Inuusuttut nunani avannarlermiut innarluuteqarnermut assingusunik akimmiffeqartarput
22.11.2021
Norgemiut, Qallunaat Kalaallillu inuusuttaasa innarluutillit suleqatigiinnissaannut periarfissaqarluarpoq. Tamanna innarluutillit suliniaqatigiiffiisa pingasut inuusuttunut innarluutilinnut Sisimiuni naapisitsinerisa kingorna paasinarsivoq. Inuusuttummi maanna angerlarput suliniaqatigiiffimminni suliassanut isumassarsianik nassarlutik.
-Inuusuttut nutaanik isumassarsiorlutik workshoppertinneqarnerminni aamma politikkikkut suliassanik samminnillutik saqqummiussaat imarisamikkut qaffasissuupput, Ingrid Thunem Norgemi Unge Funksjonshemmedemit Sisimiuni inuusuttut sapaatip akunnerani naapinnerannut peqataasoq oqarpoq.
-Taskitta tikinngitsoorneri eqqaassanngikkaanni, aaqqissuussaq iluatsilluarpoq, Ingrid Thunem oqarpoq. Taassuma tupaallaatigeqaa Norgemi Kalaallit Nunaannilu pissutsit assingiissuteqarmata. Naak oqaatsitivut paaseqatigiinnissamut akimmiffissaqaraluartut, immitsinnut paaseqatigiinnissamut kajumissuseqarluarpugut, Ingrid Thunem oqarpoq.
Sapaammi novemberip 14.-ani inuusuttut suliaminnik oqariartuutiminnillu Meeqqanut, Inuusuttunut Ilaqutariinnermullu Naalakkersuisumut Paneeraq Olsenimut nittartakkakkut attaveqaatitigut peqataasumut, Qeqqata Kommuniani Borgmesterimut Malik Berthelsenimut najuulluni peqataasumut kiisalu innarluuteqarnermut susassaqartunut ilaqutaasunullu saqqummiussipput.
KIIP tapersersorniarlugu tajaq suliarineqarpoq. Tassani oqariartuutigineqarluni inuusuttut innarluutillit kisimiinngitsut, allatuulli naleqartut aamma assigiinngissuseq. Tapersersuisunullu aamma tajaliortoqassaaq. Uani Suusi Ostermannip tajassamut isumassarsiaq siulleq borgmester Malik Berthelsenimut tunniuppaa, taanna neriorsuivoq peqatigiiffimmut tapersersuilluni tajarsiumaarluni
Nicoliinnguaq C "Sullissisunut spille" titartarpaa, William aamma Rasmus spillimi apeqqutissanik suliaqartut
Ellenip qarnga matoqqavoq, allagartarsuarmi allaqqavoq: Iluamik sullinniartigut! Inooqataavugut!
-Maluginiaqaara inuusuttut naapinnerminni ineriartupallannerat. Aallartinnermi nipaarluugaluarlutik, naalakkersuisumut borgmesterimullu saqqummiinerminni imminnut tatigilluinnarlutik sassarput, assut tamanna pikkunarpoq. Peqatigiinnitsinni tamatsinnut toqqissisimanartumik inissaqartissinnaasimagatta iluarpoq, taamaasilluta unneqqarilluta assigiinngissutsigut takutissinnaasimavagut, William Korte SUMH Sammenslutningen af unge med handicap sinnerlugu peqataasoq oqarpoq. SUMH sinnerlugu peqataasut isumassarsianik kiisalu suleriaqqinnissaminnut kajumissutsimik annertuumik naapinnerup kingorna pissarsiaqarsimallutik unnersiorput. -Pisinnaatitaaffiit aallaavigalugit suleriaqqinnissamut isumassarsivugut, taamaasilluta inuusuttut innarluutillit inuunererusutaminnik inuuneqarnissaat anguniassallugu, William oqarpoq.
Jørna Marie Larsen Kangerlussuarmiit aamma Rikke Sørensen SUMH sinnerlugu peqataasoq politikkikkut isumaqatigiissutaasinnaasumik saqqummiussaqarput. Kalaallit Nunaanni Danmarkimilu inuusuttut innarluutillit atugaannik kiisalu pitsanngorsaataasinnaasunik inassuteqaateqarlutik.
– Ila pikkunaqaaq Kalaallit Nunaanni politikkerit saqqummiussatsinnut tusarnaarmata, taamatummi Danmarkimi imaluuniit Norgemi aaqqissuigaangatta politikkerit tusarnaartanngillat, sakkortuumik nipilioqqaartariaqartarpugut tusaaneqassangaangatta, Ingrid Thune, aamma Marie My Warborg SUMH-imi sulisoq isumaqatigiillutik oqarput. Paasissutissanik avitseqatigiipput
Danmarkimit, Norgemit Kalaallit Nunaanniillu inuusuttut innarluutillit naapinnerminnni atugassarititaasunut tunngasunik paasissutissanik imminnut avitseqatigiipput, soorlu inuusuttuulluni innarluuteqarluni ilinniarfinni, suliffeqarnermi aamma inuiaqatigiinni aaqqissuussanut peqataanissamut tikikkuminassuseq qanoq misigineqartarnersoq.
-Inuiaqatigiinni aaqqissugaanerit inuusuttunut innarluutilinnut akimmiffilersuisut assigiissuteqartorujussuuneri assut tupaallaatigeqaakka, tassami amerlanerit ajornartorsiutaasartut assigiittupilussuupput. Tamannalu ataatsimut suleqatigiinnissamut tunngavissiilluarpoq, ataatsimoorlutalu nunani avannarlerni inuusuttut innarluutillit atugarisaannik pitsanngorsaanissamut suleqatigiinnissamut kajumissuseqalersitsivoq, Ingrid Thunem oqarpoq.
-Inuusuttut suliniutaat oqariartuutaallu Tiliumiit katersorneqarput, taakkulu suliniutissani atorneqarumaarput. Nunatsinni inuusuttut innarluutillit naapisinneqarnissaat uatsinnut pingaaruteqarsimaqaaq, tassami taakkuupput sulinitsinni tusarfigivallaartanngisagut. Paasinarsivorlu nunani avannarlerni inuusuttut inuiaqatigiinni inooqataaniarnerminni kiisalu tikikkuminassuseq eqqarsaatigalugu assigiinnik akimmiffeqartartut soorlu aamma ikiuutit tapersersuinerillu eqqortut pissarsiarinissaannut akimmiffiusartut assigiittorujussuit aqqusaartaraat. Tamannalu nunani avannarlerni inuusuttut innarluutillit suleqatigiinnerunissaanut periarfissaqarneranut takutitsivoq, Tiliumi allatseqarfimmi aqutsisuugallartoq Anna Ida Jonsson oqarpoq.
Inuusuttut nunagisaminnut maanna utersimalerput, Kalaallit, qallunaat norskillu peqataasimasut aggerfimminni peqatigiiffitik nunani avannarlerni suleqatigiiffiliornissamut isuma qaqissavaat.