Taqqaminik milittoortoq: Maanna allat ikiorniarpai

17.04.2021

Ukiut arfineq pingasut matuma siornagut David Møller taqqamigut milittoorpoq.
Nakkaannannginnissaq pingaarnerpaavoq. Ersinngitsuunngilagut. Inuuvugut inuttut
peqqissutut allatuulli naleqartigisut.

 

Taqqamigut milittoornermi kingornavut David Møllerip kinaassutsini nutaaq
akueriuminaatsippaa. Arpattut kamaassinnaasarpai, nammineq sapilersimalluni
eqqaasinneqartarami. Taamaakkunnaarsimavoq.

 

2015-imi ullaaralaakkut David Møller Sisimiuni ikuallaavimmi atorfimminukartilluni kaportumik niaqunngulerpoq. Taamaattoqsuliartorpoq, anniarunnaanngilarli. Iluarsisarlunilu ajorsisarpoq, ullororiartorneranilu sukkasuumik ajortikkiartorpoq.
Ullup qeqqata missaani nukillaangajaavissimavoq. Ilisimasimanngilaa pukusumini taqqamigut milittoorsimalluni.– Susoqarnersoq paasisinnaanngilara, David Møller oqarpoq. 

Taqqamigut milittoorami 56-inik ukioqarpoq. Ullumikkut 62-inik ukioqarpoq. Nukillaartalermat suliffiani uivertoqalerpoq. Suleqataa ambulancemut sianerpoq, sukkasuupilussuarmik takkuttumik. Tamannali kisingajammi peqqinnissaqarfimmut tunngatillugu ajunngitsutuaasoq isumaqarpoq. Peqqissaaviliarneq 5 -10 minutsiinnarnik sivisussuseqarpoq, maannali ilisimajunnaartalerpoq. Peqqissaavimmi suut piviusuunersut ilisimanngilaa.
– Isumaqaraluarpunga ajoquteqarnanga. Taava oqarasuaatiga tigullugu naalakkannut sianerpunga ungasinngitsukkut
aggeqqinniarlunga, oqaluttuarpoq.

Paasileramiulli timimi saamia tungaa malugisinnaanagu ajortoqartoq paasivaa. Annilaarnartumik eqqarsarpoq: Qaratsamigut
aanaartoorsimasinnaavoq inuunermi naggatissaanik.

Uteriitsoq

David Møller ilisimatinneqarpoq timmisartumik siullermik Nuuliassasoq Dronning Ingridillu peqqissaaviani katsorsarneqarluni. Tallimanngornermi taqqamigut milittoorpoq, aatsaalli marlunngornikkut ualilluarnerani aallarunneqarpoq. Ullut ingerlanerini timmisartorpassuugaluarput, eqqaamavaa. – Timmisartut peqqissaavimmik qulaassisut tusarsaajuaannarput, tamatigullu aperisarpunga maanna aallassanersunga.

-Naggataagut narralerpunga kipiluttunartorsiorlungalu, kisianni qanoq iliussagama, oqarpoq.

Ulluinnarni ilungersornerit
Inuit apopleksimik eqqugaasimasut immaqa inunnit allanit ulluinnarni ajornartorsiutinik ilungersuuteqartarput. David assersuutigalugu oqaluttuarpoq ullut akissarsiffiit pillugit. Siusinnerusukkut inuit siusinaartumik suliunnaarnersiuteqartut allaniit ullunik marlunnik pingasunilluunniit siusinnerusukkut kommunimit akilerneqartarput. Ukiulli ataatsip matuma siornagut kommunip tamanna allanngortippaa, taamaalillutik ullumikkut allat assigalugit aningaasarsisarlutik, tamannalu annertuumik sunnertiffigaa.

– Inuppassuit akornanni siulliuniarnissamut nukissaqanngilagut stresserpallaalertarluga. Kommunimut oqaaseqaatiliulerpunga. Ukiumi ataatsimi aaqqissuussineq misilittarsimavaat, atorsinnaanngilarlu. Siusinnerusukkut nioqqutissat neqeroorutit angumerisinnaasarpavut eqqissilluta pisinnaasarpullu naapertorlugu niuerniarluta, taamaaliorsinnaajunnaarpugulli.

Inuppassuit akornanniinneq ingasappallaaqaaq, oqaluttuarpoq. Peqatigiiffik Ingerlariaqqiffik maligassiuussisunngorsimavoq. Illoqarfinni allani inuit apopleksimik eqqugaasimasut allat siunnersorneqarniarlutik sianertarput. Daavillu tamatigut piffissaqarfigisarpai, namminermi nalunngilaa inuinnaalluni kommunimut sorsunneq qanoq sakkortutigisinnaanersoq.

– Nakkaannannginnissaq pingaarnerpaavoq. Ersinngitsuunngilagut. Inuuvugut inuttut peqqissutut allatuulli naleqartigisut, oqarpoq.

 

 Peqqissuseq
 Pillorissannga piginnaanngorsaqqillungalu!
 Peqqinnerulerlunga inuunissannullu ikiorlunga.
 Pisariaqartitakka anguniakkakkalu tunngavigalugit.
 Suleqatigiiffiusumik ataqatigiissaakkamillu, aamma
 peqqinnissaqarfimmit.
 Atorfitsaqartileraangakku peqataaffigisinnaasara.
 Piginnaasat eqqortut tulluartullu. 

David Møllerip inuit innarluutillit peqqinnissaat anguniarlugu kommuninut qineqqusaartunut oqariartuuteqarpoq. annerusumik uani aamma takusaqarit:

https://www.niik.gl/kl/Kommunimut-qinersineq-2021/Peqqinneq