TILIOQ AVANIMI ALLAASERISAQ: Siorapalummi innarluuteqarluni inuuneq
23.09.2020
Ilaqutariit Hendriksenikkut Siorapalummi najugaqarput, inoqutigiit arfineq marluupput taakkunanngalu sisamat innarluuteqarput. Tunorlerni saamimmiit: Niviarsiaq, Asiajuk saarliit saamimmiit: Aqattaq aamma arnaat PatdloK`.
Ilaqutariit Hendriksenikkut Kalaallit Nunaaanni nunaqarfiit avannarpasinnersaanni Siorapalummi najugaqarput, tamaani innuttaasut sisamaangaangata ataaseq innarluuteqarpoq. Ilaqutariinni anaana PatdloK’ nammineq innarluuteqarpoq ilungersuuteqartaqaarlu meeqqami innarluuteqartut ikiorneqarnissaat tapersersorneqarnissaallu anguniarlugit.
Kalaallit Nunaanni najugaqarfiit avinngarusimanerpaartaanni ilaqutariit Hendriksenikkut arfineq marlunnik inuttaqartut najugaqarput, taakkunannga sisamat innarluuteqarlutik.
PatdloK’ 52-inik ukioqarpoq innarluuteqarlunilu, qitornai pingasut noqartartuupput kisianni aamma silassorissutsimikkut timikkullu allanik innarluuteqarlutik. Patdlormut nalunartuuvoq paaseqqissaallugit qitornami suut ikiuutit tapersersorneqarnissallu paaseqqissaassallugit.
Siorapalummiit illoqarfik qaninnerpaaq Qaanaaq kujammut kangisissumut 50 kilometerisut ungasitsigisumiippoq, tassaniippullu Padtlop ikiorneqarnissamik tapersersorneqarnissamillu qinnuteqaataanut sulianik aalajangiisartutut sullissisut.
PatdloK’ uinilu Nukappiannguaq Hendriksen nammineq 2011-imi naammassillugu illuliaminni najugaqarput. Illu qisummik sanaaq Christian Panbo type 4 pingasunik sinittarfilik. –ajunngeqaaq angissusia, inissaqarluarpoq, PatdloK’ illortik inunnit arfineq marlunnit najugarineqartoq pillugu oqarpoq.
Kalaallit Nunaanni inoqarfiit avannarpasinnersaanni Siorapalummi inuttaasut sisamaangaangata ataaseq innaarluuteqarpoq.
Meeqqat innarluutillit
Ilaqutariit Hendriksenikkunnut nalunartuuvoq nukalequtaata Aqattap innarluutaa suussusersiniassallugu, peqqinnissaqarfimmiit Aqattaq misissorneqartarerepoq, ilaqutariinnulli paasiuminartumik qanoq innarluuteqarnersoq nassuiarneqarsimanani. Ilaqutariit isumaqalersinneqarput Aqattamut tamakkiisumik
iliuuseqartoqanngitsoq. PatdloK’ misigivoq, meeqqat 18-iliinerisa kingorna meeqqallu atuarfiat naammassingaangassuk
neqeroorfigineqarunnaartartut. – Tassa uanga suli iluamik paasinngilara suna pineraat,
PatdloK’ nukarliup Aqattap innarluutaata suussusersineqanngitsup nassuiaruminaatsitani pillugu oqarpoq. – Iluamillu
misissortinneqarpallaarani iluamillu malinnaaffigineqarpallaarani. Nakorsap nammineq nalilernikuuaa, immaqa noqartarnikuummat meeraalluni, PatdloK’ panimi Aqattap peqqinnissaqarfimmit misissorneqartarneri pillugit oqarpoq, noqartarnikuuneratalu kinguneri misissorneqanngitsut nangippoq.
– Aamma qaangernikuuaa, kisianni qanoq sunniuteqarnersoq nalilersorneqaranilu paasineqanngilaq. Meeqqat nakorsaata
misissortarnikuuaa iluamillu nassuiaanneqassanata. Tassa kisianni malugisarpara kinguarsimasoq, PatdloK’ oqarpoq. Aqattap Avanersuup Atuarfiani atuarnini allagartartaarfigalugu naammassinikuuaa maannalu angajoqqaamini
najugaqarpoq.
Arnaa Kommunimit akerlilersorneqartarpoq
Patdlop Nukappiannguullu ernerat Asiajuk Hendriksen 20-nik ukioqaleqqammivoq. Noqartartuuvoq, timaata saamiatungaa
nukeqarpianngilaq, qaratsamigullu innarluuteqarpoq tamannalu peqqutigalugu pitsorluttarluni ineriartornermingullu piginnaanikilluni. Majoriamit Pilersuisumi 2020-mi upernaakkut misiliisillugu sulisinniarlugu aallartippaat, tamannalu siusinaartumik pensioninik qinnuteqarneranut tunngasuuvoq. – Kisianni imminut ippigigami, niuni annerisaramiuk siniffimmiit aqqarneq ajorpoq, PatdloK’ oqarpoq taamaasillunilu Asiajuk Pilersuisumut misiliilluni sulisinneqarfimminut takkuttanngilaq. Asiajuk siusinaartumik pensionisiaqalernissamut ukiut marluk matuma siorna qinnuteqarpoq.
– Nammineq pisariaqartitaminik pisinialaarnissaa, PatdloK’ Asiajuup siusinaartumik pensioninik pisariaqartitsinera pillugu oqarpoq nangillunilu nakorsap Asiajuk nakorsamit aggersarneqarluni oqaloqatigineqarpoq,
sulisinnaanngitsutullu nalilerneqartoq arnaa nassuiaavoq. Naliliinerlu taanna kommunimut siusinaartumik
pensioninik qinnuteqarnermi ingerlateqqinneqarpoq.
– 25 literi imermik aallertaratta saperpai, noqartarnerminut noqarnaveersaatinik iisartagaqarpoq, kisianni nukersoraangami
qasulluniluunniit noqartarpoq, PatdloK’ nassuiaavoq.
Patdlop misigaa ernermi Asiajuup siusinaartumik pensioninut qinnuteqaataanik sullissineq sivisoorujussuarmik ingerlanneqartoq. Kommuni aamma Majoriaq misilillugit ernini sinnerlugu paasiniaasaraluarpoq, akerlilersorneqartarlunili. – Soorunami aamma uanga anaanatut ikiorusullugu, taava tappavani sulisut akiinnartarput, immininnguaq akisussaavoq 18-
ileerneernikuungami immineq pisussaavoq, PatdloK’ ernini sinnerlugu paasiniaasaraluarnermini itigartitaasarnini pillugit
oqarpoq. Erneratali nammineq saaffiginninnissani saperpaa, tassami arnaata Patdlop siusinaartumik pensionisiassanut qinnuteqarmat allaassullugu ikiorpaa.
Asiajuk meeqqat atuarfiat naammassinikuunngilaa. Avanersuup Atuarfianni kiisalu atuartunut angerlarsimaffimmiitilluni
maanaannaq unippoq. Nunaqarfimmullu uterluni. Asiajuk Majoriami inaarutaasumik misilitsinnissaq anguniarlugu
atuaraluarami aamma unippoq.
– Atuarfik naammassinikuunngilaa, sapernikuuaa, PatdloK’ oqarpoq nassuiaallunilu allalaarsinnaasoq atualaarsinnaasorlu,
kisianni arni ikiortigalugu saaffiginnissusiunngikkuni kommunimut immersuilluni saaffiginnissummik allassinnaanavianngitsoq.
PatdloK’ Asiajuup pisinnaatitsineratigut Inatsisartut Ombudsmandianut kommunip arriippallaami sullissinera
pillugu maalaaruteqarpoq….
