Sunngiffimmi inuuneqarnissamik periarfissaqannginneq aaqqinneqarsinnaavoq: Qaammarsaanikkut

Karina Rasmussen ukiut 30-t matuma siornagut inunngorami erlavii aneerput, taamaalilluni anersaartuutilerneqarluni. Taamaaliornerup isigisinnaanermut sianiutaa innarlerpaa, taamaalilluni ullumikkut isoriattumik isigisaqarluni, isaa saamerleq-6,50-iulluni talerperlerlu -6,75-iulluni. Ukioqqortusiartornerani tamanna ajorseriarsinnaavoq. Taamaattoq oqalutsitut
nutserisusullu ilinniarnissaminut akornuteqarsimanngilaq kingornalu Sisimiuni Qeqqata Kommuniani tamakkiisumik
suliffeqalerluni.

– Misigisimanngisaannarpunga isikkut innarluuteqarnera aporfiusoq, Karina oqarpoq. Nangilluni oqarpoq, ikinngutiminit,
ilaquttaminit sulisitsisuminillu annertuumik tapersersorneqarsimanini pingaartupilussuusimasoq.

Sunngiffimminili sammisaqarnerorusuppoq. Angerlarsimaffimmini ikinngutini ilaquttanilu peqatigalugit nissiaasartupilussuuvoq, uumasuutinilu peqatigiilluartarlugu. Angerlarsimaffiulli avataani sammisaqarnerorusuppoq.
– Kissaatiginartikkaluarpara sumiiffimmik qaamaneqarluartumik imaluunniit sumiiffinnut tikikkuminartunut ornigussinnaanissara, angalaffigiuminartunut, oqarpoq.

Taamaallaat sunngiffimmi sammisassat peqataaffiginissaat ajornakusoorsinnaavoq. Aamma ulluinnarni sammisassat
nalinginnaasut. Sisimiuni peroriartorsimagami qujanartumik illoqarfimmi angalaarnissaq ajornakusoortinngilaa, isumaqarporli lloqarfimmi suliffeqarfiit niuartarfiillu atuisut innarluutillit eqqarsaatigineq ajoraat.

– Assersuutigalugu ilaannikkut Tele- Postimi poortukkanik aallertariaqartarpunga, taannalu inunnut isigisaqarnermik
innarluuteqartunut naleqqussagaanngilaq. Allassimasut naqinneri mikisuararsuusarput. Atorfissaqartissinnaavara
soorlu timersortarfimmi Taseralimmiluunniit allassimasut angissutsimikkut naleqqussarneqarnissaat, taamaalillutik
atuaruminarnerullutik, Karina oqarpoq.

IsumassarsiatAssersuutigalugu silami pitsaanerusumik qaamaqquteqarpat Karina Rasmussen suliffimmi kingorna pisussinnaavoq,
qularinngilaalu taamaattoqartuuppat sunngiffimmi sammisaqarnissaminut kajuminnerussagaluarluni. Sammisassaminik
nassaareersimagaluarpoq.
– Assersuutigalugu pingasunngornerit tamaasa Umiartortut Angerlarsimaffiani qilattaasartut klubbeqarput, qaamaqqutaalli
isinnut ajorpallaaqimmata ornigukkusunngilanga, isikka qaasutiinnassagakkit, oqaluttuarpoq.

Taamaattumik isumaqaraluarluni isiginiarnikkut innarluutini aporfiunngitsoq taamaattoq inuunerini arlaanik toqqagaqanngilaq. – Taamaaliortariaqarpunga, oqarpoq. Karina tapiitsut isigiarsuttullu peqatigiiffiani
ISI-mi aamma ilaasortaasoq kissaateqaraluarpoq innuttaasunut tamanut paasititsiniaasoqarnissaa, taamaalillutik
inuit tamamik innarluutinik assigiinngitsunik qaammaassaqalerlutik.

Inuit innarluutit pillugit ilisimasaqalernissaat iluaqutaaginnassaaq, oqarpoq. Peqatigiiffik aqqutigalugu appsit Danmarkimi
atorneqartut ilisimasaqalersimavoq. – Tassaniipput pisoqatissamik nassaarneq imaluunniit sungiusaqatissamik.
Inuit ilisarisimareertariaqanngillat, tamannalu isumalluarnarteqaara. Isigiarsuttummi arlaqartut tusarsimavakka
pisoqatissaminnik amigaateqartut. Isigiarsuttut angerlarsimanerusarput aqqusinermi maniifiit ilimanngisanik qunugigamikkit,
Karina Rasmussen oqarpoq.