Ukiortaami pilluaritsi!

30.12.2022

Ukioq 2023 nutaanik suliassaqarfiussaaq, unammilligassat nutaat aammali periarfissat nutaat. Naalagaaffiit Peqatigiit inuit innarluutillit pisinnaatitaaffii pillugit isumaqatigiissutaannik malinnikkumalluni nuna tamakkerlugu atuuttussamik iliuusissatut pilersaaruteqalissaaq. 

Tiliumiillu tamanna pillugu assut isumalluaqaavut.

Ukioq 2022-mi inunnut innarluutilinnut suliat pisullu qulaajarneqartut tupannangaarput, atornerluinerit, systemip annertuumik sumiginnaanera, susassaqartut arlariit ukiorpassuarni sumiginnaanerat. pisut inunnut ataasiakkaanut tunngapput. Pisullu tamakku annertuumik ilaqutariinnut aammali inuiaqatigiinnut kingunipiloqartaqaat.

Tiliumiillu aamma ilisimavarput, suliat tamakku ataasiaannarlutik pisanngimmata.

Tamannalu aamma naqissuserneqarpoq sineriammi 2022-mi angalangatta. Illoqarfinni nunaqarfinnilu inuit naapitavut pissutsinik aamma sulianik ilungersunartunik paasisaqarfigaavut. Ukiorpassuarni sumiginnaasarnerit pillugit tusagaqarfigaavut. Systemit ataasiakkaanut ikiuisussatut pilersinneqarsimasut ingerlanerlorujussuarput. Ilisimasakinneq peqqutaalluni inuit ataasiakkaat ilinniagaqarnissaraluinit mattussuisoqarpoq, suliffeqarnissaraluanit akimmiffiliisoqarpoq aamma siunissamut periarfissanut akimmiffilersuisoqarluni. Assigiinngisitsineq, qinngasaarineq aamma peqatigiinnit ilaluarineqarneq. Ilsimannittunit nassuiarneqarpoq ilaqutariit ikiorneqarnissamut ilungersuuteqartut, tusaanngitsuusaarneqarlutik imaluunniit pimoorunneqaratik. Ilaqutareeqarpoq tunniutiinnartunik, ilaat tunniutiinnarlutik piumanngikkaluarlutik nuuttariaqalersarput, ilaat nunamut allamut nuuttariaqalersut. Ilaqutariit tunniutiinnartut ilaat uippakajaarnermik eqqungaasarput, tassa ikiorneqannginnamik. Ilaqutariit aamma inuit, ikiorneqarnissamik sukataaruteqaraluartut, tamannalumi inatsisitigut aamma inuit innarluutillit pisinnaatitaaffii pillugit isumaqatigiissummi psinnaatitaaffigaat.  

Tamakku oqariartuutigineqartut tamavimmik itisuumik sunniipput iluarsiinissamullu sukataarnissamut pisussaaffiliipput. Tiliumi paasissutissat tamakku katersavut tamaasa maanna suliaraavut - angalanermilu tassani atuarfeqarnermut tunngasunik qitiutitsilluta ilisimasanik katersisimavugut. Tassami meeqqat innarluutillit meeqqat atuarfianni katataappata, ilinniagaqarnissamut pisinnaatitaaffiat naammassineqanngippat, meeqqamut ilaqutaannullu ilungersunartunik kingunipiloqartarpoq. Ungasinnerusorlu isigalugu inuiaqatigiinnut aamma akisunaarneqassaaq, tassami ilinniagaqarsinnaatitaanermut pisussaaffik naammassineqanngimmat. Arlaata naatsorsorsinnaasariaqaraluarpaa qanoq tamanna inuiaqatigiinnut akisutigisarnersoq, siusissukkut iliuuseqannginnerup kingunerimmagu. 

Inuiaqatigiinnut aamma  aningaasaqarnermut akilersinnaavoq inuk aningaasaliiffigalugu, akimmiffiit annikitsut annertuunngunnginnissaat anguniarlugu. 

Ukiumi aallartittussami siullertut pisussamut peqataanissannut qilanaarpunga, tassa Naalakkersuisut ilaqutariit pillugit isumasioqatigiisitsinissaannut peqataassagama, aamma Kalaallit Nunaanni inuit innarluutillit peqatigiiffiinik suleqateqarnerma ingerlatiinnarnissaanut inuillu pineqartut ilanngullugit suleqatiginissaat qilanaaraara. Tiliup ukiumoortumik peqatigiiffinnut susassaqartunullu isumasioqatigiisitsinissaanut ataatsimiisitsinissaanullu qilanaarpunga, Ilulissani maajimi pisussaavoq. Kalaallit Nunaannilu nuna tamaat atuuttussamik iliuusissatut pilersaaruteqalernissaa qilanaarivara, piuinnarani iluaqutaanissaa neriuutigalugu. 

Utaqqinerani, eqqaamasariaqarparput innarluuteqarneq tamatsinnut tunngassuteqarmat, tamatta assavut isallugit iliuuseqartariaqaratta. Inunnut isiginnittariaaaseq pineqarmat aamma piujuaannartitsineq. Tamatta akisussaaqataavugut. 

Leave No One Behind. 

Ukiumut nutaamut iserluarnissassinnik kissaallusi