Nyheder

Aggustusip naanerani Sisimiuni nuna avannerlerninngaaneersorpassuarnit tikeraarteqarpoq. Nunani avannerlerni inuit innarluutillit kattuffii paasisimasallillu assigiinngitsut Nunatsinnut tikeraarput eqqartueqatigiikkiartorlutik, qanoq nunani avannarlerni inuit innarluutillit pisinnaatitaaffii atugaalu nukittorserneqarsinnaanersut. Naapeqatigiinneq tamaattut Nunatsinni aaatsaavissuaq pivoq. Sisimiut ataatsimiiffissatut toqqarneqarneranut pissutaavoq Naalakkersuisut inuit innarluutillit pillugit nutaamik iliuuseqarnerat. Tassalu inuit innarluutillit sungiusartarfiat Pissassarfik aamma Inuit Innarluutillit Illersuisoqarfiat Tilioq Sisimiuni angerlarsimaffeqarlutik pilersinneqarnerat.

Inunnut innarluutilinnut sapaatip akunneritinneqartoq Sisimiuni tikikkuminassuseq pillugu pisuttuaqatigiinnermik malunnartinneqarpoq. Tikikkuminassuseq pillugu pisuttuaqatigiinnerup ersersippaa inuit innarluutillit ulluinnarni atugaat unammerlernartoqarsinnaaqisut. Pingasunngorneq 11. oktober 2018 Inuit innarluutillit illersuisoqarfiat Tiliup Sisimiuni inuit innarluutillit peqatigiiffii Puigornanga, Ingerlariaqqiffik aamma ISI suleqatigalugit tikikkuminassuseq pillugu pisuttuaqatigiinneq aaqqissuuppaat.

Ataatsimoorussamik suliniutip nutaap, innuttaasut innarluutillit amerlanerusut sulilersissavai. Qeqqata Kommunia Innarluutillillu illersuisoqarfiat Tilioq, suliniut nutaaq pillugu suleqatigiinnissamik isumaqatigiissusioqqammerput. Inuit innarluutillit amerlanerusut suliffeqalernissaat suliniutip siunertaraa.

Kommunit innarluutillit pillugit suliassaqarfik tassungalu atasumik suliassanut pingaaruteqartunut sullissisinnaappat sullisserusullutillu? Innarluutilinnut tunngasunik suliassatigut unammilligassaqarpugut annertuunik. Unammilligassat annertuut isiginngitsuusaaginnarsinnaajunnaarpavut. Taamaammat tamatumunnga atatillugu oqallittariaqarpugut. Tassami taamaallaat ammasumik oqallinnikkut, inuiaqatigiittut unammilligassavut peqatigiilluta aaqqiivigisinnaavavut.

Novembarimi Inuit innarluutillit allaffeqarfiat Tilioq siullermeersumik isumasioqatigiissitsissaaq ataatsimeersuartitsillunilu. Tassani Naalaaffiit Peqatigiit Inuit Innarluutillit pillugit isumaqatigiissutai sammineqassapput, tamatumalu inuiaqatigiinni qanoq inunnut innarluutilinnut pitsanngorsaataasinnaaneri eqqartorneqassallutik. Isumasioqatigiinnermi ataatsimeersuarnermilu sineriak tamakkerlugu inuit innarluutillit pisinnaatitaaffii sammineqassapput. Tamatumunnga atatillugu Tiliup sulissutigisassaasa ilagissavaat inuit innarluutillit pisinnaatitaaffiinut isumaqatigiissutip kalaallisut qallunaatullu paasiuminarsarlugu suliarinissaa.

Inuit innarluutillit illersuisoqarfiata uparuarpaa: Atuarfitsialak pitsaanngilaq.   Sermitsiami Helene Brochmann-ip allaatigisaanut oqaaseqaatitut, Inuit innarluutillit illersuisoqarfianiit Sermitsiamut allaatigisamik nassiussisimavugut. Meeqqat atuarfiata oqallisigineqarnerani, meeqqanut immikkut pisariaqartitsisunut pissutsit atuuttut tappiffigineqanngitsoortuartartuupput. Kalaallit Nunaanni inuit innarluutillit illersuisoqarfiattut tamassuma allanngortinneqarnissaa kissaatigaarput. Tassami meeqqat inuusuttuaqqallu immikkut pisariaqartitsisut pissutsit atugaat pitsaasuunngillat.
Skip to content
Skip to toolbar