Naalakkersuisup Paneeraq Olsenip pulaarnera Tiliumiit nuannaarutigineqarpoq
03.12.2021
Meeqqanut, Inuusuttunut Ilaqutariinnullu Naalakkersuisoq Paneeraq Olsen aamma Inuit Innarluutillit Illersuisuat Anja Hynne Nielsen Naalagaaffiit Peqatigiit inunnut innarluutilinnut ullorititaani naapipput. Tassanilu naalakkersuisut inunnut innarluutilinnut tunngasunik suliassaqarfimmi ingerlatat sammineqarput.
Tiliumiit pitsaasumik maluginiarneqarpoq Naalakkersuisup Paneeraq Olsenip soqutigisarigaa inuit innarluutillit peqataatillugit politikkikkut suliaqarusummat, soorlu aamma kissaatigigaa inuit innarluutillit kiserliornermik misigisaqartarnerat aaqqiviginissaanut attaveqaateqalernissaannik siunertaqartoq. Tiliumiit nuannaarutigaarput oqaloqatigiinneq soqutiginartumik ingerlanneqarmat, soorlu aamma Tiliup inassuteqaatigisartagai politikkikkut suliniarnerani ilanngunneqartassasut. Tiliumiit suleqatigiinnerup oqaloqatigiinnerullu ingerlalluaannarnissaanut isumalluarpugut.