Innarluutillit politikkiat pillugu Ilulissani ataatsimeersuarneq pingaarutilik

 

Nunatsinni kikkut tamarmik aamma innarluuteqaraluaraanni qanoq pitsaanerpaamik atugaqarsinnaanerluta marlunngorpat naalakkersuisut, naalakkersuisoqarfinni pisortat, inunnik isumaginnittoqarfinni aqutsiviit, inunnik isumaginnittut nunatsinnilu innarluutillit peqatigiiffiit tamarmik ataatsimoorlutik oqallissapput.

Nunatsinni innarluutillit peqatigiiffii politikerit oqartussaasullu peqatigalugit oqallissapput

Marlunngorpat Ilulissani ukiumoortumik ataatsimeersuartitsinermi innarluutilinnik politikkeqarneq oqallisigineqassaaq. Nuna tamakkerlugu innarluutillit peqatigiiffii ataatsimuussapput aamma oqartussaasuniit politikeriniillu soqutiginninneq annertusimaqaaq.

”Ataatsimeersuarneq annertuumik soqutigineqarneranit paasinarsivoq amerlasuut innarluutillit atugaat ajorluinnarnerannik takunnissimasunik. Aamma ilimagaara tamatuma takutikkaa, politikerit oqartussaaffiillu inuiaqatigiittut inunnut innarluutilinnut isiginnittariaaserput iliuuseqarfigiumaneqartoq, taamaalilluni tunngaviusumik inuit pisinnaatitaaffii eqqortinneqarlutik” taama Tiliumi innarluutillit illersuisuat Anja Hynne Nielsen oqarpoq

Ullumikkut inuit innarluutillit taakkualu qanigisaat ikiorneqarusullutik tapersersorneqarusullutillu ilungersuuteqartuarput, amerlanertigulli pisariaqartitaat matussuserneqarneq ajorput. Sullissineq kommunimillu attaveqaqatigiinneq amerlanertigut sivisusarpoq ilungersunartarlunilu, ilaqutariillu amerlasuut qasulluinnartarnerannik imaluunniit inuunermi pitsaanerusunik periarfissarsiorniarlutik nunatsinniit aallartariaqartarnerannik kinguneqartarpoq.

Ataatsimeersuarnermi siunertaavoq suliat akimorlugit suleqatigiinneq nukittorsarneqarnissaa aamma pimoorussilluni ataatsimoorluni FN’p innarluutillit pillugit isumaqatigiissutaat Nunatsinni atortuulersinneqarnissaanik qulakkeerinninneq. FN’p innarluutillit isumaqatigiissutaat naqissuserpaa, kikkut tamarmik namminerisamik inuuneqarsinnaatitaasut inuiaqatigiinnilu inooqataasinnaatitaasut. Tamatumani Nunarput pisussaaffilernikuuvoq, aqqulli suli takivoq.

Anja Hynne Nielsen oqarpoq:

”Taamaattumik Nunatsinni innarluuteqaraluaraanniluunniit kikkut tamarmik inissaqartinneqarnissaat qanoq qulakkeersinnaanerlugu oqartussaaffiit, ilisimasallit aamma nuna tamakkerlugu innarluutillit peqatigiiffii naapillugit ataatsimoortippagut.”

Ataatsimeersuarnermi misilittakkat inuillu innarluutillit qanoq pitsaanerusumik atugassaqartinneqarnissaat pillugit innarluutillit peqatigiiffii, oqartussaasut aamma politikerit isumasioqatigiinnerni aamma oqallititsinerni peqataassapput. Tiliup nunatsinnilu innarluutillit peqatigiiffiisa neriuutigaat ataatsimeersuarnermi eqqartorneqartut, innarluutillit pillugit iliuusissatut pilersaarummi nutaami, maannakkut Naalakkersuisunit suliarineqartumi, politikkikkut sulinermini pimoorullugit tigujumaaraat.

Taamaattumik Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen susassaqartullu allat pingaaruteqartut, kikkut tamarmik pitsaanerpaamik ilaatinneqarnissaanik oqallinnissamut piareersimallutik peqataarusummata nuannaalersitsillunilu neriuuteqalersitsivoq.

Inunnut ataasiakkaanut aaqqiissutit aamma inuk qitiutillugu

Ataatsimeersuarnerup pingaarnertut Nunatsinni nutaanik ersarissunillu aaqqiissuteqarneq aamma inuk qitiutillugu inuuneqarneq qanoq isumaqarnersoq ukkatarissavaa.

Anja Hynne Nielsen ima oqarpoq:

”Aaqqissuussaaneq pinnagu - inuk qitiutillugu, sinaakkutinik politikkimillu pilersitsinissamik pisariaqartitsivugut. Massakkoqqissaaq sullissinermi ingerlariaatsit pissutigalugit innuttaasut amerlavallaat annaasarpagut. Aaqqissuussineq nutaanngilisoq namminerlu susassaqarfiit kisiisa eqqarsaatigalugit suleriaaseqarneq unitsinneqarnissaa pisariaqartipparput.”

Nunatta isumassarsiorfigisinnaasaanik Nunavummiit, Norgemiit aamma Danmarkimiit ilisimasallit isummanillu siaruarterisartut misilittakkaminnik arlalinnik pissarsiaqarnartunik ataatsimeersuarnermi saqqummiissapput. Innuttaasut ataasiakkaat pisariaqartitaat taakkualu pisinnaatitaaffii aallaavigalugit innarluutilinnut aaqqiissutit, nunanit allanit mislittagarineqartut ataatsimeersuarnermi katersorneqassapput.

Nunatsinni inuit innarluutillit illersuisoqarfiannit, Tiliumit, ataatsimeersuarneq aaqqissuunneqarpoq. Maajip 13-aniit 15-at ilanngullugu Ilulissani nunatsinni innarluutillit peqatigiiffii unamminartut, misilittakkanik avitseqatigiinneq ataatsimullu aaqqiissutissarsiorneq pillugit isumasioqatigeereerlutik ataatsimeersuarnermik naggaserneqassaaq. Ulloq maajip 13-ani peqatigiiffiit aamma Tilioq Iluliarmiunut tamanut ammasumik sammisaqartitsissaaq tamatumani Oqallinnermi peqataatitsigut (Nothing about us without us) qulequtarineqassaaq. Pilersaarut Tiliup facebookiani nassaarineqarsinnaavoq.

Oqaaseqaatit allat imaluunniit apeqqarissaarnermut tunngasut pillugit, innarluutillit illersuisuat, Anja Hynne Nielsen, oqarasuaat.: +299 26 28 71 imaluunniit anja@tilioq.gl attavigisinnaavat.

 

Asannittumik inuulluaqqusillunga
Med kærlig hilsen
Anja Hynne Nielsen
Inuit Innarluutillit Illersuisuat - Handicaptalsmand

Mobil: (+299) 26 28 71
Telefon: (+299) 55 19 50
Email: anja@tilioq.gl
www.tilioq.gl