TILIOQ AVANIMIT ALLAASERISAQ: Oodaaq igalaamut torlulaartarluni saaffiginnittariaqartarpoq

Avannaata Kommuniata Qaanaami allaffianut tummeqqakkoorluni
matuatigut allatuulli assakaasulimmik issiaveqarluni isiinnarsinnaanngilaq.

Oodaaq Henningsen 57 –inik ukioqarpoq innaallagiatortumillu issiavini atorlugu kommunip allaffiata silataanut unittariaqartarpoq igalaamullu torlulaartarluni saaffiginnissuteqartariaqartarluni. – Soorunami erloqinartarpoq, inuit takusinnaasaannik taamatut pisariaqartarama, Oodaaq Henningsen oqarpoq tassami kommunip allaffiata silataaniit igalaamut sullissisumik oqaloqateqartariaqarniarluni torlulaartartariaqartartpoq, soorlu ataasinngornikkut aningaasat pisartagassai kontoanut ikineqarsiman-ngikkaangata. Aamma misigisarpaa Kommunip oqarasuaataanut sianeraluartarluni akineqanngitsumik.

Ataasinngornerit tamaasa aalajangersimasumik kontoanut nakkartoqartarpoq, tassami Avannaata Kommunianit aningaasaqarnera aqunneqarpoq, ilaatigullu aningaasat kontoanut nuunneqarnissaat puigorneqarsimatillugu, tassa Qaanaami aqqusinersuup qeqqaniit kommunimi sullissisup igalaavanut torlulaartartariaqalersarpoq

Avannaata Kommunianiit Tiliumut nassuiaasoqarpoq, kommunip isaariaanut majorallaliinissamut atortussat Qaanaamut tikereersimangaluartut, sanasulli ulapputeqarpallaarnerat tunngavigalugu suliassaq suli naammassineqanngitsoq.
Oodaap assakaasulimmik issiaviata assakaasua siorna qaarmat, ukioq ataasersuaq utaqqivoq nutaamik assakaasulimmik issiavittaarnissaminut. Illoqarfimmi angallatigisartakkaminik assakaasulimmik issiaveqarpoq innaallagiatortumik. Oodaaq Pilersuisumut iserniaraangami majorallakkut iseriartortarpoq, isersinnaassappalli matut savimerngiusut ikiortimit
ammarneqartariaqarput, aamma aniartortunut matu ammangaluarpat
tassuuna isersinnaanngilaq, tassami alloriusaq
portuallaarpoq iserniassappat.

Oodaaq namminerisamik inuuneqarniarnermini ilungersunartorsiortoq

Oodaaq innaallagiatortunik assakaasulinnik issiaveqarpoq, taannalu atorlugu inigisaminiit Pilersuisumukartarpoq, inaa illoqarfimmi illut alliit ilagaat, aqqusinerlu sissamut qaninneq aqqutigikkajuppaa. Innaallagiatortunik assakaasulinnik issiaveqaraluarluni aqquserngit asfalteqannginnerat ilungersunartittarpaa. -Ukiukkut aputeqartillugu marrittarput, quaallutillu, Qaanaaq sivigasarpoq aputeqarluartillugu, ilaatigut nangiarnarsisarput,
tassa ukiukkuinnaq.

Aasaanerani aqqusineq qasunarsisarpoq ujaraaqqat pissikalaartarput qamutinnut timinnullu qasunarsisarpoq, Oodaaq oqarpoq nassuiaallunilu nunap qerinerata nalaani ingerlaarfigalugu iluarnerpaasartoq.

Inunnut innarluutilinnut isumaqatigiissut naapertorlugu
Oodaap namminerisaminik inuuneqarnissaminut ilungersunartorsiorpoq,
tassami Qaanaami inuttut innarluutilittut suut tamaasa tikikkuminaatsutut pissarsiariuminaatutullu misigisarpai, soorlu kommunip allaffianut iseriaannaanngilaq aamma interneteqarnissaminut akissaqanngilaq allaat namminerisaminik inuussutissaminut siusinaartumik pensionisiani atorlugit niuerniarsinnaanani, tamatumalu kingunerisaanik utoqqaat illuata iggavianiit ataasinngornermiit tallimanngorneq ilanngullugu ullup qeqqanut kissartunik ullormut ataasiarluni pajutsittarpoq.

Inuttut ikorfartortit taarseraannerujussuat aamma misigisarpaa piffissallu ilaanni ikorfartorteqartarani. 2020-mi maajimi lejlignutaamik inuttut ikorfartorteqalerpoq, ulluinnarni 9-17 sulisartumik. Inuttut ikorfartortaa ilinniarsimasuunngilaq Oodaallu nammineq ilitsersuuttariaqarpaa qanoq ikiorneqarlunilu tapersersorneqassanerluni. Arfininngornermi sapaammilu ikorfartorteqarani kisimiittarpoq….

Oodaaq Henningsen pillugu allaaserisaq tamakkiisoq Qaanaamut angalanermik nalunaarummi Tilioq Avanimi qupp. 20-miit atuaruk.