Tiliup 2022-imi ataatsimiisitsineranit innersuussutit saqqummersinneqarput

Innarluuteqarnermut sussassaqartut 60-it maajimi ataatsimiisinneqarnerminni inuiaqatigiinni piujuaannartitsilluni ineriartortitsinissamut suliniutit inuit innarluutillit pillugit isumaqatigiissummik kiisalu Naalagaaffiit Peqatigiit nunarsuarmi anguniagaanik 17-inik naapertuisinnaasunik oqallipput. Ineriartortitsinissamik oqallinnermi kinaluunniit katataassanngitsoq qitiutinneqarpoq.

Kalaallit Nunaanni innuttaasut tallimaangaangata ataaseq innarluuteqarpoq. Innarluuteqarnerli tamatsinnut sunniuteqarluni attuumassuteqarpoq, taamaattumillu ineriartortitsinissamut suliniutit inunnik innarluutilinnik ilanngussilluni peqataatitsillunilu ingerlanneqartarnissaat pisariaqarput, soorlu ilinniartitaanermi, suliffeqarnermut iliuusissatut pilersaarutini, nutaanik inissialiorluni sanaartornermi kiisalu attaveqaatit nutarsarneqarnerini. Inuit innarluuutillit inuiaqatigiinni allatuullu atuisuullutillu peqataapput. Naalagaaffiit Peqatigiit inuit innarluutillit pillugit isumaqatigiissutaanni innarluuteqarneq pilersarpoq, akimmiffiit, inuup piginnaanikillisimasup inuiaqatigiinni allatuulli peqataaniarnerani killilersuisunngoraangata. Inuiaqatigiit pisussaaffeqarput ineriartortitsilluni aningaasaliinerit akimmiffinnik piiaanernut kiisalu tamanit atorneqarsinnaasunut atorneqartassasut.

-TIliumiit maajimi ataatsimiisitsinermi pingaartipparput piujuaannartitsilluni neriartortitsinerit Naalagaaffiit Peqatigiit nunarsuarmi anguniagaanut 17-inut naapertuutissasut, tassami piujuaannartumik ineriartortitsiniaraanni inuit innarluutillit peqataatinneqartariaqarput. Ataatsimiisitsinermi workshoppeqarluni oqallinnerit kinguneraat innersuussutit ajunngitsussanik aamma tigussaasunik tunngavillit saqqummiunneqarmata, soorlu ilinniartitaanermut aamma najugaqarnermut tunngasuni, innarluuteqarnermut paasinnittaaseq kiisalu paqumisunneq iliuuseqarfiginiarlugit aamma kajummissutsimik suliniartut eqqarsaatigalugit innersuussuteqartoqarluni, Inuit innarluutillit Illersuisuat Anja Hynne Nielsen oqarpoq.

Leave no one behind

Inuit innarluutillit illersuisoqarfiat Tilioq NunaFondimiit aningaasaliiffigitinnerup kingorna “Leave No One Behind- Tiliup 2022-imi ataatsimiisitsineranit innersuussutit” saqqummersissinnaalerpai. Nalunaarusiaq Inatsisartunut ilaasortanut, Naalakkersuisunut aamma Kommunalbestyrelsenut tamanut nassiunneqassaaq, soorlu aamma nunatsinni inuit innarluutillit peqatigiiffiinut kattuffiinullu nassiunneqassalluni. Leave no one behind- Tiliup 2022-imi ataatsimiisitsineranit innersuussutit takuuk.

-Kalaallit Nunaanni inunnut innarluutilinnut suliassaqarfik naliginnaasumik aningaasaliissutinik pisariaqartitsivoq, inuiaqatigiinnili aningaasaliissutit inunnik innarluutilinnik ilanngussisut peqataatitsisullu pisariaqartinneqarput, soorlu internetimut akikinnerusumut pitsaanerusumullu, attaveqaatinut, inissianut, ilinniartitaanermut aamma suliffeqarnermut tunngasunut aningaasaliinerit inunnik innarluutilinnik peqataatitsisut. Kalaallit Nunaata inuit innarluutillit tunngaviusumik pisinnaatitaaffiit malinneqarnissaat qulakkeertariaqarpai, inuit innarluutillit eqqortumik ikiorneqarlutik tapersersorneqarlutillu isumalluutigineqarsinnaalerniassappata, allatuulli inuiaqatigiinnut tunniussassaqartut.

Naqissuserneqartariaqarpoq inuit innarluutillit tapersersorneqarnissaannut inatsisip atuutilersinneqarnissaa suli pisariaqarmat, tassami eqqortumik ikiorneqarnissaq aamma tapersersorneqarnissaq inunnit innarluutilinnit suli maannamut sukataarutigineqartuarmat. Ataatsimiisitsinermi inuit innarluutillit peqataatinneqarlutik Naalagaaffiit Peqatigiit nunarsuarmi anguniagaat 17-t inuiaqatigiinni piujuaannartitsilluni ineriartortitsiniarnermi suleqataanissaat qitiutinneqarpoq. Tiliumiillu suliassat taakku marluk sunniuteqarfigiumallugit suliniartuarpoq, nunatsinni inuit innarluutillit atugaasa pitsanngorsarneqarnissaat siunertaralugu