Ussersorlutik oqaasilinut ikiortissaqanngilaq
05.10.2020
Tilioq Kalaallit Nunaanni tusilartut ajornartorsiutaannik ilisimatinneqarpoq. Inuit innarluutillit tapersersorneqarnissannut inatsit januaarip aallaqqaataani atuutilereeraluartoq suli malinneqarniarnera paasiniarneqarneralu ajornartorsiutaavoq.
-Kalaallit Nunaanni ussersorlutik nutserisinnaasut amingaataasorujussuupput, Sisimiuni ussersorluni oqaasilik Lulu Reimer Geisler oqarpoq. Kalaallit Nunaanni ussersorluni nutserisarfimmik pisortatigoortumik attavigisinnaasaanik soqanngilaq, soorlu kommunimut imaluunniit peqqinnissaqarfimmut saaffiginnissaguni imaluunniit inuiaqatigiinni sammisassanut arlaannut peqataaniaraangami.
Tusilartut ajornartorsiutigisartagaat pillugit Tilioq saaffigineqartarpoq, oqartussat assigiinngitsut assigiinngitsunik pisussaaffeqartarmata. Naalakkersuisut Kalaallit Nunaanni inuit annertuumik innarluutillit pillugit naatsorsueqqissaarnerat 2017-imeersoq naapertorlugu nunatsinni tusilartunik 38 innuttaasoqarpoq kommuninut tamanut siaruaallutik najugaqarlutik, 18-it Kommuneqarfik Sermersummi, 13-it Avannaata Kommuniani, 5t Qeqqata Kommuniani aamma 5nit ikinnerit Kommune Kujallermi najugaqarlutik.
Tilioq inunnik sullissisumit saaffigineqarpoq, tusilartut inuiaqatigiinni peqataatinneqannginnerat oqariartuutigalugu.
–Allaanerusutut isigineqarlutik pissusilersorfigineqartarput, soorlu suliffeqarnermi peqataajuminaatitsisarput. Uffa massa tusilartut allarpassuarnik piginnaasaqaraluartut kisianni tusaasaqarsinnaanngiinnarlutik. Inunnik sullissisoq nangilluni oqarpoq, tusilartut kommunimit tapersersorneqaratillu ikiorneqartanngitsut, tassa ussersorlutik oqaloqatigiissinnaasannginnamik nutserisoqartaratillu. Mobilimi sulianik ingerlatsisumut allaqattaartarput imaluunnit pappiaqqamut allattuillutik. Tiliumullu ussersorluni oqaaseqalernissamut ilitsersuutinik atuakkanik ilitsersorneqarnissamut ujartuisoqaraluarpoq.
-Pissassarfimmiit Namminersorlutik oqartussanut innersuunneqarpugut, taavali namminersorlutik oqartussaniit Kalaallit Tusilartut Kattuffiannut innersuussiinnarlutik –Akisussaaffimmik tigusisoqanngilaq ussersorluni oqaloqateqartalernissamut ilitsersuutinik ujartuinerput maanaannarpoq.
Tusilartumut ikiuut pingaaruteqarnerpaaq tassaavoq ussersorluni oqalunnermi nutserisinnaasoq, taannaavorlu tusilartut inuiaqatigiinni peqataanissaannut qulakkeerisussaq.
Tusilartut inooqataanermi peqataatinneqanngillat
Tusilartunut tunngasuni susassaqarfimmi ajornartorsiutit arlaqartut tamakkiisumik suli qulaajarneqanngillat.
Tilioq Namminersorlutik Oqartussanut aamma Pitsaaliunermut Isumaginninnermullu Aqutsisoqarfimmut Kalaallit Nunaanni tusilartunut ussersorluni nutserisinnaasumik periarfissanik ujartuilluni maajimi 2020-mi saaffiginnissuteqarpoq.
Pisortat nutserisussanik periarfissaqartoqarnissaanut pisussaaffeqarput, soorlu peqqinnisaqarfimmi ussersorluni nutserisup pissarsiarinissaanut kiisalu akissarsisinneqarnissaanut pisussaaffeqarpoq, soorlu tusilartup uninngarata naalaani. Tamannalu inuit innarluutillit tapersersorneqarnissaannut inatsimmut ilitsersuummi erseqqilluinnartumik allassimavoq. Aamma atuarfeqarfimmi tusilartunut tutsarluttunullu ussersorluni nutserisoqartarnissaanut pisussaaffeqarneq atuarneqarsinnaavoq, inuit innarluutillit illersuisuat Christina Johnsen oqarpoq.
Inuit innarluutillit inuiaqatigiinni allatuulli peqataanissaminnut pisinnaatitaaffeqarput, ussersorlunili nutserisinnaasumik amingaateqarneq peqqutigalugu tusilartut peqataatinneqanngitsoortarput.
-Tusilartut allatuulli sammisaqartitsinernut peqataanissaminut pisinnaatitaavoq, soorlu atuarfiup peqqinnissaqarfiullu avataatigut. Inuk tusaasaqanngitsoq aamma tarnip pissusaanik ilisimasalimmik oqaloqateqarnissani pisariaqartissinnaavaa, suliffissarsiornermi sulilernissamut apersorneqarluni, atuarfimmiluunniit angajoqqaat ataatsimiisinneqarnerannut peqataalluni, isumasioqatigiittuni ataatsimiittuni pikkorissarnerniluunniit peqataalluni. Sooruna Kalaallit Nunaanni ussersorluni nutserisinnaasunik periarfissaqanngitsoq? Kalaallit Tusilartut kattuffianni siulittaasoq Lisa Nielsen aperaaq.
Sumut saaffiginnissuteqartoqassava, sammisaqartitsinermi ussersorluni nutserisussamik pisariaqartitsigaanni?! Tassa suli akissutisinngiusaarpugut, Christina Johnsen oqarpoq.
Ussersorluni nutserineq qallunaatut
Online-mik ussersorluni nutserunneqarnissat periarfissaagaluarput, kisianni tusilartumut qanigisaasunut oqaloqatigiinneq qallunaatut ingerlanneqassappat paasiuminaatsinneqassaaq.
-Danmarkimi ussersorluni nutserisarfiit internetikkut attaveqarluni atorneqarsinnaangaluarput, kisianni akisuvoq pisariullunilu, tassami ussersorluni nutserisinnaasut qallunaatut oqaaseqartuummata kalaallisut oqalussinnaanatik. Taava imaappoq atuarfimmi ataatsimiinnermi angajoqqaaq tusilartoq peqataappat, taava ussersorluni nutserisinnasoq qallunaatut oqaasilik inniminnerneqassaaq aammali qallunaatuumiit kalaaallisut nutserisinnaasoq immikkut inniminnerneqassalluni. Ila pisarioqaat aamma kiap akilissavaa?
Nunatsinni ussersorlutik oqaaseqartut qallunaatut ussersorlutik oqaaseqartuupput, kalaallisut ussersorluni oqaaseqartoqanngimmat.
Kalaallit Nunaata Naalagaaffiit Peqatigiit isumaqatigiissutaat atuutilersinnikuaat, tamannalu tunngaviusumik allannguisoqarnissaanik kiisalu pisinnaatitaaffinnik tamakkiisumik malinnikkumanermik ineriartortitsiumanermillu qulakkeerisussaavoq. Tassa inunnut innarluutilinnut atugassarititaasut pitsanngorsartuarlugillu ineriartortinneqassasut. Tusilartut eqqarsaatigalugit Tiliumiit isumaqarpugut, tusilartunut atuarfiup 2008-imi matuneraniit pissutsit arriitsumik ajorsiartuinnaavissimasut.
Attavissaq Inuit innarluutillit illersuisuat Christina Johnsen på telefon +299 34 50 90
Kalaallit Tusilartut Kattuffiata siulittaasua Lisa Nielsen telefon: +299 52 58 80