Utoqqaat illersuisuat aamma Inuit innarluutillit illersuisuat naapipput
18.06.2020
Utoqqaat illersuisuat Helene Heilmann Inuit innarluutillit illersuisuanut Christina Johnsenimut juunip 18-ani pulaarpoq.
Utoqqaat Illersuisuat Helene Heilmann sulilernini aallarnerlugu Sisimiunut tikeraarnerminut atatillugu Tiliumut pulaarpoq.
Naapinnermi illersuisut imminnut ilisareqatigiipput, Tiliumiit inunnut innarluutilinnut suliniutigineqartut saqqummiunneqarput soorlu aamma utoqqalinermi innarluuteqalersarneq oqaloqatigiissutigineqarput, illersuisummi marluullutik suliassaqarfigisaasa ilagaat.
Tiliumiillu utoqqalinermi innarluuteqalersimasunut paasissutissat maannamut pilersinneqarsimasut katersorneqarsimasullu Utoqqaat illersuisortaavannut Helene Heilmannimut tunniunneqarput, soorlu Kommune Kujallermut angalanermik nalunaarusiaq 2019, Innutaasut Tiliumut saaffiginnissutaannik nalilersuilluni nalunaarusiaq, inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaat- atuaruminarsagaq ilaatigut aamma tunniunneqarlutik.
Illersuisutut suleriaatsit, attaveqarfeqarneq, Kalaallit Nunaanni illersuisutut sulineq, siunnersuisarnerit suliniuteqarnermi siunnerfiit aamma anguniakkat, paasissutissiisarnerillu naapinnermi eqqartorneqartut ilagaat.
– Uanga pingaartikkakkit suleqatissat kiinarsillugit naapinnissaat pulaaarumanikuuvunga, aamma assigiiffeqassammata suliassagut kiisalu aporfiusinnaasut tikkuarneqartussallu sumiissinnaaneri paasisaqarfigerusullugit. Inuit innarluutilllit, qanigisaasut sullissisuniillu Tiliumut saaffiginnittarnerat pillugit paasisaqarfigerusullugit, sulianillu naqqaniit aallartinnermi siunnersuutaasinnaasut paasisaqarfigerusullugit Tiliumut pulaarpunga, Utoqqaat Illersuisuat Helene Heilmann oqarpoq.
Inuit Innarluutillit Illersuisuanit Christina Johnsenimit Utoqqaat illersuisortaavanik naapitsineq nuannaarutigineqarpoq.
-Tiliumiit utoqqalinermi innarluuteqalersut aamma sullittarpagut, taamaattumik Utoqqaat illersuisuallu attaveqatigiittarnissarput suleqatigiissuteqartarnissarpullu pissusissamisoorluinnarpoq. Naapinnermi matumani siullermi kiinarsivugut ilasseqatigiillutalu aamma immitsinnut suliani ilutsinni attuumassuteqartuni ilisimatitseqatigiittarnissarput siunniupparput, Inuit Innarluutillit Illersuisuat Christina Johnsen oqarpoq.
Tusagassiortut annerusumik paasisaqarumasut uunga attaveqarsinnaapput:
Utoqqaat illersuisuat Helene Heilmann oqaraasuaammi uani attavigineqarsinnaavoq: +299 5313 54
Inuit innarluutillit illersuisuat mailikkut uani attavigineqarsinnaalluni: cjo@tilioq.gl