TILIOQ AVANIMI ALLAASERISAQ: Qaanaami najugaqatigiiffiit sammisassaqartitsillunilu ornittakkat amigaataapput

Qaaqqutsiannguaq Nielsen inuit innarluutillit sammisassaqarniarlutik ornittagaannik amigaateqarpoq. Qaanaamilu inunnut innarluutilinnut ataatsimut najugaqatigiiffeqanngimmat angajoqqaamini najugaqartuarsinnaarpoq. Qaaqqutsiannguaq 23-inik ukioqarpoq Qaanaamilu ullaap tungaani aqqummi pingaarnermi Pilersuisup kommunillu allaffiata nalaaniit qummut utimullu pisoqattaartarpoq, piffissaq susaqanngiffini ingerlatipallanniarlugu.
– Ulluni taakkunani imaannaanngilaq, ornittagaq matusoq, Qaaqqutsiannguup arnaa Korna Nielsen oqarpoq. Inunnut innarluutilinnut ornittagaq matullugu meeqqat atuareernermi ornittagaattut atulerneqarpoq. Utoqqaat angerlarsimaffianni
ineeqqami inunnut innarluutilinnut sanaluffigisinnaasaat assassorfigisinnaasaattullu ornittagaq ammarneqaraluarpoq, inili mikivallaarmat ornigarneqarunnaarpoq, matuinnarneqarlunilu.
Kingorna aamma ornittagassatut piukkussaq oqoqarnera peqqutigalugu ammarneqanngilaq, – Ornittagaq maqaasivara, nuannerami, Qaaqqutsiannguaq oqarpoq. – iluaqutigisaraluaramiuk ornittagaq, tassaniinnermini eqqaavilerisarpoq, kaffiliortoq, pedeliisaaqqatut suliaqarusaartarpoq, støvsugerluni, Korna oqarpoq. Maannali angerlarsimaffimminni illuleraluni ikiuutaasarpoq, tassami ulluunerani allamik sammissassaqarpallaartanngilaq.
– Errortassaleraluni, torersaalluni erruilluniluunniit, Kornap Qaaqqutsiannguup ullormut suliarisartagai pillugit nassuiaavoq.

– Sunniuteqarnerluppoq ornittakkap matuneqarnera, Tiliup Qaanaameereernerata kingorna juunimi ornittakkamik ammaangaluarput. Ulloq ataasiinnaq ammavoq, sulisut pissutsit ornittakkami ajoralugit suliumajunnaarami, ornittagaq ingerlaannaq matuvoq, Korna ornittagaq nutaaq rækkehusinik taasartakkat festsalerisimasaanni ammarneqaraluartoq pillugu
oqarpoq.

Qaanaami ataatsimut

Qaaqqutsiannguaq Nielsen angajoqqaami illuanni 64 kvadratmeteriusumi marlunnik sinittarfilimmi inuit tallimaallutik najugatigiiput. Qaaqqutsiannguaq immikkut sinittarfeqannginnami angajoqqaami sinittarfianni immikkut siniffeqarpoq. Namminerisaminik sinittarfeqalernissani kissaatigaa, soorlu inunnut innarluutilinnut ataatsimut najugaqatigiiffimmitut ittumi, taamatullu ataatsimut najugaqatigiiffiit Qaanaami periarfissaanngillat.
– Soorlu Nanortalimmiuuvunga ataatsimut najugaqatigiiffiit takunikuullugit tamaani amigaataavoq, Korna oqarpoq. Qaaqqutsiannguaq Nielsen Ado Lyngep Atuarfiani atuarnikuuvoq, Qaanaamullu uternermi kingorna tassa angajoqqaamini najugaqalerpoq.