Tilioq Qaanaamut paasisassarsiorluni aallalerpoq

11.04.2020

Tiliup allatseqarfiani sulisut saamerlermiit; Anna Ida Jonsson, Drude Daverkosen, Oline Inuusuttoq Olsen aamma Inuit Innarluutillit Illersuisuat Christina Johnsen Qaanaamut paasisassarsiorlutik angalanissaminnut piareerput. Aajuku Tiliumi naqitat Qaanaarmiunut tunniussuutassat ilamerngi piareeqqavaat. 

Inuit innarluutillit illersuisuat Christina Johnsen aamma Tiliumi allatseqarfimmi sulisut Qaanaamut inuit innarluutillit atugarisaannik paasisassarsiorlutik maajip 20-ani tikissapput.

-Erinisuttupilussuuvunga Qaanaami inunnik innarluutilinnik, qanigisaannik sullissisunillu naapitsinissannut, tassami Qaanaarmiunik Tilioq 2017-miilli aamma saaffigineqartarpoq, nunatsinnilu inunnut innarluutilinnut tamanut illersuisutut pisussaaffeqarpunga inuit innarluutillit najugaannut tikillugit atugaannik misissuisarnissannut, saaffiginnissutigineqartartullu naapertorlugit tunngavissaqarluarpugut tikeraarnissatsinnut, Inuit innarluutillit illersuisuat Christina Johnsen oqarpoq.

Inuit innarluutillit illersuisoqarfiat Tilioq Qaanaami innuttaasunut maajip 24-ani pisinnaatitaaffit pillugit timersortarfimmi sammisassaqartitsissamaarpoq, inuillu innarluutillit qanigisaat kiisalu innuttaasut siunersorneqarnissaannut aamma saaffissamik allaffimmik ammatitsiumaarlutik ataasinngornermi kiisalu marlunngornermi maajip 25-ani 26-anialu.

-Qaanaamut paasisassarsiorluta angalanissarput sapaatip akunneranik sivisussuseqarumaarpoq, innuttaasunut sammisassaqartitsinitta saaffigineqarsinnaanittalu saniatigut pisortat inunnut innarluutilinnut neqeroorutigisaannik misissuilluta pulaartassaagut, soorlu utoqqaat illuinut, peqqinnissaqarfimmut, kommunimi sullissisunut kiisalu susassaqartunik ataatsimeeqateqartassalluta, inuit innarluutillit illersuisuat Christina Johnsen oqarpoq. Qaanaamullu angalanermi meeqqanut atuartunut aamma sammisassaqartitsisoqassaaq.  

-Paasisassarisiorluta angalanissatsinni aamma Avanersuup atuarfiani atuartunut nukarlernut, akullernut angajullernullu saqqummiussisussaavugut, soorlu aamma immikkut atuartut pulaassamaarpagut, tassa inuit innarluutillit pisinnaatitaaffii pillugit sammisaqartitsissaagut, pingaaruteqarpormi inuiaqatigiinni kikkut tamarmik peqataatinneqarlutillu inissaqartinneqassappata inuit innarluutillit pisinnaatitaaffiinik aamma qaammarsaanissaq, inuit innarluutillit illersuisuat oqarpoq.

Tilioq Qaanaamut angalareernermi kingorna Avannaata Kommuniata qullersaqarfianut Ilulissaniittumut aamma paasisassarsiorluni ataatsimeeqateqariartussaaq, soorlu aamma Avannaani peqqinnissaqarfiup qitiusumik nakorsaqarfianut pulaartoqassalluni, taakku Qaanaami inunnut innarluutilinnut sullissinerat pillugu paasisassarsiorfigineqassallutik.

-Qaanaamut paasisassarsiorluni angalanerup kingorna nalunaarusiussaagut, tassanilu Qaanaami inuit innarluutillit atugaannik misissuinitsinni paasisanik imaqassaaq, soorlu aamma pitsanngorsaataasinnaasunik inassuteqaatinik imaqarumaarluni, inuit innarluutillit illersuisuat Christina Johnsen aallanngitsiarnermini oqarpoq.

Paasisassarsiorluni angalanissaq pillugu paasisaqarnerujumagaanni attavissaq: Inuit innarluutillit illersuisuat Christina Johnse mailikkut: cjo@tilioq.gl oqarasuaat +299 34 50 90 /+299 55 19 50