Naalakkersuisoqatigiit isumaqatigiissutaat: Inuit innarluutillit oqaatsimik ataatsimik taaneqanngillat

Inuit innarluutillit illersuisuata Anja Hynne Nielsenip ajuusaarutigaa Inuit Ataqatigiit aamma Siumut naalakkersuisoqatigiinnissamut isumaqatigiissutaanni innarluuteqarneq ilanngunneqanngimmat. -Puigortoornerunerpa imaluunniit naalakkersuisut innarluuteqarnermut tunngasumi siunertaqarsimanngillat?

-Naalakkersuisoqatigiinnissamut isumaqatigiissut nutaaq takujumallugu naalakkersuisut siulittaasuata naalakkersuisoqarfiannut pissarsiareqqammerparput, taannami suli naalakkersuisut.gl-imi takuneqarsinnaanngilaq. Inuit Ataqatigiit aamma Siumut Isumaqatigiissutaat naatsunnguuvoq. Maluginiarparput inuit innarluutillit, inuit innarluutillit pisinnaatitaaffii aamma innarluuteqarnermut susassaqartut oqaatsimik ataatsimilluunniit taaneqanngimmata. Inuit Ataqatigiit aamma Naleqqap ukioq kingulleq naalakkersuisoqatigiinnissamut isumaqatigiissutaanni immikkoortumik innarluuteqarnermut tunngasunik suliassat allaaserineqarput aamma Tiliup aningaasaqarnera naleqquttuusariaqartoq taaneqarluni.

Naalakkersuisoqatigiit isumaqatigiissutigisimasaat ima imaqarpoq: 

Inuit innarluutillit

Inuit innarluutillit innorluutillillu nunatsinni allatulli ilinniagaqarnissamut suliffeqarnissamut najugaqarnissamullu pisinnaatitaaffeqarput. Naalakkersuisoqatigiit isumaqatigiissutigaat inuit innarluutillit pillugit inatsit nalilersoqqinneqasasoq, taamaaliornikkut inatsimmi massakkut atuuttumi aaqqitassat allanngortitassallu qulaajarneqassammata. Inuit innarluutillit illersuisuata sulinermini aningaasatigut sinaakkutigisaasa naapertuunnerusunngortinneqarnissaat naalakkersuisoqatigiit isumaqatigiissutigaat. Inuit innarluutillit illersuisuata nalunaarusiamini innersuussutai naalakkersuinikkut malitseqartinnissaat siunertaralugu kommunit peqatigalugit pilersaarusiorneqassapput.

Ukioq 2022 Innarluuteqarnermut susasaqarfimmut pingaaruteqarpoq

Naalakkersuisut pisussaaffilerneqarnikuupput inuit innarluuutillit pisinnaatitaaffii pillugit naalagaaffiit peqatigiit isumaqatigiissutaannik Kalaallit Nunaata eqquutitsinera pillugu qulajaassasut, tamatumalu kingorna iliuusissatut pilersaarusiussasut.

Pilersaarutaavoq qulaajaaneq maajip qiteqqunnerani saqqummiunneqassasoq, tamatumalu kingorna iliuusissatut pilersaarusiortoqassasoq.

Tiliumiit kiisalu inuit innarluutillit peqatigiiffiinit kattuffiiniillu ukiuni kingullerni inuit innarluutillit tapersersorneqarnissaannut inatsisip atuutsinniarneqarnerata ajornartorsiutigineqarnera arlaleriarluta oqariartuutigisarparput. Taamaattumik innarluuteqarnermut tunngasuni anguniakkat kiisalu iliuusissatut pilersaarutissap pitsaasuunissaat pingaaruteqarput- ila naalakkersuisut suliassaqarfimmut pitsanngorsaaniarlutik siunertaqarpat?

-Naalakkersuisoqatigiit isumaqatigiissutaanni innarluuteqarneq sammineqanngimmat tamanna inuit innarluutillit illersuisuattut isumakulunnartoqartippara. Tassami pineqartut inuit ulluinnarni pisinnaatitaaffitik naapertorlugit allatuulli inuuneqarniarnissaminnut sukataaruteqartuartuupput aamma eqqortumik ikiorneqarnissamut tapersersorneqarnissamullu ilungersuuteqartuartuupput. Ila neriuppunga naalakkersuisoqatigiit isumaqatigiissutaanni taaneqanngimmata tamanna puigortoornerinnaasoq, naalakkersuisullu tamanna aaqqiviginiarlugu innarluuteqarnermut tunngasunik politikkikkut anginiakkaminnik oqariartuuteqassasut, taavalu inuit innarluutillit atugaat pitsanngorsarumallugit qanoq iliuuseqassanerlutik oqariartuuteqarlutik.

Naleqassuseq– Kisianni kikkut?

Kalaallit Nunaata Naalagaaffiit Peqatigiit inuit innarluutillit pisinnaatitaaffii pillugit isumaqatigiissutaat 2012-imi atuutilersippaat, mannali tikillugu inuit innarluutillit allatuullit pineqartarnissaat qulakkeerniarlugu suli inatsisiliortoqanngilaq, tassami inuit innarluutillit assigiinngisinneqartannginnissaannut inatsiseqanngimmat.

- Kusanarpoq naalakkersuisoqatigiinnissamut isumaqatigiissummi tamat naleqassusaat isiginiarneqarmat, uani soorlu suliffeqarnermi aamma inuuniarnermi, tamat oqartussaaqataatinneqarlutik aqutsinermi aamma inatsisiliornermi, kisianni inuiaqatigiinni eqimattat immikkut isiginiarneqarpata kiisalu inuiaqatigiinni ikinnerussuteqartut amerlasuut tassaasut inuit innarluutillit mininneqarpata, allaanngilaq immikkoortinneqartut, naalakkersuisut qinnuigissavagut, taama pisoqarnera piaarinerunersoq erseqqissaaqqullugit