Tulluusimaarneq nukittunerlu
10.10.2022
Tilioq inunnut innarluutilinnut sapaatit akunneranni 41-imi inuusuttut pisinnaatitaaffinnik suaarutaat saqqummersitaqarpoq.
-Stolt, Sterk og Synlig (kal: Tulluusimaarneq, nakuuneq ersarissuunerlu) kalaallit, qallunaat norskillu inuusuttut innarluutillit Norgemi Oslop aqquserngini ”Norges Disability Pride”-qarneranut atatillugu maajimi torlulaartarput. Taamatullu ingerlaaqatigiinneq ”stolthedsparadenimik” taaguuteqarpoq. Kalaallit inuusuttut innarluutillit peqatigiiffiannit, SUMH-imit (Danskit Sammenslutning af unge med handicap)-imit aamm norgemiut unge funksjonshemmedemit peqataasut tulluusimaarlutik nukittullutillu inuit innarluutillit pisinnaatitaaffii pillugit suaaruteqarnissaannut isumassarsipput.
Norgemi stolthedsparadenimit suaartaatigineqartut inunnut innarluutilinnut sapaatit akunnera 41-imi akisuatillugit saqqummersinneqarput, norgemiu pisinnaatitaaffinnik sorsuutilik Ingrid Thunem, Sisimiuni inuusuttut innarluutillit 2021-mi naapinneranni peqataasoq kalaallit qallunaallu inuusuttut pisinnaatitaaffinnik suaartaateqartut Norgemi aaqqissuussamut tikilluaqquai.
-Isummanik siaruarteriniartuusinnaavunga. Ataatsimut nukittunerpaajuvugut. Nunat killii akimorlugit tamatta kiffaanngissuserput sorsuutigigutsigu sunaluunniit angusinnaavarput. Nunani avannarlerni ataatsimoorluta isummanik siaruarterigutta, immitsinnut sunneqatigiilluta, allanut aamma pitsaasumik sunniuteqarsinnaavugut maligassiuillutalu. Tamattami timikkut piginnaanikillisimaneq apeqqutaatinnagu inuttut naleqarpugut, peqatigiillutalu pisinnaatitaaffitta malinneqarnissaat piumasaraarput.
Norgemiu Ingrids Thunem Nicoliinnguaq Cortzen, Marita Jessen, Karina Rasmussen aamma KIIP-imi siulittaasoq Ellen Møller, kiisalu Sammenslutningen af unge med handicap-imit SUMH-imit Emilie Ghali aamma Rikke Sørensen Oslomilu inuit 500 allat peqatigalugit Stolthedsparadenimi ingerlaaqatigiipput.
Norgemut angalanermi politikkut oqallinnerit, paasisaqarneq, qanorluunniit assigiinngitsunik tunuliaqutaqaraluaraanni suleqatigiissinnaaneq misigineqarput. Qulequtaq “Stolt, Sterk og Synlig” atorlugu Norgemi inuit innarluutillit innuttaasutullu allatuut naligiissitaanissaat piumasarineqarpoq, tassa inuit innarluutillit inuiaqatigiinni allatullu peqataallutillu tunniussasaqartut, inuit innarluutillit pillugit isumaqatigiissut naapertorlugu eqqortumik ikiorneqarlutillu tapersersorneqarpata.
KIIP-imi siulittaasoq Ellen Møller Norgemi misigisaminit assut isumassarsitinneqarpoq, taamaalillunilu nunatsinni tikikkuminassutsip pitsaanerulernissaa eqqartorumallugu.
-Umiarsuarmik angallat tamanit ilaaffigineqarsinnaasoq misilipparput. Kaassuartakkamik issiavimmik atuisut ilaasinnaallutik. Naleqqussaasimanerit taamaatut nunatsinni pisariaqarput. Pisortat, unnuisarfiit tamanullu orninneqarsinnaasutut sanaartukkat Oslomi aqqusaakkavut iseruminartuupput, nuannaartunaqaat, Ellen Møller oqarpoq.
Oslomi pisut assigiinngitsuupput, Tilioq inuusuttullu innarluutillit peqatigiiffii ataatsimiisitsinermut peqataapput, allagartarsualiornermik suliaqarlutik, Stolthedsparadenimi ingerlaaqataallutik taamatullu aaqqissuinerit naggaserlugit festerneq “Stolt Natt” peqataaffigaat. Nunanilu avannarlerni inuusuttut innarluutillit peqatigiiffii siunissami aamma suleqatigiikkusupput.
Tulluusimaarneq aamma nukittuneq pillugu norskit, qallunaat kalaallillu inuusuttu oqariartuutaannik paasisitsiniutit Tiliup facebookimi quppernerani aamma nittartagaani ataasinngornermiit sapaatip tungaanut ingerlassapput.
-inuit innarluutillit allatuulli sunngiffimmi inuuneqarsinnaatitaapput, timersorlutik aamma sammisaqarlutik, Meeqqanut inuusuttunullu pingaaruteqarput. Tassa inuiaqatiginni pisussaavugut inuit innarluutillit peqataanissaannut akimmiffigisinnaasaannik piiassalluta. Ajornannginnerusumik inuit innarluutillit timiminnik aalatitsinerunissaannut timersornermilu peqatanissaannut peqatigiiffeqarnikkut aaqqissuisinnaasariaqarpugut. Kalaallit nunaat sinnerlugu inuusuttut innarluutillit Stolthedsparadenimi maajimi peqataasut, nukittunertik takutippaat, neriuutigaaralu nukissaq taanna atorlugu nunatsinni pitsaasumik sunniuteqassasut. Inuusuttut innarluutillit allatuulli sammisaqarsinnatitaapput, timiminnillu aalatitsillutik inuiaqatigiinnilu sutigut tamatigut peqataasinnaatitaallutik. Inuit innarluutillit illersuisuat Anja Hynne Nielsen oqarpoq.