Nuna inatsiseqarluni ingerlanneqassaaq
30.09.2020
Maanna sapaatip akunnera qaangiussimalerpoq Tilioq Avani Qaanaamut 2020 angalanermik nalunaarutip saqqummerneraniit. Nalunaarut aalassatitsillunilu oqallinnermik malitseqarpoq. Avannaata Kommuniani borgmesterip Palle Jerimiassenip ajornartorsiutit ilungersunartut assortornagit naqissuserpai, kommunimiillu iliuuserineqartussat tigussaasut saqqummiullugit. Borgmesterilu oqariartuuteqarpoq kommuni kisimi iliuuseqarsinnaanngitsoq. Assani isaappai ikioqqullutik. Nunattali siuttui qisuariaateqanngilluinnarnerat tupinnaqaaq.
Tiliumiit inuiaqatigiinni suleqataasunut aamma pisortanut inassuteqaatit 39-t saqqummiunneqarput. Inassuteqaatini taakkunannga qulit Naalakkersuisunut, Inatsisartunut aamma Pitsaaliuinermut Isumaginninnermullu Aqutsisoqarfimmut sammitinneqarput. Qaanaami nunaqarfiinilu inunnut innarluutilinnut atugassarititaasut aamma pissutsit ilungersunartut Inatsisartut ilaqutariinnermut Peqqissutsimullu ataatsimiititaliaannut saqqummiuppagut. Taamaattoq suli Qaanaami inunnut innarluutilinnut atugassarititaasunut pitsanngorsaatissanik qanoq iliuuseqartoqarniarneranik tusagaqarfiginngilagut.
– Qaanaami pissutsit politikkikkut sulisut tamarmik akornanni akisussaaffigineqartariaqarnerat pingaaruteqarpoq. Qaqugumulluunniit ”taamaattuaannarnerat” akuersaanngisaannassavarput aamma naliginnaasutut isigilinngisaannassavagut. Inunnut innarluutilinnut suliassaqarfik sumiginnangaavallaarpoq, tamannalu isorliunerusuni annertuumik misigineqartarpoq, Inuit innarluutillit illersuisuat Christina Johnsen oqarpoq.
Inuit innarluutillit tapersersorneqarnissannut inatsit januaarip aallaqqaataani atuutilerpoq, tamakkiisumilli suli malinneqanngilaq. Inuit innarluutillit inatsit naapertorlugu illersuisumik pisinnaatitaapput. Qeqqata Kommunia kisiartaalluni illersuisunik neqerooruteqarput. Nalunngilluinnarparput meeqqanut najortissat sivisoorsuarmik pilersinniarneqarneri piniaataarneqarnikuusut, tassalu suli nunatsinni illoqarfiit ilaanni najortit periarfissaanngillat, naak meeqqat tapersersorneqarnissaannut inatsit ukiut pingasut matuma siorna atuutilersinneqaraluartoq. Inuit innarluutillit taamatut pineqassanngillat.
Inatsiseqarpugut, tamanit malinneqarniarli.
Inuit innarluutillit illersuisuat Christina Johnsen attaviginiaraanni uani mail: cjo@tilioq.gl eller +299 55 19 50