Sulianik ingerlatsinerlunneq ataqatigiisakkamillu iliuuseqannginneq inuit innarluutillit angerlarsimaffeerunnerannik kinguneqartarput
11.11.2022
Inuit innarluutillit illersuisuata Naalakkersuisut inunnik angerlarsimaffeqanngitsunik kisitsinerannut aamma Kalaallit Nunaannii angerlarsimaffeqannginneq pillugu Socialt Udviklingscenterip nalunaarusiaqarneranut maanna qisuariaateqarpoq, tikkuarlugulu kommunit inuit innarluutillit tapersersorneqarnissaannut inatsit tunngavigalugu inunnik tarnimikkut napparsimasunut angerlarsimaffeqanngitsunullu maanna ikiusinnaareeraluartut.
Kalaallit Nunaanni inuit 491- angerlarsimaffeqanngitsut saqqummiunneqaqqammerpoq, taakkunanngalu arlallit tarnimikkut napparsimasuupput.
Inuit innarluutillit illersuisuata Anja Hynne Nielsenip nuannaarutigaa Naalakkersuisut inuit angerlarsimaffeqanngitsut pillugit iliuusissamik suliniuteqarmata, inatsisiliorumammatalu pitsaanerusumik periarfissaqartitsilerumallutik.
-Tamanna ajunngilluinnarpoq, kisianni inuit innarluutillit tapersersorneqarnissaannut inatsit tunngavigalugu maanna periarfissaqartoqareeraluarpoq angerlarsimaffeqanngitsunut iliuuseqarnissamut, taamatullu periarfissaq atorluarneqanngilaq. Aamma kommunini sulianik ingerlatsinerlunnermut tunngasunik ajornartorsiutit angerlarsimaffeeruttoqartarneranik kingunerluttarput, angerlarsimaffeerunnerlu tassa sulianik ingerlatsinerlunnermut ajornartorsiuteqarnermit kingunerluutit ajornerpaartarat, Inuit innarluutillit illersuisuat Anja Hynne Nielsen oqarpoq.
Toqqorsivimmit assi, angerlarsimaffiup isaariaanik takutitsisoq
NIISIP (isumaginninnermut siunnersortit peqatigiiffiat) misissuinertik tunngavigalugu 2022-imi januaarimi saqqummiuppaat, Kalaallit Nunaanni kommunini inunnik isumaginninnermi siunnersortitut ilinniarsimasut tallimaannaat innarluuteqarnermut suliassaqarfimmi sulisuusut. NIISIP-imiillu arlariinnik siunnersuuteqartoqaraluarpoq, isumaginninnikkut isumalioqatigiisitamik pilersitsisoqassasoq, isumaginninnermut suliassaqarfimmut tamanut tunngasunik suliaqartussanik. Kiisalu isumaginninnermut siunnersortit sulinermi atugaasa pitsanngorsarnissaannut aamma akissarsiatigut isumaqatigiissutaatigut aaqqiissuteqartoqassasoq. Paasissutissiissutigineqaraluarpoq NIISIP aamma Naalakkersuisut oqaloqatigiittut, kisianni iliuuserineqartunik takusaqanngilagut.
-Ajornartorsiummut akisussaassuseqartumik iliuuseqartunik takorusuppunga, aaqqissugaanikkut ajortoqarpoq ajornartorsiuteqartoqarlunilu. Kommunit inunnik tarnimikkut innarluutilinnik angerlarsimaffeqanngitsunillu innuttaqartut, maanna iliuuseqarsinnaangaluarput, taamaaliunngippatalu tunngaviusumik aaqqissugaanikkut ajornartorsiortoqarneranut takussutissaavoq, Anja Hynne Nielsen oqarpoq.
-Angerlarsimaffeerunneq tassaavoq ajornerpaamik kingunipilummut takussutissaq, tassa sulianik ingerlatsinerlunnermut. Isumaginninnermut siunnersortit ataasiakkaat pineqanngillat, Kisianni Tiliumiit arlaleriarluta oqaatigisagarput, tassa aaqqissugaanikkut ajortoqarpoq. Politikkerit akisussaaffimmik tigusisut maqaasivagut, taamatullu tikkuaajuarpugut.
Inuit tarnimikkut napparsimasut arlallit angerlarsimaffeqanngillat
Inuit innarluutillit illersuisoqarfiat Tilioq angerlarsimaffeqannginneq pillugu arlalinnit saaffigineqartarpoq, soorlu inunnit innarluutilinnit imaluunniit innuttaasunit ernumassuteqartunit. Tiliumut saaffiginnittartunik nalunaarusiami kingullermi ajornartorsiut tamanna aamma assersuuteqarfigineqarpoq, tassami inuit tunngaviusumik pisinaatitaaffiata naammassineqarnissaannut Kalaallit Nunaat suli ajornartitsimmat.
“Innuttaasup inuk innarluutilik A1-imit angerlartitaanermi kingorna angerlarsimaffeerussimasoq saaffiginnissutigaa. Inuk innarluutilik inisimaffigisinnaasaminik ilaqutaqanngilaq, qanittukkullu sila nillerpallaalersussaavoq. Innarluutilik kommunimit ikiorneqarnanilu tapersersorneqanngilaq – Innuttaasoq ernumasoq”
Inuit innarluutillit tapersersorneqarnisaannut inatsit tunngavigalugu ataqatigiissagaasumik, ataqatigiissumik tamakkiisumillu isiginnittumik, inummut tunngasut tamaasa aamma inuup inuunera mianeralugit, tapersersorneqarnissaminut pisinnaatitaavoq.
-Inuit tarnimikkut napparsimasut A1-imi uninngareerlutik angerlarsimaffissaaleqisut takugutsigit, taava inuk innarluutilik pillugu kommunit, peqqinnissaqarfik aamma oqartussat allat ataqatigiissaakkamik tamakkiisumik isiginnittumik suleqatigiinninnerannik tunngaveqartarpoq, tassa uninnissaa sioqqullugu, uninnganerani aamma kingorna.
- Aammali manna takussutissaavoq psykiatrimut aningaasaliissutit amingaataanerisa kingunerattut, inunnut ataasiakkaanut aammali qanigisaannutinuiaqatigiinnullu. Suliassaqarfimmi kivitsisoqartuuppat, taava ungasinnerusoq isigalugu angerlarsimaffeerunnissaq pinaveersaartinneqarsinnaavoq, tassami inuit tarnimikkut napparsimasut piffissaangallarnerani ikiorneqartassammata, Inuit innarluutillit illersuisuat Anja Hynne Nielsen oqarpoq naggasiillunilu - Politikkerit allannguisinnaapput piumagunik. Pingaarnersiuisinnaasariaqarput piumassuseqartariaqarpullu.