinniarsimasuunngikkaluarunilluunniit – iliniaqqinnissamut periarfissinneqassasut inuit innarluuteqartut ikiorneqarnissaannut inatsisip itinerusumik paasisimasaqarfigilernissaanut. Tamanna qitiusumik isiginiarneqartariaqarpoq, tassami sulisut pitsaasut taamaasillutik ataannarnissaat tassani qulakkeerneqassammat, ingammik inunnik isumaginninnermut siunnersortit ilinniarsimasut eqqarsaatigalugit.
Innarluutillit sullinneqartarneranni kukkusarnerit inatsisitigullu isumannaatsumik atugaqarnerisa amigartarnerat kommuneqarfinnit ilaginnarneqartarnerannit ilinniarsimanngitsunillu sulisoqartarnermit pissuteqaannanngilaq. Patsisaanerpaasoq tassaavoq politikikkut aningaasaqarnikkullu tunngaviatigut tunulliussisarnerit. Aammattaaq innarluutilinnik sullissineq eqqarsaatigalugu kommuneqarfinnut Isumaginninnermi Aqutsisoqarfimmit siunnersorneqarneq ikiorneqarnerlu annertuumik amigaataavoq. Ingammik inatsisitigut pissutsinut ikiorneqarnissaq inatsisitigullu atuutilersitsinermut tunngasut pissarsiariuminaattaqaat. Pissassarfik periarfissatsialaavoq katsorsaanermut tunngasut eqqarsaatigalugit, kisianni taanna kisimi naammanngilaq. Isumaginninnermut Aqutsisoqarfiup inatsimmi suliassallu aallunneqartarnerini siunnersuisutut akisussaaffimmik kivitseqataanissaa suli amigaataavoq.
Naalakkersuisut kommuneqarfiillu aaqqiissutissanik nutaanik immikkut sammisaqartariaqaraluarput kommuneqarfinni innuttaasut pillugit suliassat piffissaq eqqorlugu torersumillu suliarineqarnissaannut qulakkeerisussamik. Tupinnaqaaq isumaginninnermut siunnersortit ilinniarsimasut taama ikitsigisut taama annertutigisumik innarluutillit pillugit suilassaqartinneqartarmata.