Inuiaqatigiit tamanut qanorluunniit piginnaasaqartunut inissaqartitsisoq qanoq pilersinneqarsinnaanersoq sammineqassaaq, tamannami Naalagaaffiit Peqatigiit nunarsuarmi anguniagaanni kinaluunniit katataassanngitsoq “Leave No One Behind” neriorsuutaammat.
Ukioq 2022 innarluuteqarneq eqqarsaatigalugu pingaaruteqarpoq, nunalu tamakkerlugu inuit innarluutillit pisinnaatitaaffii malitsinniarlugit iliuusissatut pilersaarusiortoqassammat. Inuit Innarluutillit Illersuisuata Anja Hynne Nielsenip innarluuteqarnermi susassaqartut naapinnissaai qilanaaraa. Nutaaliorluni innarluuteqarnermut tunngatillugu ineriartortitsineq kiisalu piujuartitsilluni aaqqiissuteqarneq sammineqassammat. Tamannalu tunngavigalugu Tiliumiit Jens Wandel qaaqquarput, taanna Bevica Fondenimi aamma FN’-ip generalsekretærianut Anthonio Guterres immikkut siunnersortaasimasoq ataatsimiinnermik ammaassammat.
Tiliup ataatsimiisitsineranut nuna tamakkerlugu peqataasussat 60-iupput, tassa inuit innarluutillit peqatigiiffiinit kattuffinniit peqataasoqassaaq, soorlu aamma suliamut ilinniarsimasut, atorfilittat, Kommunalbestyrelsenut, Inatsisartunut, Naalakkersuisunullu ilaasortatut qinikkat peqatigalugit oqallissaagut, innarluuteqarnermut sammisami piujuartitsisumik qanoq ineriartortitsisoqassanersoq. Qanoq tamanut aamma inunnut innarluutilinnut iluaqutaasunik aaqqiissuteqassaagut. Inuiaqatigiit tamanut assigiimmik periarfissiisoq qanoq qulakkiissavarput. Sammineqassapput aamma ilinniartitaaneq, ineqarneq, inuttut isiginnittaaseq kiisalu suliniaqatigiinneq.
- Inuit innarluutillit illersisoqarfiannut Tiliumut pingaaruteqarpoq, Inuit innarluutillit pisinnaatitaaffiisa
inuiaqatigiinni tamatigoortunngortinneqarnissaat, ineriartortinneqarlutik aamma siuarsarneqarlutik.
Tamannalu tunngavigalugu Jens Christian Wandel, FN-imi 1988-imili sulisoq qaaqquarput, taamaasilluta
iliuusissanik oqallittoqalernissaa anguniarlugu, inuiaqatigiinni tamanut iluaqutaasussanik periarfiissiisunillu aaqqiissutinik aningaasaliisoqassasoq, Inuit Innarluutillit Illersuisuat Anja Hynne Nielsen oqarpoq.
Oqallinnerup tunngaveqarluarnissaa qulakkeerniarlugu Jens Christian Wandel aamma Inuit pisinnaatitaaffii pillugit instituttimi immikkut siunnersorti Mette Frandsen saqqummiissapput, soorlu aamma Kristine Jensen Mørch Sanami aamma inuit innarluutillit peqatigiiffiinit saqqummiisoqartassaaq.
Innarluuteqarnermi piujuartitsisumik ineriartortitsineq Jens Wandelip tunngaviusumik oqariartuutiginiarpaa, Naalagaaffiit Peqatigiit 2030-mut anguniagaanut kiisalu nunarsuarmi anguniakkanut 17-imut kinaluunniit katataassanngitsoq siunniunneqarmat (Leave No one behind). Naalagaaffiit Peqatigiit ilaasortaasa pisussaaffigaat naligiinnginnerup kiisalu sanngiinnerusumik inissisimasut iliuuseqarfigissallugit, tassami aaqqiisoqannginngippat inuttut ataqqinassuseqarlutik kiffaanngissuseqarlutik kiisalu naleqartumik inuuneqarnissaannut periarfissalussammata.
Ataatsimiinnissaq sioqqullugu Tilioq inuit innarluutillit peqatigiiffiinut kattuffiinullu
isumasioqatigiisitsissaaq, nuna tamakkerlugu inunnut innarluutilinnut iliuusissatut
pilersaarusiortoqarnissaannut tunngasumik sammisaqassallutik. Tassani ilaatigut facebookimi
sunniuteqarumallutik #enmillionstemmerimik suliaqartoq Monica Lylloff oqalugiassaaq, eqqortumik
ikiorneqannginneq aamma inatsisitigut illersugaaneq sammissallugit, tamannami aamma nunatsinni
misigineqartarmat.
Tilioq festival: Live, Laugh Leave no one behind!
Inuit innarluutillit illersuisoqarfiat Tilioq Nuummiut festivalimut Katuami ingerlanneqartussami arfininngornermi apriilip 30-ani qaaqquai: Live, Laugh, Leave no one behind. nunatsinni inuit innarluutillit peqatigiiffii kattuffiiilu peqataassapput, inuit innarluutillit oqariartuuteqassapput, ilisimasallit saqqummiillutik kiisalu inuit innarluutillit suliaannik tuniniaasoqassalluni.
