2023-mi innuttaasut Tiliumut saaffiginnissutaannik misissuineq qulequtalik “Inuuneq Sullunartoq” saqqummerseqqammerparput. Qulequtaanilu takuneqarsinnaalluarpoq Kalaallit Nunaanni inuttut innarluuteqartutut inuunerup imaannaanngitsuunera.
Inuit innarluutillit allatuulli inuttut pisinnaatitaaffeqarput.
Inuiaqatigiinni inissaqartitaanissamut, akuunissamut, peqataanissamullumi tamatta pisinnaatitaaffeqarpugut. Tamattali ulluinnarni tamanna misigineq ajorparput. Nunagisami tikilluaqqusaasutut, inissaqartutut, peqataasinnaatitaasutullu tamatta misigisussaagaluarpugut.
Tamannalu angussagutsigu pisariaqarpoq inuiaqatigiittut allannguisoqarnissaq.
Inuit Innarluutillit takunngitsuusaarneqarneq, tusaanngitsuusaarneqarneq allaat nunamut allamut nassiuneqarneq nalaatarisarpaat. Tamattali manna nunagivarput, angerlarsimaffigivarput tamattalu inissaqartussaalluta. Inissaqartitsinerli sunaava? Nunarput tamatsinnut inissaqartitsisumik qanoq ilusilersorsinnaavarput?
Inuttut innarluuteqarneq assigiinngitsutigut isikkoqarsinnaavoq, tamatigullu ersiutai tamanit takuneqarsinnaaneq ajorput. Taamaammat takorloorinnittoq ilusilersuisorlu ataasiinnaasinnaanngilaq, naalakkersinnaanngilassimi inuit innarluutillit qanoq inissaqartissanerigut, saaffiginnissutilli aallaavigalugit siunnersuuteqarsinnaavunga.
Inatsisitigut illersugaaneq nukittorsarneqartariaqarpoq, malittarisassallu suleriaatsillu nunatta inuinut naleqqussartussaallutik – inuk innarluutilik qanigisaasullu nukippassuit atorlugit naleqqussarniarsariinnarsinnaanngimmata.
Tiliumut innuttaasunit saaffiginnissutit amerlanerpaat sullinneqarnertik pillugu saaffiginnissutigisarpaat, sullissineq arriitsoq, tukattoq, nukinnik atuiffiusoq naammaginanngitsorlu.
Sullissisullu aamma takusinnaavagut ilungersortut, ilaatigut sullitat 50-it qaangerlugit ikiorsarniartaramikkit. Tassanilu equngassutaa ilaatigut aningaasaqarnermi aallaaveqartoq takussutaasinnaavoq – suliarmi ilungersunarpat aningaasarsiallu naammaginanngippata kiap suliaq ingerlakkusussagamiuk?
Inuit innarluutillit sullinneqarluarnissaat angussagutsigu aningaasat pillugit oqallinnissaq avaqqunneqarsinnaanngilaq. Kattuffiit Naalakkersuisullu inuiaqatigiit aningaasarsiaqarluarnissaat qulakkeertariaqarpaat.
Qineqqusaarnermilu kikkut QANOQ suliamik ingerlatitsiniarnersut malinnaaffigiumaarpagut, qanorlu pisinnaatitaaffitta piviusunngortinneqarnissaat takorloorneraat. Neriorsuutit tusartareerpagut, massakkullu pilersaarusiat timitaliisinnaasut ujartorpagut.
Qineqqusaarnermi sassartut tamarmik Tiliumiik innuttaasut ikiornissaannut tapersersorusuppagut – tamattami inissaqartussaagaluarpugut.
