Innarluuteqarneq aamma angerlarsimaffeqannginneq

Kalaallit Nunaanni inuit innarluutillit inuuniarnermikkut ilungersunartorsiornissamut aarlerinartorsiortut tassaangajupput aamma angerlarsimaffeerunnissaminnut aarlerinartorsiortut. Tamannalu pinaveersartitsinikkut kiisalu eqqortumik ikiuinikkut pinngitsoortinneqarsinnaavoq.

-Angerlarsimaffeqanngitsut eqqartorneqartillugit aamma inuit innarluutillit eqqarsaatigineqartarnissaat pingaaruteqarpoq, tassami inuit innarluutillit inuuniarnermikkut ilungersunartorsiuleratarsinnaapput, eqqortumik piffissaangallartillugu ikiorneqanngippata, Inuit innarluutillit illersuisuat Christina Johnsen oqarpoq, taanna Isumaginninnermut Naalakkersuisoqarfiup aaqqissugaanik angerlarsimaffeqanngitsut pillugit ataatsimiisitsinerani februaarip 26-ani peqataavoq.

Tilioq nunatsinni innuttaasunit innarluutilinnit saaffigineqartarpoq, taakkulu angerlarsimaffeqarniarneq eqqarsaatigalugu ajornartorsiuteqartarput imaluunniit angerlarsimaffeerussimasarlutik.

Akiitsut aamma angerlarsimaffeqannginneq tassaapput Tiliumut 2019-imi saaffiginissutigineqartartut pingajorarterutaat. Saaffiginnittut katillugit 209-iusut taakkunannga 45t angerlarsimaffeqarniarnermut tunngassuteqarput. Taakkunani 21t angerlarsimaffeqannginnermut aamma akiitsoqarneq tunngavigalugu angerlarsimaffeerunnissamut aarlerinartorsiornermut tunngassuteqarlutik. Akiitsoqalersarneq kommunimi sulianik ingerlatsinerup sivisussusaanik aamma siusinaartumik sulisinnaajunnaarnermusiaqalernermik imaluunniit inuit sulilerseqqinniarneqartillugit ikiuutinut tunngaveqartarput. Utaqqisoqarnerata nalaani inuk innarluutilik isertitaqanngivissortarpoq aamma suliffittaarsinnaasarani, taamaattoqarneranilu akiitsoqalersoqartarpoq, soorlu INI-mut.

-Ataatsimiinnermi uteqattaarneqarpoq inuit angerlarsimaffeeruttartut amerlanerpaartaat tarnikkut naalliuuteqartartut ilungersuuteqarlutillu. Tamanna Tiliumit ilisarisinnaavarput. Tusartuartarpagut inuit A1-mit aninerminni angerlarsimaffeqanngitsunut unnuisarfinnut innersuunneqartartut. Aamma inuit namminneq imminnut nakorsaasersortartut ikiaroormartumik aanngajaarniutinillu atuisartut paasisaqarfgisarpagut. Taamatullu imminut nakorsaasersortarneq atornerluisunngornermik kinguneqartarpoq. Tamanna akiitsoqalernermik kinguneqartarpoq, inuillu innarluutillit aqqusiniinnarmut anisinneqartarput, Christina Johnsen oqarpoq.

Ajornartorsiutigineqartut eqqortumik periuseqarnikkut pinaveersaartinneqarsinnaapput, kommunini pitsaanerusumik sukkanerusumillu sulianik ingerlatsisoqartalerpat, socialboligit amerlanerit sanaartoqarneratigut, inunnut innarluutilinnut naleqqussakkanik katsorsaariaaseqartoqarneratigut, inunnut tarnikkut silassorissutsimikkullu innarluutilinnut eqqortumik piaartumillu ikiuisoqarneratigut tassaapput iliuuserineqarsinnaasut inuit innarluutillit angerlarsimaffeqannginnerannik ajornartorsiut qaangerneqassappat.

Ataatsimiinnerup nalaani inuit innarluutillit illersuisuat Christina Johnsen, angerlarsimaffeqanngitsuuneq pillugu ilisimasalinnut aamma ilaasortaasoq, siunnersuisarfimmit Socialt Udviklingscenterimit (SUS)-imit itinerusumik apersorneqarpoq, taakku nunatsinni angerlarsimaffeqannginneq annertunerusumik qulaajaaffiginiarpaat.