Ukiortaami pilluaritsi ukiumullu 2020-mut innarluutilinnullu inatsimmut iserluarisi
02.01.2020
Ukiortaassaq erinigeqalugu qilanaareqalugulu utaqqisimavarput, tassami inunnut innarluutilinnut inatsisissaq nutaaq atuutilerpoq.
Inatsit pisariaqarluinnarpoq tassami inunnut innarluutilinnut pisinnaatitaaffinnik qulakkeerinnittussaammat. Inatsilli aamma pisariaqarpoq inuiaqatigiinni Naalagaaffiit Peqatigiit inunnut innarluutilinnut isumaqatigiissutaat tamakkiisumik naapertorlugu atuutinneqanngimmat.
Isumaqatigiissummi immikkoortortat timitalerniarneri ajornakusoortinneqartillugit taava suli pingaarnerulersarpoq pisinnaatitaaffinnik tunngaveqartumik inunnut innarluutilinnut tapersersuisarnissamik inatsiseqarnissaq. Maannamullu takusareerparput inuit innarluutillit pisinnaatitaaffiinik isumaqatigiissutip maleqqissaarnissaanut unammillernartinneqartoq.
-Kommune Kujallermut paasisitsiniaalluta augustimi 2019-imi angalanitsinnit angalanermik nalunaarusiarput qaammat kingulleq saqqummiupparput, allaaserisani immikkoortuni takutippagut pissutsit pitsanngorsarneqarsinnaalluartut suunersut. Kommune Kujallermut arlariinnik innersuussutinik tunniussivugut, qularnanngilarlu kommuninit allanit taakku isumassarsiorfigilluarneqarsinnaasut. Soorlu kommunini sulisut illoqarfinnut nunaqarfinnullu pissutsinik namminneq takuniaasarnissaannut aammali innuttaasunut pitsaanerusumik siunnersuisalernissaannut, inuit innarluutillit illersuisuat Christina Johnsen oqarpoq.
Aamma Namminersorlutik Oqartussanut, Naalakkersuisunut Inatsisartunullu innersuussutinik tunniussaqarpugut. Innersuussutit ilaat attaveqatigiinnermut tunngassuteqarput, immikkortitsisannginnissamik innersuussutit, Ilinniarfissuarmi immikkut ittumik perorsaanermik ilinniartitsisoqartalernissaa, suliffeqarneq inissaqartitsisoq immikkuualuttullu allarpassuit.
Immikkuualuttut tamakku inunnut innarluutilinnut inatsisissap kivinnavianngisaanut iluarsinavianngisaanullu tunnngassuteqarput. Inunnut innarluutilinnut inatsisissaq makkununnga sunniuteqarnavianngilaq, soorlu pisortat ilaasunik angallassinermi kiffartuussinissamik isumaqatigiissusiortoqarnissaani tikikkuminassutsimut tunngasunik minnerpaamik piumasaqaatissanik nalunaarsuinissamik piumasaqaateqanngilaq, sanaartornermi maleruagassani nutarsaasoqarnissaanut, ilinniarfissuarmi immikkut ittumik perorsaanermik ilinniarnermi linjefageqartalernissaq aamma suliffeqarnermi inunnik innarluutilinnik sulisoqarnissamut inissaqartitsisalernissaq allarpassuillu eqqarsaatigalugit.
-Namminersorlutik Oqartussat, Naalakkersuisunullu ilaasortat tamaasa angalanermik nalunaarusianik decemberip 5-ni nassippagut nalunngilarpullu allakkat apuutereersut. Namminersorlutik Oqartussanut, Naalakkersuisunut Inatsisartunullu 12-inik innersuussuteqarpugut taakkununngalu qisuariaateqarnissaat qilanaaraarput, tassami inunnut innarluutilinnut inatsisissap kisimi inunnut innarluutilinnut tunngasut iluarsiivigisinnaanngilai. Neriuutigaarput inunnut innarluutilinnut atugassarititaasunik pitsanngorsaanermik sulineq 2020-mi ingerlaqqiinnassasoq. Neriuppugut inunnut innarluutilinnut tunngasunik paasisanik suli amerlanerusunik pilersitsiumaarluta, taamaasillutalu pisariaqartinneqartunik pitsanngorsaasinnaajumaarluta. Inunnut innarluutilinnuinnaanngitsoq aammali tamanut iluaqutaasussamik, Christina Johnsen oqarpoq.
Inunnut innarluutilinnut illersuisoq Christina Johnsen apersorumallugu ugguuna attavigineqarsinnaavoq:
mail: cjo@tilioq.gl
oqarasuaat: +299 34 50 90 /+299 55 19 50