Tiliup inuit innarluutillit peqataatinneqarnerat pillugu ataatsimiisitsineranit innersuussutit

Tiliup 11/11 ataatsimiisitsinerani inuit 80t peqataapput. Inuit innarluutillit peqataatinneqarnerulernissaanut oqallittoqarpoq, inuiaqatigiinnilu iliuusissanik siunnersuuteqarlutik innersuussuteqarput.

Ataatsimiinnermi siammasissumik peqataasoqarluarpoq. Naalakkersuisoqarfiit, kommunit, inuit innarluutillit peqatigiiffiinit, peqqinnissaqarfimmit, inuussutissarsiortunit aamma kattuffinnit kiisalu sulisartut kattuffiinit peqataasoqarami. Naalakkersuisunut ilaasortat Martha Abelsen, Karl Frederik Danielsen, Vittus Qujaukitsoq aamma Erik Jensen peqataapput. Naalakkersuisup Martha Abelsenip aamma Erik Jensenip innersuussutinik tunniussiffigineqarput.

-Taamatut tamakkiisumik peqataatitaqarneq Tiliumut pingaaruteqartoq, Inuit innarluutillit illersuisuat Christina Johnsen oqarpoq, tassami inunnut innarluutilinnut polikki tassaaginnanngilaq inunnik isumaginninnermut politikki. Peqataatsitsineq tassaaginnanngilaq inunnik isumaginninnermut attuumassuteqartoq. Pisortat, aqutsisoqarfiit, naalakkersuisoqarfiit, susassaqarfilluunniit kisimiillutik suliassaq kivissinnaanngilaat. Suut tamaasa aqqusaartassavavut.

Inuiaqatigiinni kikkut tamarmik peqataatineqassallutik periarfissaqalernissaat qanoq iliorutta piviusunngortissinnaanerlugu sulissutigissavarput.

Taamaaliorsinnaavugut suliffeqarfiit susassaqarfiillu akimorlugit oqaloqatigiittarnikkut. Inuiaqatigiinni suliassarpassuit annertupput. Meeqqat atuarfianni ajunngitsumik ilinniartitsinissaq peqataatsitsinissarlu ilinniagaqarnermilu peqataatsitsinissaq ilaanissarlu pingaartillugit. Sulissutigissavarput suliffeqarfiit kikkunnut tamanut naleqqussakkat, kikkut tamarmik peqataanissaannut ammaassisut, sanaartornermi illuliornermilu kikkut tamarmik ajornartorsiuteqaratik atorsinnaasaannik, mittarfeqarfiit aaqqissorneqassasut kikkut tamarmik angalanerminni atorsinnaasaannik, TV radiolu teknikkikkut atortorissaaruteqassapput kikkut tamarmik nutaarsiassanut aliikkusersuinermullu periarfissaqaqqullugit, katerisimaartarfiit, sunngiffimmi neqeroorutit, niuertarfiit assigisaallu kikkunnik tamanik atorneqarsinnaasut.

Tamakkuuppullu ataatsimiinnermi oqallisigineqartut, itisilerneqarlutik qulaajarneqartut aamma iliuuseqarfigineqarnissaannut siunnersuuteqarfigineqartut. Qulequttani assigiinngitsuni peqataaniarnermi akimmiffiusartut oqallisigineqarput, tamakkulu inuiaqatigiinni qanoq iliuuseqarfigineqarpata iluarsineqarsinnaanersut sammineqarlutik.

-Innersuussutit tulleriiaakkat susassaqartunut aamma oqartussanut assigiinngitsunut sammitinneqarput, Christina Johnsen oqarpoq. Naaalakkersuisunut, Kommuninut, Inuussutissarsiortunut, tusagassiuutinut aamma inuiaqatigiinnut kiisalu Tiliumut innersuussutinik suliaqartoqarpoq.  Peqataasut tamaasa iliuusissatut siunnersuuteqarnerannut qutsavigaavut. Tassami inuiaqatigiinnit tamakku iliuuseqarfigineqartussaapput, innersuusiortoqarsimanngippallu ukua saqqummiussimanavianngikkaluarpagut. Tamatuma saniatigut ataatsimiinnermi saqqummiisut immikkut qutsavigiumavagut, tassami peqataatinneqarnermut tunngasunik immikkut tamarmik assigiinngitsunik saqqummiussaqarnermikkut, innersuussutissanik siunnersuusiortoqarnissaanut ilaliisuupput.

– Innersuussutigineqartut inuiaqatigiinni inuit innarluutillit peqataatinneqarnerulernissaannut iluaqutaassapput. Neriuutigaarput oqartussat attuumassuteqartut innersuussutigineqartut suliariumaaraat. Innersuussutit ataatsimiinnerup naammassinerani Naalakkersuisunut tunniunneqarput, taakkuli tamanut sammitinneqarput aamma tamanit atorneqarsinnaapput. Inuiaqatigiit peqataatisinerusut pilersinniarneranni Tilioq piareersimavoq isumasiorneqarnissaminut aamma oqalliseqataanissaminut, Christina Johnsen oqarpoq.