KNR TV-ip ”Sulisinnaavunga” pillugu isiginnaagassiaq februaarip 26-ani aallakaatissavaa

Sulisinnaavunga pillugu takutitassiani Maniitsumiit Sisimiuniillu inuit arfineq marluk assigiinngitsunik innarluutillit suliffeqartut takusinnaavatit, sulinermikkullu immikkut suliffeqarfimmut inuiaqatigiinnullu tunniussassaqarnerat paasisaqarfigalugu. Isiginnaagassiaq Dennis Rosing Ingemannimit suliarineqarpoq.

”Sulisinnaavunga” pillugu isiginniaagassiap siunertaraa inunnut innarluutilinnut isiginnittariaatsip allanngortinneqarnissa. Tilioq aamma Qeqqata Kommunia suliniuteqarput inunnut innarluutilinnut suliffeqarfik inissaqartitsisoq pilersissallugu, suliniullu isiginnaagassiamik suliaqarnermik kinguneqarpoq. Tassami suliniummi qulaajaanermi paasineqarpoq, inunnut  innarluutilinnut isiginnittariaaseq suliffeqarnermi suleqataalernissaannut akimmiffiusinnaasartoq. Inuit assigiinngitsut innarluutillit suliffeqartut takutinneratigut paasisaqarfigaarput kikkut tamarmik periarfissinneqarunik suleqataasinnaasut, taamatullu inuiaqatigiinni inunnut innarluutilinnut isiginnittariaatsit pitsaanngitsut  allanngortinnissaannut ilisimasanik pilersitsisoqarluni.

-Una suliniut Tiliumut pingaaruteqarluinnarpoq, tassami inuit innarluutillit ajornannginnerusumik suliffeqarnermut ilanngunneqarsinnaalernissaat anguniarparput. Inuuniarnermikkut atugarisaatigut namminerisaminnillu aalajangiisinnaassusaat annertusarniarsaralugu. Tamanna inummut innarluutilimmut inuiaqatigiinnut suliffeqarnermigut peqataaneranut pitsaasuuvoq, illuatungaatigullu sulisitsisut suleqataasullu inuup innarluutaanik ilinniartarput, aamma innarluuteqarluni inuunermik paasisaqartarlutik, Inuit innarluutillit illersuisuat Christina Johnsen oqarpoq.

-Qeqqata Kommunianut pingaartuuvoq periarfissanik pitsaanerpaanik tunniussinissaq, inuiaqatigiinni kikkut tamarmik taperseeqataasinnaaniassappata. Tamannami inuit ataasiakkaat inuuniarnermikkut atugarisaarnerulernissaannut siuarsaataavoq, soorlu aamma suliffeqarfimmut suleqataasunullu naleqarnerulersitsisarluni. Akisussaaqataaneq ataatsimoornerlu kommunip pingaartitaannut ilaapput, aamma innuttaasunut tamanut atuuppoq, soorlu suliniummi Sulisinnaavunga-mi takutinneqartoq. Qeqqata Kommunia uani suliniummi suleqataarusuppoq aamma peqataanermigut maligassiuisoorusuppoq, taamaattumillu siunissaq eqqarsaatigalugu inunnik innarluutilinnik nammineq sulilersitsisalernissamut pitsaanerusumik suleriaaseqalerusulluni, Hans Frederik Olsen, Qeqqata Kommuniani kommunalbestyrelsemi Isumaginninnermut ataatsimiititaliami siulittaasoq oqarpoq.

Suliniutit allat

Qeqqata Kommunia aamma Tilioq misiliummik suliniutaannut “Sulisinnaavunga”-mut atatillugu Qeqqata Kommuniani Sisimiuni Maniitsumilu innarluutilinnut immikkoortortami sulisunut Majoriamilu sulisunut workshoppertitsisoqarpoq, tassani Arctic Circle Businessimiit aamma peqataasoqarluni. Tamatuma saniatigut sulisitsisut isumasioqatigiisinneqarput, inuit innarluutillit sulisorineqalernissaannut suut aporfiusarnersut oqaluuserineqarlutik, tassami suliniummi inuit innarluutillit ajornannginnerusumik suliffeqalersinnaanissaat anguniarneqarpoq.

Takutitassiat social mediami saqqummersinneqartut, KNR tvikkullu takutinneqartussap saniatigut sulisitsisunut innuttaasunullu paasissutissanik suliaqartoqarpoq 2020-milu saqqummersinneqarumaarlutik.

Tiliumit Qeqqata Kommunianiillu neriuutigineqarpoq, paasissutissat piareerpata sulisitsisunut saqqummiussinissamut aggersaasinnaajumaarlutik.

Inuit innarluutillit illersuisuat Christina Johnsen Nuummiipoq, tusagassiortunit apersorneqarnissaminut isumaqatigiissuteqarfigineqarsinnaavoq februaarip 25-ani nal. 14.30- 16.00. imalt. sisamanngornermi februaarip 27-ani nal. 09.00-15.00 tungaanut

uani:

Mail: cjo@tilioq.gl

mobiltelefon: +299  563936

imalt. Qeqqata Kommuniani kommunalbestyrelsemi ilaasortaq Hans Frederik Olsen

mobiltelefon: +299257067