Suliffeqarnermi peqataatitsinermut suleqataavunga
12.10.2020
Tiliup suliffeqarnermut suliniutaannut atatillugu Qeqqata Kommuniani suliffeqarfiit arfinillit inunnik innarluutilinnik suliffeqarfimminni peqataatitsiumallutik siunertaqarnertik pillugu nalunaaruteqarput.
Tilioq suliffeqarnermut suliniummut ”sulisinnaavunga” –mut atatillugu Qeqqata Kommuniani Maniitsumi aamma Sisimiuni suliffeqarfinnik ”Suleqataavunga”-mut qaaqqusivoq. Suleqataavunga- suliffeqarfinnut inunnik innarluutilinnik annerusumik peqataatitsiumasunut attaveqarfiuvoq. Kalaallit Nunaannilu taamatut aattaveqarfiulluni siulleq.
Sisimiuni suliffeqarfiit suleqataavunga pillugu siunertamut peqataajumanertik oktoberip 6-ani atsioqatigiipput. Inuit innarluutillit suliffeqarfinni peqataatinneqarnerulernissaannut siunertaqarumallutik aamma attaveqarfimmut peqataajumanertik nalunaarutigaat. Qeqqata Kommuniani suliffeqarfiit peqataasut tassaapput, Arctic Circle Business, Thermo Elektrikeren, Sømandshjemmet Sisimiut, Arctic Star ApS aammat Tupilak Constructions. Tiliumiillu Qeqqata Kommuniani suliffeqarfiit soqutiginnittut aamma attaveqarfigineqarput.
Peqataatitsinissamut ikiuutit –Suliffeqarfiit inuiaqatigiinnut akisussaaqataapput. Tassa inooqataanikkut akisussaaqataallutik aamma sapinngisamik piginnaasatik nukissatillu atorlugit inunnik avatangiiserisaminnit peqataatitsinissaminnut, Arctic Star ApS-imik piginnittoq Henrik Sachse oqarpoq. Taassuma peqataatitsiumalluni ”suleqataavunga” siunertaq atsioqataaffigaa, tassani Inuit innarluutillit nammineq suliffeqarfigisamini peqataatisinissaminut ilitsersuutit iluaqutaassangatippai, soorlu aamma innarluuteqarneq suliffeqarnerlu pillugit nassuiaat, kommunini sullissisut inunnik innarluutilinnik suliffeqarfinnut pulajartuaartitsiniarnerannut tapertassatut atorneqartussatut, kiisalu sulisitsisunut inunnik innarluutilinnik atorfeqartitsisunut imaluunniit atorfinitsitsinissamik eqqarsaasersulersimasunut, piukkussaavoq. Aammattaaq quppersagaaraq inunnut innarluutilinnut imaluunniit qanigisaasunut paasissutissiissutitut atorneqarsinnaavoq. Najoqqutassiami, innarluutit assigiinngitsut, nappaatit aamma nappaatinik suussusersinermut taaguutit arlalippaaluit, aamma tamakku suliffeqarniarnermut qanoq sunniuteqarsinnaanersut, atuarneqarsinnaasoq iluaqutigissanerarpai.
-Saqqummiussat pitsaasuupput, sualummik ilitsersuut, paasissutissanik innarluutinut assigiinngitsunut tunngasunik imaqarpoq, soorlu aamma sulinermi mianerisassat allattorneqarsimallutik, Henrik Sachse oqarpoq.
Suliffeqarfiit peqatigiiffiata Arctic Circle Businessip Suleqataavunga attaveqarfimmi peqataajumapput
-Suleqataavunga pillugu siunertamut nalunaaruteqassalluta aalajangerpugut tassami sulinummi nukissani tamani periarfissat pitsaasumik takunneqarmata. Suliffeqarfiit amerlanerusunut ammaannerisigut nunatsinni sulisinnaassuseqartut amerlisinneqassapput- namminersortunut aamma iluaqutaasussamik. Tamanut iluaqutaasinnaasumik ineriartortitsisoqarnissaanut suliniut iluaqutaassaaq, Arctic Circle Businessimi pisortaq Louise Lynge Berthelsen oqarpoq.