Tilioq Nuummi isumasioqatigiisitsinissamut ataatsimiisitsinissamullu piareerpoq

04.11.2019

Inuttut siuttuusinnaaneq aamma inuusuttut peqataatinneqarnerat Tiliup inuit innarluutillit peqatigiiffiinut isumasioqatigiisitsinerani sammineqassapput, naggataatigullu inunnik innarluutilinnik inuiaqatigiinni peqataatitsineq qulequtaralugu ataatsimiisitsissallutik.

Nuummi Hotel Hans Egedemi Tilioq novemberip ulluisa 9-aniit 11-anut isumasioqatigiisitsillunilu ataatsimiisitsissaaq. Tiliup isumasioqatigiisitsinissaanut KNIPKimit aamma sinerissammi immikkoortortaqarfittut peqatigiiffinnit, nunata tamakkerlugulugu innarluutillit kattuaffiannit NIIK-imit kiisalu inuusuttunit innarluutilinnit katillugit 40-nit peqataassapput. Ataatsimiisitsinissamilu novemberip ulluisa 11-ani pisussami, Naalakkersuisunit, Inatsisarutnit, Kommunimi qinikkanit, maalaaruteqartarfinnit, kattuffinnit aamma Namminersorlutik Oqartussani Kommuninilu atorfilittat peqataatinneqassapput.

-Inuit innarluutillit peqatigiiffiinut aamma kattuffiinut Isumasioqatigiisitsinissatsinnut qilanaaqaagut, tassani inuit innarluutillit peqatigiiffilerinermik suliniutillit naapissavagut. Peqatigiiffiit tassaapput inunnik innarluutilinnik qanigisaannillu ulluinnarni attaveqartartut, soorlu aamma najukkaminni inunnut innarluutilinnut atugassarititaasunik pissutsinnillu ilisimannilluartut. Isumasioqatigiisitsinermi inuttut siuttuusinnaaneq aamma peqatigiiffilerinermi siulersuisinnaaneq sammissavagut, peqatigiiffilerinermik suliniuteqartartut inuttut kiisalu peqatigiifilerinerminni siulersuinermik nukittorsassavagut inunnullu innarluutilinnut iluaqutaasinnaasunik allannguinissaannut pisinnaasaqalersillugit. Imatut qullersalersorluni imaluuniit alliunerusunik inissiilluni aaqqissuinermik siulersuineq eqqarsaataanngilaq, kisinani siuttuuniarnermi akisussaaffimmik tigusisinnaaneq sammineqassaaq. Naak peqatigiiffilerinermik imaluunniit sanilimik taamaallaat soqutigisaqaraluaraanni, inuit innarluutillit illersuisuat Christina Johnsen oqarpoq.

Peqataatitsineq qulequtaralugu ataatsimiinneq

Tiliup “Inunnik innarluutilinnik inuiaqatigiinni peqataatitsinermik” qulequtsiilluni novemberip 11-ani ataatsimiisitsissaaq.

Inuit innarluutillit, peqatigiiffilerinermik aamma kattuffinni suliniuteqarnermik suliaqartartut naalakkersuisunik, kommunimi qinikkanik kiisalu inatsisartuni aalajangiisartunik naapitsinissaminnut periarfissinneqassapput, tassanilu inuit  innarluutillit inuiaqatigiinni peqataatinniarneqarneranni misilittakkanik kiisalu suliniutigineqarsinnaasunik siunnersuuteqarsinnaassallutik.

Inuit pisinnaatitaaffii pillugit instituttimiit inuit pisinnaatitaaffii aallaavigalugit peqataatitsineq pillugu saqqummiisoqassaaq. Inuk innarluutilik peqataatinneqarnermi atugassarititaasunik saqqummiussissaaq, sulisitsisut suliffeqarnermi pitsaanerpaamik peqataatitsinermik misilittakkanik saqqummiussissaaq kiisalu inuit innarluutillit peqatigiiffiinnit ataatsimoorussamik oqariartuuteqassapput, inuiaqatigiinni peqataatinniarneqarnermi akimmiffiusartunik.

-ataatsimiinnermi peqataasussat oqariartuutigisassaannut erinisuppunga, inuit innarluutillit inuiaqatigiinni peqataatinniarneqarneranni akimmiffiusartut kiisalu aaqqissutissatut iliuuserineqarsinnaasunik siunnersuuteqarnissaannut. Tassa ilinniartitaanermi, suliffeqarnermi, peqqinnissaqarfimmi, attaveqaqatigiinnermi imaluunniit tamat oqartussaaqataaneranni peqataatinniarneqarnermut tunngasinnaapput. Aaqqissutissatullu siunnersuutigineqartut Naalakkersuisunut tunniunneqassapput, taamaasillutik inuiaqatigiinni ineriartortitsillutik suliniuteqarnerminni atorsinnaassavaat. Inuiaqatigiit inunnut innarluutilinnut akimmiffissalersuinngitsut, inuiaqatigiinnilu allatuulli periarfissaqartinneqarlutik peqataaniassammata.

Tiliup Nuummi Hotel Hans Egedemi novemberip 9-aniit 11-ata tungaanut isumasioqatigiisitsinissaanut ataatsimiisitsinissaanullu pileraarutit uani atuarsinnaavatit.