Tiliumi saaffik pitsanngorsarneqarpoq

Marita Jessen isumaginninnermi siunnersortitut ilinniagalik Tiliumi maajip aallaqqaataani atorfinippoq innuttaassullu saaffiginnissutaannik annermik suliaqassalluni. Inuit innarluutillit tapersersorneqarnissaannut inatsimmi tapersersorneqarnissamut kiisalu ikorfartorneqarnissamut aamma inuit innarluutillit pisinnaatitaaffiinut tunngasunik apeqqutissalinnut siunnersuisassaaq, soorlu aamma inuit innarluutillit ulluinnarni atukkaminni ilungersunartorsiorpata siunnersorsinnaasassallugit. Maritap aamma inuit innarluutillit maalaarutigisinnaasaannut siunnersorlugit ikiortassavai. Tiliumi siunnersortip inuit innarluutillit atugaat naliginnaasut aamma pisinnaatitaaffiit pillugit oqaaseqarsinnaavoq, inunnullu ataasiakkaanut sulianut tunngasunik aalajangiisinnaananilu allannguisinnaanngilaq.

Maritap siunnersortitut sulinissamini innuttaasut inatsisitigut illersugaanerat pitsanngorsaaqataaffigissavaa, inunnut isumaginninnermut suliassaqarfimmi ilisimasani tunngavigalugit suliniutini assigiinngitsuni inerisaanermi aamma suliaqartassaaq, soorlu inuit innarluutillit pisinnaatitaaffii pillugit paasissutissiinerni qaammarsaallunilu suliniutini. Tiliumi suleqatitaatta uku aallussavai:

• Meeqqanut inersimasunullu innarluutilinnut qanigisaannullu pisinnaatitaaffiit kiisalu maalaarfissatut periarfissat pillugit siunnersuisassaaq
• Oqartussat, sullissiviit, kattuffiit aamma inuit ataasiakkaat inuit innarluutillit pisinnaatitaaffii pillugit siunnersuisarluni
• Inuit innarluutillit inatsisitigut illersugaanerata pitsanngorsarnissaannut suliniutini suleqataassaaq

Marita Jessen ilisaritillugu:

Marita isumaginninnermi siunnersortitut 2021-mi allagartartaarpoq, Sisimiunilu ulloq unnuarlu angerlarsimaffimmi isumaginninnermi siunnersortitut atorfeqarsimavoq, kalaallisut qallunaatullu oqaaseqarpoq. Inuttut inunnut sunniuteqarluartumik allannguinissaminut kajumissuseqarpoq, inuillu innarluutillit pillugit suliassaqarfimmi ilisimasani aallaavigalugit kivitseqataarusuppoq.

Marita nammineq timimigut piginnaanikillisimavoq, tassa 22-nik ukioqarluni perorsaasutut ilinniarnermini ajutoornermi kingorna niua saamerleq kipineqartariaqalersimammat. Ajutoornermi kingorna unammillernartorpassuit aqqusaarpai, nutaanilli qaammaasaqarfigilikkaminik taakkulu misilittagarilikkani allanut ingerlateqqikkusullugit iliuuseqarpoq, tassa 2016-imi isumaginninnermi siunnersortinngorniatut ilinniarluni aallartikkami. Tamannalu Maritap qujamasuutigeqisaanik pisinnaasimavoq ilisimasalinnit, ilinniarfimminit, ilaquttaminiik aammalu ikinngutiminiik tapersersorneqarluni ikorfartorneqarnerminiik. Marita isumaqarpoq pingaaruteqartoq inuk timikkut piginnaanikillisimasoq kisimiittutut misigissanngippat eqqortumik siunnersorneqarnissaa tapersersorneqarnissaalu. Aamma ilisimasat misilittakkallu avitseqatigiinnikkut ingerlateqqinneqartassasut allat pitsaanerusumik atugaqarniassammata.

Siunnersorti attavigiuk:

Inuit innarluutillit, qanigisaat allallu siunnersorneqarumallutik Tiliup allaffianut Sisimiuniittumut attaveqarsinnaapput:

Ataasinngornermi marlunngornermilu 10.00-15.00

Sisamanngornermi tallimanngornermilu: 10.00-15.00

Oqarasuaat: +29 24 22 44

Takkulluni siunnersorneqarniaraanni: Aqqusinersuaq 48 1.sal-imi ini saamerleq, 3911 Sisimiut.

Tamatigut uunga aamma attaveqartoqarsinnaavoq:

Mailikkut allakkat uunga: info@tilioq.gl

Facebookimi Tilioq- Inuit innarluutillit illersuisuat/Handicaptalsmanden messengerikkut allaffigalugu

Allakkat uunga adressemut nassiullugit

Aqqusinersuaq 48 1. Sal saamerleq, Boks 3081, 3911 Sisimiut

Ussersorluni oqalutsi inniminneqquneqarsinnaavoq Tilioq mailikkut ilisimatillugu: info@tilioq.gl-imut, taava ussersorluni oqalutsi siunnersuinissaq sioqqullugu inniminnissavarput.

Tilioq inuit innarluutillit illersuisuat inuit innarluutillit naliginnaasumik atugaat aamma pisinnaatitaaffii pillugit oqaaseqarsinnaavoq. Kommunini inuit innarluutillit tapersersorneqarnissaannut sulianut ataasiakkaanut aalajangiisinnaanngilavut. Tilioq Naalagaaffiit peqatigiit inuit innarluutillit pillugit isumaqatigiissutaat aamma Kalaallit Nunaanni inatsisit atuuttut naapertorlugit sulivoq.