Tilioq Nuummi naqitamik saqqummersitsilluni aaqqissuussaqarpoq

saqqummersitap naqinneqarnissaanut NunaFondenimit taperneqarpugut. Saqqummersitallu saqqaa toorlugu imarisaa atuarneqarsinnaavoq. 

Qujanaq– Leave No One Behind

Takkussimasusi tamassi tikilluaritsi, qujanarlu najuukkumagassi– minnerunngitsumillu uuma saqqummersitap imarisaanut suleqataasimagassi.

Tiliumiit nuannaarutigaarput maanna saqqummersitaq tigummigatsigut, taannami atorlugu inuiaqatigiinnik peqataatitsisunik pilersitsisinnaavugut. Inuiaqatigiit tamatta pisussaaffeqarpugut Nunatta naalagaaffiit peqatigiit inuit innarluutillit pillugit isumaqatigiissutannik aamma nunarsuarmi anguniakkat atuutilersinnissaannut suleqataassalluta, pisussaaffeqarpugut ”Kalaallit Nunaata tamanut naleqqussarnissaanut”, tassami tamanna maanna suli angusimanngilarput.

Naalagaffiit peqatigiit nunarsuarmi anguniagaat sakkussatut atorsinnaavarput, taakkunanilu qulequttat periarfissatut isigalugit aammali iliuuseqannginnerup inuiaqatigiinnut akisunera paasillugu. Inuiannut aningaasaliineq imminut akilersinnaanera saqqummersissavarput. Innarluuteqarnermut suliassaqarfimmut piujuartitsisumik aningaasaliisoqarsinnaavoq, inuiaqatigiinni nalilinnik sunniuteqartunik. Inunnut isiginnittariaaseq pineqarpoq, inuk salliutillugu isigalugu innarluuteqarnera pinnagu- inuiaqatigiinnilu kikkut tamaasa peqataaatillugit.

Innarluuteqalernermik pilersitsisartut akimmiffiit nassaaralugillu iliuuseqarfigissavagut. Akimmiffiusartut annerpaartaat tassaavoq pigiliutiinnakkanik isummertarneq aamma immikkoortitsisarneq. Tamannalu ilisimasakinnermik tunngaveqakkajuppoq. Pigiliutiinnakkatut isummiussat ilisimasat atorlugit nungusassavagut.

Inuiaqatigiinni inuit innarluutillit inooqataaniarnermikkut piginnaasamikkullu tatigineqarnerusariaqarput, nunatullu taamatut isiginninnissaq anguniartariaqarparput. Inuiaqatigiit tamanik inissaqartitsinerulersikkumallugit.

Innarluuteqarnermut suliassaqarfimmut aningaasartuutaannaat pineqannginnerat ilungersortumik tigusariaqarparput, Aningaasaliinerit naleqartitallu pineqarput. Inunnik isiginnittaaseq qitiuvoq. Inunniguna qanoq isiginnittaaseqaratta inuiaqatigiinni sanngiinnerusut ikiorneqartannginnerat akuersaartaripput? Aamma meeqqat isumaliortaatsimikkut erloqissuteqartut piaartumik ikiorneqarnissaat qulakkeertanngilarput, piaartumik ikiuisuugutta ilinniagaqarnissaat imminnullu napatissinnaalernissaat qulakkeersinnaassagaluarparput.

Innarluuteqarnermut aningaasaliinerit ataasiakkaanut maanna iluaqutaassaaq, aammali inuup taassuma saniatigut allanik ajornerulissuteqannginnissaa imaluunniit innarluuteqalinnginnissaa pinaveersaartinneqarsinnaavoq, - inuup ilinniagaqalernissaanut suliffeqalernissaanulluunniit periarfissat annertusineqassapput. Qanigisaasullu isumalluutaanerat annikillisinneqarsinnaavoq- ila qanoq amerlatigisunik tusartanngilarput angajoqqaat suliffik taamaatillugu qitornamik eqqortumik ikiorneqarnissaa anguniarlugu. Meeqqallu ineriartornerat atugarissaarnerallu sunnerneqarnerluttarpoq angajoqqaat ikiorneqanngikkaangata.

Naatsorsueqqissaarnerit aningaasaliissutinut tunngavigineqartartut amerlanertigut annikippallaartaarput, sivikitsumik sunniuteqarsinnaasarlutik kiisalu tigussaasunut tunngasuunerusarlutik – annikitsunut aningaasartuutit aningaasatigullu iluanaarutaasinnaasut eqqumaffigineqarnerusarlutik. Tamatumuuna iluanaarutaasinnaasut pissutigineqarnerusarput, naak tamatumuuna inuunitta naleqarnerulersinnaanerat annikillisarneqartartoq – kiisalu pissutsit uagutsinnut pingaarutillit, soorlu ilinniartitaanerup pitsaassusaa, meeqqat inuusuttullu atugarissaarnissaat kiisalu tarnikkut nappaatilinnut tunngasut, aningaasaliissuteqarnerni ilanngunneqanngitsoortarlutik.

Tiliumi ataatsimiisitsinermi 2022-imi alloriarneq siulleq tiguarput, ilissilu peqatigalusi maanna una saqqummersitaq atorlugu qaaqqusivugut, ”Kalaallit nunaallu tamanut naleqquttoq” pilersissallugu suleqatigiumavatsigit.

Qujanaq.

Inuit innarluutillit illersuisuat Anja Hynne Nielsen oqalugiarpoq 

Aaqqissuussami kaffi, tii kaagilu sassaalliutigineqarput 

Tiliumiit neriuutigaarput saqqummersitaq aallaavigalugu nunarsuarmi anguniakkat piviusunngortikkumallugu suliniartunit atorneqarumaartoq 

Saqqummersitaq kattuffinnut, peqatigiiffinnut qinikkanullu tunniussuunneqassaaq