Naalagaaffiit Peqatigiit immikkut nalunaarusiortartuata tikeraarnissani taamaatikka
14.03.2020
Naalagaaffiit Peqatigiit nunat inoqqaavisa pisinnaatitaaffii pillugit immikkut nalunaarusiortartuata Victoria Tauli-Corpuzip Sisimiuni Tiliumut martsip 14-ani pulaarnissani pilersaarutigigaluarpaa.
Victoria Tauli-Corpusip nunat inoqqaavisa pisinnaatitaaffiisa mianerineqarlutik pitsaasumik ineriartortinneqarnerinut kiisalu malinneqartikkuminaannerinut tunngatillugu paasitinneqarnissani kissaatigaa.
Naalagaaffiit peqatigiit nunat inoqqaavisa pisinnaatitaaffii pillugit immikkut nalunaarusiortartuanik Victoria Tauli-Corpuzimik naapitsinissaq COVID 19 Coronavirusip nunarsuaq tamaat ajornartorsiutigineqarneraik tunngaveqartumik piffissaligaanngitsumik kinguartinneqarpoq. Naapinnermi inuit innarluutillit illersuisuata paasissutissat nunat inoqqaavinut aamma inunnut innarluutilinnut tunngassuteqartut 2017-imiit katersarineqarlertut saqqummiuttussaangaluarpai.
Tiliumit ukiuni pingasuni kingullerni Kalaallit Nunaanni inuit inarluutillit pillugit paasissutissanik katersilerpoq, taamatullu paasissutissat inuit innarluutillit, qangisaasa kiisalu sullissisut saaffiginnittarnerisigut pissarsiarineqartarput aamma paasisassarsiorluni angalanermit. Naapinnermilu aamma saqqummiuttussaangaluarpai Tiliup inuit innarluutillit pisinnaatitaaffii pillugit paasisitsiniaasarneri, isumasioqatigiinnernut ataatsimiinnernullu aggersaasarnerit aamma nunatsinni nunanilu allani isumasioqatigiinnernut ataatsimiinnernut peqataasarnerit.
-Immikkut nalunaarusiortartoq Victoria Tauli-Corpus Kalaallit Nunaannut angalanissaminik periarfissaqalerpat, taava erinigiinnassavara Kalaallit Nunaanni inuit innarluutillit pisinnaatitaaffiisa qanoq malinneqannginneri saqqummiutissallugit. Tassami inuit innarluutillit pisinnaatitaaffii najukkatinni, nunatsinni nunanilu allani sammineqarnissaat pisariaqariarpoq, Inuit innarluutillit illersuisuat Christina Johnsen oqarpoq.