Sanaartornermi malittarisassanut nutaanut missingiummi tikinneqarsinnaanerup qulakkeerneqarnissaani ajornartorsiutit annertuut

Politikerit – nuna tamanik inissaqartitsisoq kissaatigaasiuk? Inuiaqatigiinni tikitsisinnaalersitsisoqarnissaa qanoq annertutigisumik kissaatigineqarnersoq qineqqusaarnermi oqallisissatsialaavoq. Sanaartornermi malittarisassanut nutaanut missingiut ukiup aallartinnerani tusarniutigineqartoq tikitsisinnaanermut, isumannaallisaanermut issittumilu avatangiisinut naleqqussaanissamut tunngatillugu annertuunik amigaateqarpoq. Ajornartorsiutit ataaniittut maluginikuuagut. Neriuppugut qineqqusaarnermi oqalllinnerni aamma sanaartornermut malittarisassat inatsisartuni oqallisigineqalerpata ilanngutissagisi.

Issittumut naleqqussaanissaq amigaataavoq
Nunatsinni nunap ilusaa pinngortitarlu inuit innarluutillit atortorissaarutaannut immikkut pisariaqartitsiviupput. Assersuutigalugu issiavimmik assakaasulimmik atuisutut ingerlasoqassappat silap pissusaa nunallu ilusaa pissutigalugit scootere innaallagiatortoq sisamanik assakaasulik imaluunniit isiaviup assakaasullip saavani issiavimmut assakaasulimmut traktori atorneqassaaq. Qamutit taakku sangunissamut, isaarianut, elevatorinut il.il. tunngatillugu issiavinnit assakaasulinnit nalinginnaasunit inissamik annertunerungaartumik pisariaqartitsiviupput. Tamanna sanaartornermut malittarisassani sillimaffigineqanngilaq.

Elevatorit angissusissaat kapitali 3.2.1., imm. 6-imi aalajangersarneqarpoq. Elevatorilli sanaartornermi malittarisassani siunnersuutigineqartut scooterinut innaallagialinnut sisamanik assakaasulinnut aamma issiavinnut assakaasulinnut traktorinut mikivallaarajuttarput. Ajornartorsiut taanna matut saavanni majuartarfiit sanguriaannut tunngatillugu takuneqartarpoq.
Tassa issittumi sumiiffinni allani tikinneqarsinnanermut pitsaassutsit misissorneqarsimanersut apeqqutigineqarsinnaavoq?

Inuiaqatigiit tamanik inissaqartitsisut?
Tamannali malittarisassani tikinneqarsinnaanermut kisimi ajornartorsiutaanngilaq. Imaassorinarpoq sanaartornermut malittarisassat nutaat siuarsaanermut atornagit tikinneqarsinnaanermut angissutsit minnerpaat atorniarneqarnerusimasut. Assersuutigalugu inissiami pingasunik quleriilimmi elevatoriliisoqartussaanngilaq – Sanaartornermut malittarisassani 3.2.1, imm. 5. Inuit issiavinnik assakaasulinnik atuisut pitsorluttulluunniit ikinngutit ilaqquttallu quleriit siullianni, aappaanni pingajuanniluunniit najugaqartut kaffillerneranni, nereqatigiinnermi inuillu allatigut katerisimaarnneranni peqataasinnaajunnaarsinneqassapput. Pitsaassutsit annikinnerpaaffissaasa atorneqarnerisa assingi matut alloriusaannut iggavinnilu inissaqarnissamut tunngatillugu takuneqarsinnaavoq.

Allannguutit taakku annikitsuinnartut ilaannit isigineqarsinnaapput, tunngaviusumilli kikkut tamaasa inissaqartillugit inuiaqatigiit siunissamut qulakkeerinniffigerusunnerigut pineqarpoq. Inuiaqatigiit peqataatitsisut tikinneqarsinnaasullu kissaatigigutsigit isumaginninneq kisiat pinnagu siamasinnerusumik isiginnittariaqarpugut. Aamma inuit inarluutillit suliffeqarfiup tikinneqarsinnaanera ernumassutigisariaqarnagu suliffeqarnissamut periarfissaqarnissaat qulakkiissavarput, aammali utoqqaat inuillu piginnaasaat annikilligallarnikuusut soorlu avatii napisimasut allanilluunniit aalasinnaanermi piginnaasaat annikillinikut allat naligalugit kaffisortitsinerni, inuuissiortoqarnerani peqataanissaat, neriniartarfilisarsinnaanissaat inuiatigiiillu inuunnerani peqataasinnaanissaat qulakkiissavarput. Uani sanaartornermut malittarisassat pingaaruteqarput tamannarpiamilu siunissamik pilersitsinissatsinnut sakkuullutik.

Aqqutit qimaaffissat annaassiniarnermilu pissutsit
Sanaartornermut malittarisassani nassiunneqartuni inuit innarluutillit aqqutit qimaaffissaat annaassiniarnermiluunniit pissutsit taaneqanngillat. Taamaammat sakkortuumik inassuteqaatigaarput tamanna sanaartornermut malittarisassani ilanngunneqassasoq, tassa inuit innarluutillit taamatut pisoqarnerani immikkut pisariaqartitsisinnaammata. Assersuutigalugu issiavinnik assakaasulinnik atuisut aammali inuit misigisaatsikkut innarluutillit il.il. sillimaffigineqarnissaat. Taamatut amigaateqarneq ilaqutariit ataatsit illuini, inissiani quleriilinni, akunnittarfinni, inini katersuuffiusartuni, inini atuartitsiviusartuni, ulluunerani paqqinnittarfinni, pisiniarfinni assigisaanilu aallaffinnilu inini il.il. atuuppoq. Assersuutigalugu inunnut tutsarluttunut qaammatunik kalerrisaaruteqartoqarsinnaavoq.

Nunarput sanaartornermilu malittarisassat uku siunissamut qulakkiissavagut. Taamatut oqaaseqaateqarluta tusarniaanermilu akissuteqarluta inuiaqatigiit maannakkut kinguaariinnilu tulliuttuni qanoq qulakkeeriffinniffigissanerigut oqallinnerunissaq siunnersuutigaarput.