Tiliup iliuusissatut pilersaarutaa
Suliassat
Tiliup inuit innarluutillit pisinnaatitaaffiisa eqqortinneqarnissaat suliniutigaa, taamaalillutik allat naligalugit ataqqinartumik inuuneqarniassammata.
Tilioq peqataatitsinermik suleriuseqarluni inuit innarluutillit isumaasa tusarneqarnissaat qulakkeerniarlugu inuiaqatigiinni oqallinnermi inuit innarluutillit atugaat oqariartuugisarpai.
Tilioq inuit innarluutillit pillugit politikkiliornermi, kommunini nunalu tamakkerlugu, suleqataarusuppoq, soorlu aamma ilisimasanik suliaqartuullunilu katersiffiuniartoq, inuillu innarluutillit pisinnaatitaaffii tamatigoortunngortinneqarnissaannut nuna tamakkerlugu kommuninilumi politikkiliortoqarnerani eqqarsaatigineqartarnissaat qulakkeerumavai.
Takorluugaq
Inuiaqatigiit inuit innarluutillit pisinnaatitaaffii pillugit FN-imi isumaqatigiissut malissagaat.
Naleqartitat
Tilioq inuit innarluutillit inuiaqatigiinni atugaannik pisinnaatitaaffiinillu siuarsaanermini peqataatitserusuppoq, ataqqinnikkusuppoq tatiginartoorusullunilu.
Inuit innarluutillit, sulianik suliaqartut soqutigisaqartullu suliamut attuumasuteqartut ulluinnarni ajortorsiutigisaminnik isumaasa tusarnissaat pingaartipparput, taamaalilluni ilisimasanik assigiinngiiaartunik tunngaveqartitsisoqalerniassammat. Inuit innarluutillit isumaasa inuiaqatigiinni oqallinnermi tusarneqarnissaat qulakkeerniarlugu inuit innarluutillit peqataatinneqarnissaat suleqatiginissaallu pingaartipparput.
Inuit innarluutillit atugaannik pisinnaatitaaffiinillu ilisimasaqarneq allannguinissamut tunngaviuvoq. Tiliumit nalunaarutitta uppernartuunissaat pingaartipparput, taamaammallu ilisimasat tunngavigalugit suleriuseqarnissaq suliatsinni tamani malittarissavarput.
Ataqqinninneq Tiliup sulinerani marlunnik isumaqarpoq. Inunnut ataasiakkaanut ataqqinninneq kikkullu tamarmik inuiaqatigiinnut taperseeqataasinnaanerannik upperinninneq aamma inuiaqatigiinnik avatangiisigisatsinnik suleqateqarnitsinni attaveqartarnitsinnilu ataqqinnilluni suleriaaseqarneq. Inuit ataasiakkaat inuiaqatigiillu ataqqinnilluta naapittassavagut.
Iliuusissatut pilersaaruteqarfiit ukiut 2021-2023
Inuit innarluutillit illersuisuat aamma inuit innarluutillit illersuisoqarfiata peqatigiillutik iliuusissatut pilersaaruteqarfik 2021-2023 aalajangiiffigaat.
Inuit innarluutillit illersuisuat pillugu inatsisartut inatsisaat nr. 1 29.maj 2017-imeersoq naapertorlugu, kiisalu inuit innarluutillit illersuisuata aamma Tiliup ukiuni 2017-imiit 2020-imut misilittagai iliuusissat ilusilerneqarput. Inuit innarluutillit peqatigiiffii aamma kattuffii iliuusissatut pilersaarummi sammisassanut isummersortinneqarput.
Sammisaqarnermi isiginiagassat
Tiliup immikkoortut pingaarnerit pingasut inuiaqatigiinni peqataatitsinissap assigiinnillu periarfissaqarnissap qulakkeerneqarnissaanut tunngatillugu pingaaruteqarmata isiginiassavai.
Ilinniagaqarnissamut, peqqissuunissamut suliffeqarnissamullu assigiimmik periarfissaqarnerit inuit innarluutillit allat tamaasa naligalugit inuuneqarnissaasa qulakkernissaanut pingaaruteqarput.
Tiliup inuit innarluutillit pillugit tamanik isiginnilluni ataqatigiissaarillunilu suliniuteqarnissap pingaaruteqassusia sammineqalersissavaa.
Periusissiornermi 2021-2023-imi anguniakkat:
- Tiliup peqqissuusinnaatitaanerup, ilinniagaqarsinnaatitaanerup suliffeqarsinnaatitaanerullu qanoq annertutigisumik eqqortinneqarnerat aamma inuit innarluutillit taamatut pisinnaatiffinnik tamakkuninnga atuisinnaanerannut aporfissat suut ajoqutaanersut qulaajassavai.
- Tiliup peqqissuunissamut, ilinniagaqarnissamut suliffeqarnissamullu suleriuseqarnermut immikkoortullu taakku pingasut akornanni ataqatigiissaarinermut assersuutitsiliaat erseqqissassavai ineriartortillugillu.
Inuiaqatigiinni immikkoortut tamarmik pissarsiarineqarsinnaassapput tikinneqarsinnaallutik atorneqarsinnaasunngorlugillu aaqqissugaanissaat sulissutigissavarput. Assersuutigalugu angalanermut attaveqaatinullu tunngatillugu pissarsiarinnissinnaaneq tikitsisinnaaneq atuisnnaanerlu, aammali digitalinngorlugu inuillu attaveqaqatigiittarneranni taakku tamarmik ajornaatsumik pissarsiarineqarsinnaasariaqarput.
Tikikkuminassuseq eqqartorneqartillugu, inuiaqatigiinni immikkoortuni tamani inuit innarluutillit namminerisamik inuuneqarnissaannut pissarsiarineqarsinnaasut, tikinneqarsinnaasut, atuisutulli allatuulli periarfissaanni aporfiit piianeqarnissaat eqqarsaatigineqarpoq.
Periusissiornermi 2021-2023-imi anguniakkat
- Tiliup allaffiata kiisalu aaqqissugaanerata, digitalimi inuillu attaveqaqatigiittarneranni tikikkuminartuunissaa, pissarsiarineqarsinnaanissaalu suliniutigissavaa
- Inuiaqatigiinni tikikkuminassuseq pissarsiarinnissinnaanerlu sammineqartillugit paasinninnerulernissaq, aammali tikikkuminassutsip pissarsiaqarsinnaassutsillu qulakkeernissaannut qanoq iliuuseqartorneqarsinnaaneranik ilisimasaqalerneq.
- Periusissiat politikkikkut aalajangerneqartut ajornartoornerni pissarsiarineqarsinnaanissaat suliniutigissavarput
- Tamat oqartussaaqataaneranni tamakkiisumik pissarsiarinnissinnaanerup peqataatinneqarnissap atuisinnaanissallu qulakkeerneqarnissaat suliniutigissavagut (qinersinerit, paasissutissat paasiuminartut)
Periaaseqarluni isiginiagassat
Tiliup nuna tamakkerlugu kommuninilu politikkikkut ingerlatsinerni suliani naleqquttuni tamani innarluuteqarnerup eqqarsaatigineqarnissaa suliniutiginiarpaa. Tiliup tamanna qulakkeerniarlugu naalakkersuisoqarfinni, aqutsisoqarfinni kommuninilu suli annertunerusumik suleqatigiinnissap attaveqarfeqarnissarlu sulissutiginiarpaa.
Tilioq taakkuninnga attaveqarfeqarnermigut nuna tamakkerlugu kommuninilu periusissiassanut iliuusissatullu pilersaarutit pillugit suleqatigiissitaliani, siunnersuisoqatigiinni, tusarniaanerni peqataatinneqarusuppoq, taamaalilunillu innarluuteqarneq suliniutini tamani eqqarsaatigineqartarnissaa qulakkiissallugu.
Periusissiornermi 2021- 2023-imi anguniakkat:
- Politikkikkut ingerlatsinerni suleqatigerusunneqarnissarput suleqatitullu isigineqarnissarput suliniutiginiarparput
- Kommunini nunalu tamakkerlugu inunnik innarluutilinnik sullissinerni inunnik pingaaruteqartunik oqaloqateqartarneq/aalajangersimasumik ataatsimeeqateqartarneq
- Kommunini politikkikkut ingerlatsinerni annertunerusumik sunniuteqarnissarput politikkikkullu suleqatitut isigineqarnissarput aamma sulisoqarfinni inuit innarluutillit pillugit inatsisip aamma inuit innarluutillit pillugit isumaqatigissutip malinneqarnissaa suliniutiginiarparput
- Inuit innarluutillit pillugit politikkimi pingaarnertut sammiveqartitsisoqarnissaa qitiutitsisoqarnissaalu suliniutiginiarparput – Inuit innarluutillit pillugit isumaqatigiissutip politikkikkut ingerlatsinerni suliani naleqquttuni tamani ilanngunneqarnissaa
Inuit Innarluutillit pisinnaatitaaffiilu qulakkeerniarlugit inuiaqatigiinni ingerlatsiviit ataatsimoortut tamakkuninnga isiginninniartut pisariaqartinneqarput.
Tamakku tassaapput sulisut kattuffii, soqutigisaqaqatigiit, inuit innarluutillit peqatigiiffii inuillu isummersortartut, soqutigisaqartut tamakku tamarmik tamanna naleqqukkaangat inuit innarluutillit pillugit politikkimi pissutsit sulinerminni eqqarsaatigisassavaat.
Tiliup inuiaqatigiinni ingerlatsiviit inuillu innarluutillit pillugit politikkimi sammisanik suliaminnut tunngasunik paasiniaasarnissaat suliniutiginiarpaa tamakkulu iliuuseqarfiginissaannut ikiorlugit.
Periusissiornermi 2021-2023-imi anguniakkat:
- Nuna tamakkerlugu najukkanilu inuit innarluutillit peqatigiiffiisa peqataatinneqartarnissaannik Tiliup sulinerani aalajangersimasumik suleriuseqartitsilerniarpugut
- Inuiaqatigiinni ingerlatsiviit inuit innarluutillit pillugit politikkimik ilanngussisarnissaat qulakkeerniarparput (sulisut kattuffiini, soqutigisaqaqatigiinni il.il)
- Peqatigiiffiit inuillu inuit innarluutillit atugaannik atugassaritinneqartunillu pitsanngorsaasut tapersersorniarpagut suleqatigalugillu
Tilioq innarluuteqarneq pillugu aaqqissuussamik ilisimasaqalersitsiniarpoq aamma oqartussat soqutigisaqartullu allat taamatut iliornissaannik suliniuteqarniarluni isummersuillunilu.
Tilioq inuit innarluutillit atugaannik uppernarsaasiorniarpoq tamakkulu inuit innarluutillit pillugit isumaqatigiissummut sanilliullugit nalilersorlugit, oqartussallu inatsisit suliamut attuumassuteqartut malinneraat uppernarsaasiussalluni, soorlu inuit innarluutillit tapersersorneqarnissaat pillugu inatsit, siusinaartumik soraarnerussutisiaqarneq, ilinniartitaaneq il.il. pillugit inatsisit.
Periusissiornermi 2021- 2023 anguniakkat:
- Innarluuteqarneq pillugu ilisimasanik sumi amigaateqartoqarnersoq paasiniarniarparput ilisimasaqalersitsillutalu
- Pisortani oqartussat (politikkimik ingerlatsinermut tunngatinneqarnerusinnaasumik, innarluuteqrneq pillugu ilisimasaqalersitsiniarpugut, ilisimasanik katersiniarpugut tamakkulu ataqatigiissilerlugit aaqqissuullugit
- Innarluuteqarneq pillugu ilisimaaqartitsilerniarluta sulisoqarfinnik soqutigisaqartunillu ilisimasaqartunik suleqateqarniarpugut
- Inuit innarluutillit pillugit isumaqatigiissutip inatsisillu inunnut innarluutilinnut atuuttut malinneqarnerannik uppernarsaasiorniarpugut
Tiliup inuk siulliullugu takusarpaa, inullu innarluutilik inuttut ilivitsutut isigisarlugu. Innuttaasut tamarmik inuit innarluutillit naligiimmik innuttaasutut allat naligalugit pisinnaatitaaffeqartutut isigissavaat.
Inuit innarluutillit inuiaqatigiinni isumalluutitut isigineqassapput, inuillu innarluutillit naligiimmik innuttaaqataasutut isumalluutaalluartutut imminnut isigissapput.
Tiliop suliaqarfini aqqutigalugit inuiaqatigiinni inunnut innarluutilinnut isummanik allannguiniassaaq aamma inuit innarluutillit innarluuteqarnermullu tunngasunik ilisimasanik ajornannginnerusumik pissariaqarsinnaaneq sulissutigissallugu.
Periusissiornermi 2021-2023-imi anguniakkat:
- Tiliup taamaammat inuit innarluutillit pillugit innarluuteqarnerlu pillugu suliamik ingerlatsinermi paasiuminartumik ilisimasaqarnerulersitsinissaq suliutigissavai.
- Immikkoortitsinnginnissaq pillugu inatsimmik inunnik innarluutilinnik immikkoortitsisarnermut inerteqquteqarnermik imaqartumik aalajangiisoqarnissaa suliniutigissavarput.
- Tiliup inuit innarluutillit pisinnaatitaaffii nammineq pisinnatitaaffiit innuttaaqataasulluunniit pisinnaatitaaffii unioqqutinneqarpata iliuuseqarnissamut suut periarfissaanersut pillugit qaammarsaanerup ingerlatitseqqiisarnerullu annertusarnissaat suliniutigissavaa.
Tiliup 2021-mi ukiunilu tulliuttuni suliniuteqarfissai
Tiliup peqatigiiffinnut, kattuffinnut, isummersortartunut, aalajangiisartunut soqutigisaqatigiinnullu attaveqartarninni ukiuni aggersuni tulliuttuni suliniutigiuassavaa.
Innarluuteqarneq qitiutillugu oqallisigineqarnerusariaqarpoq. Kommunimullu ukioq manna qinersisoqarnissaanut atatillugu innarluuteqarneq qitiutillugu aaqqissueqataasassaagut. Nunatsinni Inuit Innarluutillit Kattuffiat NIIK suleqatigalugu sineriammi inuit innarluutillit peqatigiiffiisa aamma siunnersuisoqatigiivisa iluaqutigisinnaasaannik inuit innarluutillit naligiimmik pisinnaatitaaffeqarneri pillugit paasissutissanik suliaqassuugut.
Tiliup suliniuteqarnermini sumiiffinni assigiinngitsuni inuit innarluutillit peqatigiiffiinik aamma kattuffiinik suleqateqarneq peqataatitsinerlu pingaartilluinnarpaa. Peqatigiiffinniillu nutaanik suleqatigiissutigineqarsinnaasunik ukuni aggersuni ingerlataqassuugut. Tamannalu ukiup ingerlanera aalajangersimasumik ataatsimeeqatigiittarnikkut aaqqissorneqassapput, ataatsimeeqatigiinnernilu suliniutissanik iliuusissanik ineriartortitsisoqartassaaq.
Inuusuttulli innarluutillit tusakulaneqarpallaartanngillat. Suut inuusuttut uummammioraat? Atuartuunertik qanoq misigisaqarfigaat? Ilinniaqqinneq aamma inuiaqatigiinni peqataaneq qanoq atugaqarfigaat? Kalaallit Nunaannilu siunissami suut ineriartortinneqarnissaat takorloorpaat? Inuusuttut innarluutillit Tiliumiit 2020-mi ukiakkut sammineqarput, inuusuttullu uummammiullit sammineqarnerat 2021-imi nangeqqissallugit. Allallu suliniutit ukiuni aggersuni ingerlanneqarumaarput.
Periusissiaq ukiut siuliini malinneqarsimasoq anguniakkatullu suliaqarfiusimasut pillugit ataani atuarsinnaavutit:
Periusissiaq 2019-2020
Inuit innarluutillit illersuisuata Christina Johnsenip aamma Inuit innarluutillit illersuisoaqarfiata allatseqarfianit periusissiaq 2019-2020-mut atuuttussami samminiakkat aalajangerneqarput.
Periusissiami Inuit innarluutillit illersuisuat pillugu Inatsisartut inatsisaat nr. 1, 29.maj 2017-meersoq kiisalu inuit innarluutillit illersuisuata ukiuni kingullerni misilittagariligai aallaavigineqarput, inuit innarluutillit illersuisoqarfiat pillugu misissueqqissaarnerit aamma inuiaqatigiinni pissutsit inunnut innarluutilinnut sunniuteqartut misissuataarneri aallaavigineqarlutik.
Periusissiami ukiuni marlunni atuuttussaavoq, tamannalu inuit innarluutillit illersuisuata atorfiata sivisussusaanut naapertuivoq.
Inuit innarluutillit pillugit ilisimasat pitsaasumik ilusilersukkat killeqarput. Inuit innarluutillit atugaat pillugit ilisimasat nalunaarusianik tamakkiisuunngitsunik kiisalu amingaateqaqisunik imalinnik aamma inuit innarluutillit namminneq saaffiginninnikkut oqaluttuarisartagaannik kiisalu inuit innarluutillit peqatigiiffiisa oqariartuutigisartagaannik tunngaveqarput.
Paasissutissaateqannginneq ilisimasaqannginnerlu kalaallit inuiaqatigiit akornanni isummanik nutaartaqanngitsunik pigiliutiinnakkanillu pilersitsisarput. Ilisimasanik takussutissartalinnik annertunerusumik pigisaqalernikkut inunnut innarluutilinnut unammillernartut anginerit inissinneqarsinnaapput.
Tiliumut innuttaasut saaffiginnissutigisartagaasa tikkuarpaat inuit innarluutillit, qanigisaasa, sullissisuisalu inuit innarluutillit pisinnaatitaaffii pillugit isumaqatigiissut annikitsuinnarmik ilisimaneqarpoq, pisinnaatitaaffiillu pillugit ilisimasat killeqartut.
Inuillu innarluutillit misigisarpaat pigiliutiinnakkanik isummanik aallaveqartunik naapinneqartarneq kiisalu inuit innarluutillit pillugit aalajangiuterikkanik isumaliortaaseqartoqartoq.
Periusissiami anguniagassat:
- Inuit innarluutillit atugaallu pillugit annertunerusumik tunngavissalinnik takussutissalinnillu paasissutissanik pilersitsineq.
- Inuiaqatigiinni inuit innarluutillit, inuunerat atugaallu pillugit paasissutissat ilisimasallu annertunerusut.
- Inuit innarluutillit, qanigisaat kiisalu sullissisut inuit innarluutillit pisinnaatitaaffiinik ilisimasaqarnerulernissaat.
Inuit innarluutillit pisinnaatitaaffii pillugit isumaqatigiissummi immikkoortortat arlallit Kalaallit Nunaanni suli maannakkumut malikkuminaatsinneqarput.
Inuit innarluutillit pisinnaatitaaffii eqquutsinneqartanngillat naak poltikikkut suliniartoqaraluartoq aamma inunnut innarluutilinnut peqatigiiffiit tunniusimallutik suliaqarluartaraluartut. inuit innarluutillit atugaat pitsanngorarneqassappata taava politikikkut siamasissumik kajumittumik soqutiginnittoqartariaqarpoq, aamma oqartussat tamarmik, kattuffiit, peqatigiiffiit, siunnersuisoqatigiit aalajangiisartullu suleqatigiittariaqarput misilittakkaminnik ilisimasaminnillu avitseqatigiittariaqarlutik.
Tiliumit taamatut suleqatigiinnissaq peqataaffigalugulu nukittorsarumavarput.
Periusissiami anguniagassat:
- Tiliumit suleqatigiinneq aqqutigalugu inuiaqatigiit peqatigiiffinnut, kattuffinnut, siunnersuisoqatigiinnut kiisalu aalajangiisartunut attaveqatigiinneq nukittorsarusuppaa.
- Tiliumit politikikkut aalajangiisartut, oqartussat aamma nunatsinni nunanilu allani institutionit akornanni attaveqatigiinneq pitsanngorsaavigeqataarusuppaa.
Inuit innarluutillit suliffeqartut pillugit kisitsisit erseqqissut pigineqanngillat, Tiliumiilli ilimagineqarluinnarpoq taakku amerlavallaanngitsut.
Taamatut ilimasunnerput kommunimi sullissisunik, inunnik innarluutilinnik kiisalu inuit innarluutillit peqatigiiffiinik naapitaqartarnitsinnit tunngaveqarpoq. Suliffeqarneq inuiaqatigiit aningaasaqarneranut iluaqutaaginnarani aammali inuunerup pitsaassusianut kiisalu nammineq aalajangiisinnaanissamut periarfissamut iluaqutaaginnanngilaq aammali inuiaqatigiinnut akuunani mattunnissaraluamut pinngitsoortitsissaaq.
Inuiaqatigiinnilu aamma suleqatigiit akornanni innqarluuteqarneq pillugu annerusumik paasinnittoqalissaaq taamatullu pigiliutiinnakkanik isummanik annikillisaasoqassalluni. Tiliumit inuit innarluutillit sulilernissaannut periarfissaqalernissaat suliniutigineqartuassaaq.
Taamatut siunertaqarnermi imaassanngilaq inuit innarluutillit pinngitsaalillugit sulilersinniarneqassasut, ima innarluuteqartigippata sulisinnaanatik. Tiliumit sulissutigineqarniarpoq suliffeqarnermi inuit innarluutillit inissaqartinneqarnissaat, soorlu nikittaartumik sulisinnaanikkut, suliffiillu nikerartut pilersinneratigut. Tilioq isumaqarpoq kikkut tamarmik tunniussassaqartut.
Periusissiami anguniagassat:
- Tiliumiit suliniutigienqarpoq suliffeqarnermi inuit tamarmik inissaqartitsinenqarnissaat.
- Tiliumiit anguniagaavoq inuit innarluutillit sulilerniarneranni akimmiffiit piiarneqassasut.
Inuit innarluutillit sumiiffimminut Sisimiunuinnaq atuutinngilaq. Kalaallit Nunaata inuit innarluutillit illersuisoraat. Tiliumut pingaaruteqarpoq inuit innarluutillit, qanigisaat sullissisuilu sineriammi sumiluunniit tikillugit oqaloqatigisinnaanissaat.
Tilioq sulinermini najukkani pissutsit misigineqartartullu ilannguttarlugit suliniarpoq. taamatut Tiliumi ilisimasat aamma suliat pitsanngorsarneqassapput, tasssami Kalaallit Nunaanni innarluuteqarneq aamma inuuneq pillugit assigiinngiiartumik paasisaqarnermik kinguneqassammat.
Tiliumit ilisimasat annertusarneqarusupput, tamannami inuit innarluutillit Kalaallit Nunaanni inuunerannik assigiinngissitsaartumik paasissutissanik pigisaqalersitsissammat, Tiliumiit sineriammi unammillernartutut takusat tusakkallu politikkikkut aalajangiiffigineqarnissaat suliniutigissavai, unammillernartinneqartullu nunatsinni nunanilu allani saqqummilaarnerusumik oqariartuutigisassallugit.
Periusissiami anguniagassat:
- Inuit innarluutillit atugaat pillugit paasisaqarniarnermi Tilioq ukiut tamaasa minnerpaamut kommunimut ataatsimut paasisassarsiorluni angalasassaaq.
- Nunatsinni najukkanilu innarluuteqarnermut politikkimik pilersitsisoqarnissaanik Tilioq suliniuteqassaaq.
Meeqqat innarluutillit meeqqat atuarfiannit ilinniagaqalissutaasinnaasumik inaarutaasumik misilitsittartut qanoq amerlatiginersut maannakkut erseqqissumik kisitsisaatigineqanngillat, imaluunniit inuit innarluutillit qanoq amerlatigisut ilinniakkamik naammassinnissimanersut kisitsisaatigineqanngillat.
Tilioq arlalinnit saaffigineqartarpoq, saaffiginnittuniillu oqariartuutigineqarpoq ilinniartitaanermi unammillernatorpassuaqartoq. Immikkut atuartitsisinnaasunik amingaateqartoqarpoq, ilisimasanut ikiuutinullu periarfissat amingarput, taakkuuppullu inuit innarluutillit allat assigalugit ilinniagaqarnissaannut tunngavissiisussaangaluit.
Periusissiami anguniagassat:
- Ilinniartitaanermi inunnut innarluutilinnut akimmiffiunerpaasartut qulaajarlugit.
- Tiliumit anguniagaavoq inuit innarluutillit ilinniagaqarsinnaalernissaat.
Inunnut innarluutilinnut susassaqarfik isumaginninnermut tunngasunuinnaq attuumassuteqanngilaq. Inunngornermi inuunerulluunniit ingerlanerani innarluuteqalertoqarsinnaavoq, innarluut ukioqanngilaq.
Innuttaasut innarluutillit ikiorneqarnissaminnut pisinnaatitaaffiata malinneqarnissaa qulakkeerneqassappat, oqartussat, najukkami nunamilu tamarmi institutionit ataatsimoorlutik anguniagaqarlutillu siunnerfeqartariaqarput, taamaasillutik innarluuteqarnermi tamakkiisumik suliniuteqartoqarsinnaaniassammat, inunngornermiit toqunissap tungaanut.
Inuit innarluutillit pisinnaatitaaffiisa malinneqarnissaat qulakkeerniarlugit oqartussat akimorlugit tamakkiisumik siunissamullu isigisumik pilersaarusiortoqartariaqarpoq.
Periusissiami anguniagassat:
- Tilioq nuna tamakkerlugu innarluuteqarneq pillugu politikkikkut iliuusissatut pilersaarusiortoqarnissaanut suliniassaaq aamma ilusilersorneqarnissaanut tapersiissaaq.