Naalagaaffiit Peqatigiit Nunarsuarmi inunnut innarluutilinnut ullorititaa malunnartillugu

Tassa taamatut malunnartitsinermi videonik takussassiat aamma inuit sakkussaasivittut aallerfigisinnaassaat saqqummersinneqarmata

Videonik isiginnaagassiat “inummik innarluutilimmik ilisarisimasaqarpit?” siunertaqarpoq innarluuteqarnermik paasinnilluarnerulernissamik ataatsimoornermullu tamanik ilanngussisarnissaq, inuit innarluutillit ilanngullugit, taakkumi inuiaqatigiinni immikkoortinneqakkajupput.

Videoni assigiinngitsuni qinikkat nuimasut inunnik ilisarisimasaminnut tunngasunik saqqummerput Inuit innarluutillit. Inuit piginnaasallit, nukittoqutillit aamma isumalluutaasinnaasut. Inuillu pineqartut tamatsinnut tunniussassaqarput minnerunngitsumillu inuiaqatigiinni peqataaniarnermi akimmiffiusartut taakkartorneqarput, qanorlu peqataatitsiniarutta aaqqiisinnaanersugut. Videot Facebookimi aamma Youtubemi Tiliup quppernerini takuneqarsinnaapput.

-Neriuppunga Videot siamarterneqarnerisigut ammasumik oqallinnermik pilersitsisinnaajumaartut, ataatsimoorsinnaassuseqarnerulersitsillutillu, Inuit Innarluutillit Illersuisuat Anja Hynne Nielsen oqarpoq.

Tilioq aamma ullormi tassani innuttaasut sakkussaasivittut aallerfigisinnaasassaanik ammaassaaq, inuit innarluutillit iluaqutigisinnaasaannik imalik iluaqutigisinnaasaallut, soorlu sulianik ingerlatsisoqartarneranut tunngasut aamma maalaarfissatut periarfissat pillugit ilitsersuutit. Taakku Tiliup suliniutaanit “Inuk qitiutillugu” -mit aallaaveqarput. Suliniummi inuit innarluutillit pisinnaatitaaffinnut ilisimasaannik pisortallu aaqqissugaaneranni periarfissanik paasissutissartaqassapput, paasiuminarsakkatut saqqummissapput.

-Inuit sakkussaqalernissaat siunertaavoq, systemimilu ajornaannerusumik ingerlasinnaalissallutik. taamaasillutillu ikiorneqarnissaq pisariaqartitartikangullugu, ataatsimoornermut peqataasinnaajumallutik. Inuit saaffiginnissutaannit tusartarparput kommunimut qanoq naatsorsuuteqassanerlutik nalornisartut. Neriuppunga saqqummersitat aqqutigalugit ajornannerusumik ingerlasoqartalissasoq, taamaasillutillu inuit innarluutillit pisariaqartitartik tunngavigalugu eqqortumik ikiorneqarlutik, Anja Hynne Nielsen oqarpoq.

Sakkussaasivik ataavartumik inerisarneqassaaq immerneqartarlunilu, uani tilioq.gl

Suliniut “Inuk qitiutillugu” Tipsimut Lottomullu aningaasaliissutinit taperneqarpoq.

Video saqqummersinneqartut ukunannga peqataaffigineqarput: Stine Egede, Kommune Kujallermi borgmesteri, Juliane Enoksen, Qeqqata Kommuniani Atugarissaanermut ataatsimiititaliami siulittaasoq, Niels Kristensen Kommnune Qeqertalimmi Inuit ataatsimiititaliami siulitaasoq kiisalu Avannaata Kommuniani Borgmesteri Palle Jerimiassen aamma Meeqqanut, inuusuttunut ilaqutariinnut Peqqissutsimullu Naalakkersuisoq Mimi Karlsen, kiisalu Inuit Innarluutillit Illersuisuat Anja Hynne Nielsen

Naalagaffiit Peqatigiit Nunarsuaq tamakkerlugu inunnut innarluutilinnut ullorititaanut 2022-imut una qulequtaraa: ““Transformative solutions for inclusive development: the role of innovation in fuelling an accessible and equitable world“.

Annerusumik paasisaqarusukkuit apersuillutilluunniit attavigiuk; Inuit innarluutillit illersuisuat Anja Hynne Nielsen mobil 262871 mail: anja@tilioq.gl