Qeqqata-mut qisuariaat: Kalaallit Nunaanni inuit inatsisitigut illersugaanerat qulakkeerneqartariaqarpoq

Inuit Innarluutillit Illersuisuat Ombudsmandip Qeqqata Kommuniani meeqqap tapersersorneqannginneranut suliamut sakkortuumik uparuaaneranut maanna qisuariaateqarpoq. Piaartumik inuit ersinngitsumik innarluutillit psykiatriimi misissorneqartariaqarput, ilisimasat aamma susassaqartullu assigiinngitsut suleqatigiittarnissaat pingaaruteqarput. 

-Niviarsiaqqamut aamma arnaanut tunngasumik suliamik ingerlatsinerlulluni sumiginnaaneq alianarluinnartumik, pisariaqanngitsumik aamma qaangeruminaattunik kinguneqarpoq. Iliuuseqarani sumiginnaasaqattaarneq tassa taama kinguneqarpoq. Pisumi takuneqarsinnaavoq kommunip, psykiatriip, MISIp aamma atuarfiit akornanni suleqatigiinneq amingaataalluinnartoq, naak meeraq qitiutillugu akimut suleqatigiinnissaq tamanik isiginninnissaq, ataqatigiissumik aamma ataqatigiissaakkamik suleqatigiinnissaq qulakkeerneqartussaagaluartoq - tamannalu innuttaasutut inatsisitigut tunngaviusumik pisinnaatitaaffigaat, Inuit Innarluutillit Illersuisuat Anja Hynne Nielsen Inatsisartut Ombudsmandiata Qeqqata Kommunianut sakkortuumik uparuaaneranut qisuariaateqarluni oqarpoq.

-Akuersaarneqarsinnaanngilluinnarpoq. Kommunip meeraq 9-nik ukiulik ikiussallugu tapersersussallugulu kivissinnaasimanngilaa. 2017-imi kommunimiit ernumassuteqarluni nalunaarutiginninneq siulleq tiguneqarpoq, inatsillu naapertorlugu akunnerit 24-it iluini iliuuseqarsimasussaangaluarluni. Maanna ukiut tallimat qaangiussimalerput, piffissallu taassuma ingerlanerani arfineq marloriarluni ernumassuteqarluni nalunaarutiginnittoqaqqereerpoq, suli pisoqarani. Meeqqap inuunerani ukiut pingaarutillit tallimat ingerlareerput. Meeqqap atuarnissaa qulakkeerneqarsimanngilaq, tamannalu atuarsinnaatitaanermut pisinnaatitaaffimmik malititsinerunngilaq. Meeqqallu ersinngitsumik innarluutaa suussusersiniarlugu qulaajaarlugu suli misissuisoqarsimanngilaq.

Taamatut misissuinnginnerup aamma tapersersuinnginnerup kingunerisaanik meeqqap atugarliornera sakkortusiartuinnarsimavoq allaat iliuuseqarsinnaajunnaarluni, ikiorneqarnissaalu ajornarsinerulluni. Anaanaasup ataavartumik ikiorneqarnissaani piumasarsimangaluarpaa, ilungersunartumillu atugaqarnertik nanertuutaammat sulisinnaajunnaarpoq. 

-Meeraq eqqorneqaraangat taava ilaqutariit tamarmik eqqugaasarput, Anja Hynne Nielsen oqarpoq. 

Tiliumut inuttaasut saaffiginnissutaanik nalilersuinerit takutippaat, sulianik ingerlatsinerluttarneq kommunini tamani ajornartorsiutigineqartartoq, inuillu inatsisitigut illersugaanerat tatineqartoq, soorlu kommunini sulianik ingerlatsineq, psykiatriimi kingusissukkut innarluutip suussusersineqarneratigut imaluunniit misissuisoqanngikkaangat taakkulu inuiaqatigiinni akisunaarneqarluni aningaasartuuteqarnerunermik kinguneqartarput.

-Taamatut ajornartorsiuteqarneq politikkikkut akisussaaffigineqarluni tiguneqartariaqarpoq ersarissaavigineqarlunilu. Aaqqissuussaanikkut ajornartorsiutit annertusinnginnerini aaqqiisinnaassuseqartunik pisariaqartitsivugut. Inunnut ataasiakkaanut siunissarlu eqqarsaatigalugu inuiaqatigiinni tamanna pisariaqartinneqarpoq. Imaluunniit arlaata naatsorsoqqaassanerpaa, ikiuinnginneq qanoq naleqartarnersoq? Inuit innarluutillit illersuisuat Anja Hynne Nielsen apeqqusiilluni naggasiivoq.